پرڀُو يسُوع رو آپري ٻارھان چيلان نا ڪم تي ميلھڻ
(متِي ۱۰:۵–۱۵، مرقس ۶:۷–۱۳، لُوقا ۹:۱–۶)
9
1 پَڇي پرڀُو يسُوع آپري ٻارھان چُنڊيَل چيلان نا سڏ ڪري ڀيۯا ڪريا، آن اُوئان نا بِيمارين ڇڏاڻ آن ڀُوت ڪڍڻ رِي طاقت آن حق ڏِنانتي۔ 2 پَڇي پرڀُو يسُوع اُوئان نا ميلھيا تہ جين او جائي اِيشوَر ري راج ري باري ۾ سنڀۯائين آن ماڙھُوئان نا سجا ڪرين، 3 آن اُوئان نا ميلھڻ ري ٽاڻي اِين ڪھيانتي تہ، ’پنڌ سارُون ڪوئِي شئي مَ کڻو، نِڪو گيڏِي، نِڪو جھوۯِي، نِڪو روٽِي، نِڪو پئِيسا آن نِڪو ئي ٻِيجو وگو۔ 4 جِڪي ري گھري اَوھِين اَگ ۾ جائي ٽِڪو، جِتِي تائين اُوئي شھر مان رَوانا نہ ٿيو، اُتِي تائين اُوئي ئيج گھر ۾ ٽِڪيا۔ 5 پڻ جِڪي شھر ۾ ماڙھُو اَوھان نا آڻ نہ ڏيئين، اُوئي شھر سين ٻاھر نِسري آپري پگان رِي ڌُوڙ پڻ ڇنڊيا، تہ او اُوئان سارُون نِشانِي ٿي۔‘6 پَڇي او چيلا رَوانا ٿيا، آن گان گان جائي خُوشخبرِي سنڀۯاتا آن بِيماران نا سجا ڪرتا گيا۔
راج ڪرڻ واۯي ھيروديس رو وائِڙو ٿيڻ
(متِي ۱۴:۱–۱۲، مرقس ۶:۱۴–۲۹، لُوقا ۹:۷–۹)
7 جڏھين راج ڪرڻ واۯي ھيروديس اي سجين واتين سنڀۯين، تڏھين او وائِڙو ٿي گيو، ڪِي تہ ڪينهڪ ماڙھُوئان اِين پي ڪھيو تہ، ’يُوحنا مُئلان مان جِيتو ٿي اُٺيو اَھي‘، 8 ڪينهڪ ماڙھُوئان ڪھيو پي تہ، ’ايلياہ وۯي پڌرو ٿيو اَھي‘، آن ٻِيجان وۯي ڪھيو پي تہ، ’اَگلان اِيشوَر رو نياپو ڏيڻ واۯان مان ڪوئِي جِيتو ٿي اُٺيو اَھي۔‘
9 اِيئي تي ھيروديس ڪھيو تہ، ’يُوحنا رو تہ مين ڪنڌ وڍائي ڇڏيو تو۔ پَڇي اي وۯي ڪوڻ اَھي؟ جِڪي رين ايھڙين واتين ھُون سنڀۯان پيو۔‘ آن او پرڀُو يسُوع سين مِلڻ رِي ڪوشِش ڪرتو رھيو۔
پرڀُو يسُوع رو پنچ ھزار ماڙھُوئان نا روٽِي کاراڻ
(متِي ۱۴:۱۳–۲۱، مرقس ۶:۳۰–۴۴، لُوقا ۹:۱۰–۱۷، يُوحنا ۶:۱–۱۳)
10 جڏھين خاص چيلا پَڇا وۯي آيا، تڏھين جِڪِين اُوئان ڪريو تو، او سجو ئي پرڀُو يسُوع نا آئي سنڀۯايانتي۔ پَڇي پرڀُو يسُوع اُوئان نا آپ ڀيۯا بيت صيدا شھر سمھان ھيڪلائِي ۾ تيڙي گيو۔ 11 پڻ ماڙھُوئان را جڪو ميڙ ھتا، اُوئان نا جڏھين اِيئي وات رِي خبر پئِي، تڏھين او پڻ پرڀُو يسُوع پُٺيا گيا۔ پرڀُو يسُوع اُوئان سين خُوشِي سين مِليو آن اُوئان نا اِيشوَر ري راج رين واتين سنڀۯاڻ لگو، آن جڪو بِيمار ھتا، اُوئان نا سجا ڪريانتي۔
12 جڏھين ڏِينھ آنٿوڻ واۯو ھتو، تڏھين ٻارھان ئي چيلان پرڀُو يسُوع نا آئي ڪھيو تہ، ’اِٿ آپِين بيابانَ ۾ ٻيٺا اَھان۔ اِيئي ڪري ماڙھُوئان نا موڪل ڏيو تہ آسي پاسي واۯان گامان آن ڍاڻيان ۾ جائي آپري کاڻ پِيئڻ آن رھڻ رو بندوبست ڪرين۔‘
13 پڻ پرڀُو يسُوع آپري چيلان نا ڪھيو تہ، ’اِيئان نا اَوھِين کارائو۔‘
تڏھين اُوئان ڪھيو تہ، ’اَسان وٽ رُگو پنچ روٽين آن ٻہ مڇين اَھين۔ ٻِيجو ڪِينھ ڪو اَھي۔ جي اَوھِين ڪھو، تو پَڇي اِيئان سجان سارُون کاڌو ناