پاپان سين توڀان نہ ڪرڻ رو نتِيجو
13
1 اُوئي ٽاڻي ڪينهڪ ماڙھُوئان پرڀُو يسُوع نا آئي اي وات سنڀۯائِي تہ گلِيل صُوبي ري ڪينهڪ ماڙھُوئان قُربانِي پي چاڙھِي تہ اُوئان نا راج ڪرڻ واۯي پِيلاطُس مارائي ڇڏيا۔2 اِيئي تي پرڀُو يسُوع اُوئان نا ڪھيو تہ، ’ڪِي اَوھِين اِين سمجھو تا تہ اُوئان ماڙھُوئان سين اي ظُلم اِيئي ڪري ٿيو تو، جو او ٻِيجان سجان گلِيل ري ماڙھُوئان سين وڌِيڪ پاپِي ھتا؟ 3 نہ۔ اِين ڪو اَھي۔ پڻ جي اَوھِين آپري پاپان سين توڀان نہ ڪرو، تو اَوھِين پڻ سجا ئي اُوئان ري جين ختم ٿي جاسو۔ 4 ٻِيجو تہ او اَڍاري ماڙھُو جِڪان تي شِيلوخ نان ري پاڙي ۾ ٿنڀو کِريو تو آن او مري گيا تا، ڪِي اَوھِين اِين تا سمجھو تہ او ٻِيجان سجان يرُوشلم ۾ رھڻ واۯان سين وڌِيڪ پاپِي ھتا؟ 5 نہ۔ اِين ڪو اَھي۔ پڻ جي اَوھِين آپري پاپان سين توڀان نہ ڪرسو، تو اَوھِين پڻ سجا ئي اُوئان ري جين ختم ٿي جاسو۔‘
ميوو نہ ڏيڻ واۯي وڻ رو مِثال
6 پَڇي پرڀُو يسُوع اُوئان نا اي مِثال ڏِنو تہ، ’ھيڪي ماڙھُو رو اَنگُوران رو باغ ھتو، جِڪي ۾ ھيڪ اَنجِير رو وڻ پوکيَل ھتو۔ ھيڪ ڏِينھ او اُوئي وڻ ۾ ميوو جوڻ سارُون آيو، پڻ ھيڪ ئي ڪو ڏِٺو۔ 7 تڏھين اُوئي مالھِي نا ڪھيو تہ، ’ٽِنھان سالان سين ھُون اِيئي وڻ ۾ ميوو جوڻ سارُون آئُون تو۔ پڻ مين ڪڏھي پڻ ڪِينھ ڪو ڏِٺو اَھي۔ اِيئي نا وڍي ڇڏ۔ اُونھِين زمِينَ ڪِي روڪي ڀِيٽو اَھي؟‘
8 تڏھين مالھِي ڪھيو تہ، ’سائِين، اِيئي نا اڃان ھيڪ سال ڇڏي ڏيو تہ ھُون اِيئي ري چاري پاسي چَلھو کوتري ڀاڻ ڏيئان۔ 9 پَڇي جي او ٻِيجي سال ميوو ڏي، تو ٺِيڪ اَھي۔ نِتاڻي ڀلين وڍائي ڇڏيا۔‘
پرڀُو يسُوع رو پَوِيتر ڏِينھ تي ھيڪِي گُڪِي ڏوسِي نا سجِي ڪرڻ
10 ھيڪي پَوِيتر ڏِينھ تي پرڀُو يسُوع ھيڪي مندر ۾ سِکايو پي۔ 11 اُٿ ھيڪ ڏوسِي ھتِي جِڪي نا اَڍاران سالان سين ڀُوت لگل ھتو۔ اُوئي ڀُوت لگڻ ري ڪري او ڪمزور ٿي گُڪِي ٿي گئِي تِي، آن سِڌِي بِلڪُل ڪو ٿي سگھتِي۔
12 پرڀُو يسُوع جڏھين اُوئي نا ڏِٺِي، تڏھين اُوئي نا آپ وٽ سڏ ڪري ڪھيانتي تہ، ’ٻائِي، ھي تاھجِي بِيمارِي سين جِند ڇُٽي گئِي اَھي۔‘ 13 اِين ڪھي پرڀُو يسُوع آپرا ھٿ اُوئي تي رکيا، آن او جھٽ پٽ سِڌِي ٿي ڀِيٽِي، آن اِيشوَر رِي واکاڻ ڪرڻ لگِي۔
