Mbandukulu 1

Mbandukulu

Nzambi yidikaka zulu na ntoto

Na mbandukulu Nzambi yidikaka zulu na ntoto.

2 Ntoto vwandaka ya kuyilama ve, mpe yawu vwandaka ve. Maza vwandaka fuka nyonso, mpe kitombe vwandaka fuka maza. Mpeve ya Nzambi vwandaka zungana na zulu ya Maza. 3 Na yina, Nzambi tubaka: «Bika nsemo kutalana», mpe nsemo talanaka. 4 Nzambi talaka ti nsemo vwandaka mbote, mpe yandi kabulaka nsemo na kitombe. 5 Nzambi bokilaka nsemo ntangu, mpe yandi bokilaka kitombe mpimpa. Bwisi yilaka, mpe bwisi kutsyaka. Yawu vwandaka ni kilumbu ya ntete.

6 Nzambi tubaka: «Bika kisika ya mpamba kuvwanda na kati-kati ya maza mutindu muludi, samu na kukabula maza na bandambu zole.» 7 Nzambi yidikaka kisika ya mpamba mutindu muludi yina kabulaka maza: Maza ya nkaka na zulu ya muludi, ya nkaka na yisi. Mpe yawu salamaka mutindu yina. 8 Nzambi bokilaka muludi yango zulu. Bwisi yilaka, mpe bwisi kutsyaka. Yawu vwandaka ni kilumbu ya zole.

9 Nzambi tubaka: «Bika maza yina kele na yisi ya muludi kuvwanda kisika mosi, samu ti kisika ya kuyuma kutalana.» Mpe yawu salamaka mutindu yina. 10 Nzambi bokilaka kisika ya kuyuma ntoto, mpe yandi bokilaka maza yina vwandaka kisika mosi mubu. 11 Nzambi tubaka: «Bika ntoto kumenisa matiti ya mutindu na mutindu: Matiti ya konso mutindu yina ke pesaka bambuma ya kukuna, mpe bayinti ya konso mutindu yina ke butaka bambutu yina ke vwandaka na mikokodi.» Mpe yawu salamaka mutindu yina. 12 Ntoto basisaka matiti ya mutindu na mutindu: Matiti ya konso mutindu yina ke pesaka bambuma ya kukuna, mpe bayinti ya konso mutindu yina ke butaka bambutu yina ke vwandaka na mikokodi. Nzambi talaka ti yawu vwandaka mbote. 13 Bwisi yilaka, mpe bwisi kutsyaka. Yawu vwandaka ni kilumbu ya tatu.

14 Nzambi tubaka: «Bika bima yina ke lezimaka kuvwanda na zulu samu na kukabula mpimpa na ntangu. Yawu ke vwanda bidimbu samu na kuzabisaka bilumbu, na bamvula, na bantangu ya mikembo. 15 Bika bima yina banda na kulezimaka na zulu samu na kupesa nsemo na ntoto.» Mpe yawu salamaka mutindu yina. 16 Ni mutindu yina Nzambi yidikaka bima zole ya nene yina ke lezimaka samu na kukyenzulaka. Mosi, ya kulutila nene, samu na kukyenzulaka na ntangu, mpe ya nkaka, ya fyoti, samu na kukyenzulaka na mpimpa. Yandi yidikaka mpe bambwetete. 17 Yandi tulaka bima yina na zulu samu na kupesa nsemo na ntoto, 18 samu na kuyala na mpimpa mpe na ntangu, mpe samu na kukabula mpimpa na ntangu. Nzambi talaka ti yawu vwandaka mbote. 19 Bwisi yilaka, mpe bwisi kutsyaka. Yawu vwandaka ni kilumbu ya yiya.

20 Nzambi tubaka: «Bika maza kufuluka na bima nyonso ya moyo yina ke zingaka na kati ya maza, bika mpe bandeke yina ke banda na kutambulaka na zulu kuvwanda.» 21 Nzambi yidikaka bibulu ya nene ya nsisi ya mubu, na bima nyonso ya nkaka ya moyo, yina ke zingaka mpe ke tambulaka na maza, mutindu kele makanda ya bawu. Yandi yidikaka mpe bandeke nyonso mutindu kele makanda ya bawu. Nzambi talaka ti yawu vwandaka mbote. 22 Nzambi sakumunaka bawu mutindu yayi: «Beno butana, beno kuma mingi, beno fulusa mubu. Bika mpe bandeke kukuma mingi na ntoto.» 23 Bwisi yilaka, mpe bwisi kutsyaka. Yawu vwandaka ni kilumbu ya tanu.

24 Nzambi tubaka: «Bika ntoto kubasisa makanda ya mutindu na mutindu ya bibulu: Bibulu ya bwala, na bibulu ya fyoti-fyoti, na bibulu ya musitu mutindu kele makanda ya bawu.» Mpe yawu salamaka mutindu yina. 25 Nzambi yidikaka bibulu ya musitu ya mutindu na mutindu, na bibulu ya bwala ya mutindu na mutindu, na bibulu ya fyoti-fyoti mutindu kele makanda ya bawu. Nzambi talaka ti yawu vwandaka mbote. 26 Nzambi tubaka: «Beto sala muntu na kifwani ya beto, yandi vwanda mutindu beto, yandi yala bambisi ya mubu, na bandeke ya zulu, na bibulu ya bwala, na ntoto nyonso, mpe na banyama ya fyoti-fyoti nyonso yina ke tambulaka na ntoto.»

27 Nzambi yidikaka muntu na kifwani ya yandi.

Ni na kifwani ya yandi yandi yidikaka muntu.

Yandi yidikaka bawu zole, kento na bakala.

28 Nzambi sakumunaka bawu mpe tubaka: «Beno butana, beno kuma mingi, beno fulusa ntoto mpe beno yala yawu. Beno yala bambisi ya mubu, bandeke ya zulu, mpe bibulu nyonso yina ke tambulaka na ntoto.» 29 Nzambi tubaka: «Mu ke na kupesa beno matiti nyonso ya ntoto yina ke butaka bambuma ya kukuna, na bayinti nyonso yina ke butaka bambuma. Ni yawu ke vwanda madya ya beno. 30 Samu na bibulu nyonso yina kele na ntoto, bandeke ya zulu, mpe bima nyonso yina kele moyo mpe ke tambulaka na ntoto, mu me pesa bawu matiti nyonso mutindu madya.» Mpe yawu salamaka mutindu yina. 31 Nzambi talaka ti bima nyonso yina yandi yidikaka vwandaka mbote mingi. Bwisi yilaka, mpe bwisi kutsyaka, yawu vwandaka ni kilumbu ya nsambwadi.