Kayini na Abele
4
Adami vukanaka na kento ya yandi Eva. Eva kuzwaka kivumu mpe yandi butaka Kayini. Eva tubaka: «Mu me buta muntu na lusalusu ya Yave.» 2 Na manima yandi butaka dyaka mpangi ya yandi Abele. Na ntangu bawu kulaka, Abele kumaka muvungi ya mameme, Kayini kisadi-bilanga. 3 Na manima ya bilumbu, Kayini bakaka bima yina yandi kuzwaka na bilanga ya yandi, mpe yandi kwendaka pesa yawu munkayulu na Yave. 4 Abele mpe bakaka bana ya ntete ya bibulu ya yandi mpe na mafuta ya bawu, yandi pesaka yawu munkayulu na Yave. Yave yangalalaka na Abele, mpe yandi ndimaka munkayulu ya yandi. 5 Kasi Yave yangalalaka ve na Kayini, mpe yandi ndimaka ve munkayulu ya yandi. Na yina, Kayini dasukaka mpe kangaka mbunzu. 6 Yave tubaka na Kayini: «Samu na yinki nge me dasuka? Mpe samu na yinki nge me kanga mbunzu? 7 Kana nge sala mbote, nge ke vumbula yintu. Kana nge sala ve mbote, zaba ti masumu kele ya kulala na mwelo ya yinzo ya nge mutindu kibulu ya nsisi. Yawu zola kuyala nge, kasi ni nge fwana kuyala yawu.»8 Na manima, Kayini sololaka na leki ya yandi Abele. Ntangu bawu kumaka na bilanga, Kayini nwanisaka leki ya yandi Abele, mpe kufwaka yandi.
9 Yave yufulaka Kayini: «Wapi leki ya nge Abele?» Kayini vutulaka: «Mu zaba ya munu ve. Ni munu ke kebaka leki ya munu?» 10 Yave tatamanaka na kutuba: «Samu na yinki nge me sala mutindu yina? Mu ke na kuwa ndinga ya menga ya leki ya nge yina ke na kuyawula na ntoto. 11 Kubanda bubu yayi, nge ke vwanda ya kusingwa samu na menga ya leki ya nge yina ntoto me mina mpe ba ke bingisa nge. 12 Ntangu nge ke sala bilanga, ntoto ke buta mbote ve. Nge ke banda kuyenga-yenga na yinza ya muvimba.»
13 Kayini zonzaka na Yave: «Kitumbu yina nge me pesa munu me lutila nene na kunata. 14 Mutindu bubu yayi nge me bingisa munu na ntoto yayi, mu ke vwanda ya kubumbama na meso ya nge, mu ke banda kuyenga-yenga bisika nyonso. Muntu ni muntu yina ke kutana na munu ke kufwa munu.» 15 Yave zonzaka na yandi: «Kana muntu kufwa nge, mu ke futisa yandi lufwa ya nge bambala sambwadi.» Na yina, Yave tulaka kidimbu na Kayini samu ti, muntu ni muntu yina ke kutana na yandi kufwa yandi ve.
16 Na yina, Kayini kwendaka vwanda na yinsi ya Node, na esete ya Edeni, ntama na Yave.
Bana ya Kayini
17 Kayini vukanaka na kento ya yandi, mpe kento ya yandi kuzwaka kivumu. Yandi butaka mwana ya bakala yina bawu pesaka nkumbu Enoke. Kayini tungaka mbanza mpe yandi pesaka yawu nkumbu ya mwana ya yandi Enoke. 18 Enoke butaka Ilade, Ilade butaka Mewuyayele, Mewuyayele butaka Metusayele, mpe Metusayele butaka Lameke.
19 Lameke kwelaka bakento zole. Ya ntete vwandaka Ada, ya zole Sila. 20 Ada butaka Yabale: Ni Yabale vwandaka nkooko ya bantu yina ke zingaka na bayinzo ya lele mpe ke yundulaka bibulu. 21 Nkumbu ya mpangi ya yandi vwandaka Yubale. Ni Yubale vwandaka nkooko ya bantu yina ke sikaka nsambi mpe dituutu. 22 Sila mpe butaka Tubale-Kayini. Tubale-Kayini vwandaka kisadi-bisengo. Yandi vwandaka yidika konso kisalulu ya kisengo na ya kisengo ya mbwaki. Nkumbu ya kibusi ya Tubale-Kayini vwandaka Naama.
23 Lameke tubaka na bakento ya yandi:
«Ada mpe Sila, beno kuwa munu!
Bakento ya munu, beno fungula makutu na kuwa mambu ya munu.
Mu me kufwa muntu samu ti yandi me lwalisa munu.
Mu me kufwa ntwenya samu ti yandi me talisa munu mpasi.
24 Kana ba ke futisa lufwa ya Kayini bambala sambwadi,
lufwa ya Lameke ba ke futisa yawu bambala
makumi sambwadi na sambwadi.»
25 Adami vukanaka dyaka na kento ya yandi Eva. Eva butaka mwana ya bakala. Yandi pesaka yandi nkumbu Sete, yina zola kutuba «kupesa». Samu ti yandi tubaka: «Nzambi me pesa munu mwana ya nkaka na kisika ya Abele, yina Kayini kufwaka.»
26 Sete mpe butaka mwana ya bakala, yandi pesaka yandi nkumbu Enose. Ni na ntangu yina bantu bandaka na kusambila Nzambi na nkumbu ya Yave.