14 اِيئي تي مندر ري اَگواڻ نا ڪاوَڙ لگِي، ڪِي تہ پرڀُو يسُوع پَوِيتر ڏِينھ تي سجو سارو ڪرڻ رو ڪم ڪريو تو۔ اُوئي ماڙھُوئان نا ڪھيو تہ، ’ھفتي ۾ ڇھ ڏِينھ اَھين جِڪان ۾ اَوھِين ڪم ڪري سگھو تا۔ اِيئي ڪري اُوئان ئيج ڏِينھان ۾ سجا ٿيڻ سارُون آيا ڪرو، پڻ پَوِيتر ڏِينھ تي نہ۔‘
15 تڏھين پرڀُو يسُوع اُوئي نا ڪھيو تہ، ’اي ڪُوڙان ماڙھُوئان، پَوِيتر ڏِينھ تي اَوھان مان ھرڪو آپرو آپرو گڏھ گابو وٿاڻ مان ڇوڙھي پِيئاڙڻ ڪو تو جائي ڪِي؟ 16 اي اِبراھِيم ري اولاد مان ھيڪ ٻائِي اَھي، جِڪي نا اَڍاران سالان سين شيطانَ قابُو ڪري ٻيٺو تو۔ تو پَڇي اِيئي نا پَوِيتر ڏِينھ تي اِيئي بِيمارِي سين ڇڏاڻ ضرُورِي ڪو ھتو ڪِي؟‘
17 پرڀُو يسُوع رِي اي وات سنڀۯي جڪو ماڙھُو اُوئي ري خِلاف ھتا، او ڏاڍا ڦِڪا ٿيا۔ پڻ ٻِيجا سجا ئي ماڙھُو پرڀُو يسُوع ري ڪريَل وڏا وڏا ڪمان تي خُوش ٿيا۔
تُورِيئي ري ٻِج رو مِثال
(متِي ۱۳:۳۱–۳۲، مرقس ۴:۳۰–۳۲، لُوقا ۱۳:۱۸–۱۹)
18 پَڇي پرڀُو يسُوع ڪھيو تہ، ’ھي ھُون اَوھان نا سنڀۯائُون تو تہ اِيشوَر رو راج ڪي جيھڙو اَھي، آن اُوئي رِي ڪي سين ڀيٽ ڪران۔ 19 او تُورِيئي ري ٻِج ري جين اَھي، جِڪي نا ڪيھِي ماڙھُو لي آپري باغ ۾ پوکيو۔ پَڇي او وڌي وڻ ٿيو، آن اُوئي ري ٽاۯيان ۾ پکيان کُنڀل ٺاھيا۔‘
گوھيَل کٽي اَٽي رو مِثال
(متِي ۱۳:۳۳، لُوقا ۱۳:۲۰–۲۱)
20 پَڇي پرڀُو يسُوع وۯي ڪھيو تہ، ’ھُون اِيشوَر ري راج رِي ڪي سين ڀيٽ ڪران؟ 21 او گوھيَل کٽي اَٽي ري جين اَھي، جِڪي نا ڪيھِي ڏوسِي لي اَڌ مڻ اَٽي ۾ مِلايو، تو نيٺ اُوئي رو اَثر سجي اَٽي ۾ پکڙجي گيو۔‘
سوڙي دروازي رو مِثال
(متِي ۷:۱۳–۱۴، ۲۱–۲۳، لُوقا ۱۳:۲۲–۳۰)
22 پرڀُو يسُوع شھران آن گامان مان ٿيتو ماڙھُوئان نا سِکاتو يرُوشلم شھر سمھون گيو پي۔
23 تو ڪيھِي ماڙھُو اُوئي نا پُڇيو تہ، ’ساڌُو جِي، ڪِي ايھڙا ماڙھُو بِلڪُل ٿوڙھا اَھين جِڪان نا ڇوٽڪارو جُڙسي؟‘
تو پرڀُو يسُوع ماڙھُوئان نا ڪھيو تہ، 24 ’سوڙي دروازي وِچيا مٽڻ سارُون پُورِي پُورِي ڪوشِش ڪرو، ڪِي تہ ھُون اَوھان نا ڪھان تو تہ گھڻا ماڙھُو اَندر جاڻ رِي ڪوشِش ڪرسين، پڻ جائي ڪِنھِي سگھين۔ 25 جڪو گھر رو ڌڻِي اَھي، او اُٺي دروازو بند ڪري ڇڏسي۔ تو پَڇي اَوھِين ٻاھر ڀِيچي در کڙڪائي ڪھسو تہ، ’اي گھر را ڌڻِي، اَسان سارُون در کولو۔‘
پڻ او اَوھان نا ڪھسي تہ، ’ھُون اَوھان نا ڪو تو اوۯکان تہ اَوھِين ڪھا آيا اَھو۔‘
26 تڏھين اَوھِين ڪھسو تہ، ’اَسان اَوھان ڀيۯو کاڌو پِيئو اَھي، آن اَوھان اَسانجي پاڙي ۾ واتين سِکائين اَھين۔‘
27 پڻ او اَوھان نا وۯي ڪھسي تہ، ’ھُون اَوھان نا ڪو تو اوۯکان تہ اَوھِين ڪھا آيا اَھو۔ بُڇڙان ماڙھُوئان، اَوھِين سجا ئي مانھجي اَنکيان سين ٽۯي جائو۔‘
28 جڏھين اَوھِين آپ نا ٻاھر ڪڍيَل ڏيکسو، آن اِبراھِيم، اِضحاق، يعقُوب آن سجان اِيشوَر رو نياپو ڏيڻ واۯان نا اِيشوَر ري راج ۾ ڏيکسو، تڏھين اَوھِين ڏنت ڪُرٽي روسو۔ 29 پڻ چاران ڏِسان سين ماڙھُو آئي اِيشوَر ري راج ۾ دعوَت کاسين۔ 30 وات سنڀۯو۔ ڪي ايھڙا اَھين جڪو ھِيڻا پُٺيا اَھين، او اَگ ۾ ٿيسين۔ آن ڪي ايھڙا اَھين جڪو ھِيڻا اَگ ۾ اَھين، او پُٺيا ٿيسين۔‘
پرڀُو يسُوع رو يرُوشلم شھر سين پريم ڪرڻ
(متِي ۲۳:۳۷–۳۹، لُوقا ۱۳:۳۱–۳۵)
31 اُوئي ئيج ٽاڻي فرِيسِي ٽولي ري ڪينهڪ ماڙھُوئان آئي پرڀُو يسُوع نا ڪھيو تہ، ’اَوھِين اِيھا نِسري ٻِيجڻ ھليا جائو، ڪِي تہ راج ڪرڻ واۯو ھيروديس اَوھان نا مارڻ چاھي تو۔‘
32 تڏھين پرڀُو يسُوع اُوئان نا ڪھيو تہ، ’اَوھِين جائي اُوئي گِدڙ نا ڪھو تہ، ’اج آن سَواري ھُون ماڙھُوئان سين ڀُوت ڪڍتو رھِيس آن ماڙھُوئان نا سجا سارا ڪرتو رھِيس۔ پَڇي ٽِيجي ڏِينھ آپرو ڪم پُورو ڪرِيس۔‘ 33 توئي پڻ اج، سَواري آن پرِين مِنا پنڌ ڪرڻو اَھي۔ ڪِي تہ اي ٺِيڪ ڪو اَھي تہ ڪوئِي اِيشوَر رو نياپو ڏيڻ واۯو يرُوشلم سين ٻاھر ماريو جائي۔
34 اي يرُوشلم واۯان، اي يرُوشلم واۯان، اَوھِين اِيشوَر رو نياپو ڏيڻ وۯان را خُونِي اَھو۔ آن جِڪان نا اِيشوَر اَوھان وٽ ميلھي تو، اُوئان نا اَوھِين پٿران سين ماري تا ڇڏو۔ جيھڙي نمُوني ڪُڪڙِي آپري ٻچيان نا آپري پنکان ھيٺا ڀيۯا ڪري تِي، ايھڙي نمُوني ھُون پڻ ڪِتا ئي دفعا اَوھان نا ڀيۯا ڪرڻ سارُون سِڪيو، پڻ اَوھان ڪو مڃيو۔ 35 ھي اِيشوَر اَوھانجو گھر اَوھان سارُون ڇڏي ڏيسي۔ ھيڪ ڏِينھ اَوھِين اِين ڪھسو تہ، ’اِيشوَر رِي آسِيس اُوئي تي ھوئي، جڪو پرڀُو اِيشوَر ري نان سين آئي تو۔‘ پڻ ھُون اَوھان نا ڪھان تو تہ اُوئي ڏِينھ تائين اَوھِين مِنا ڪِنھِي ڏيکو۔‘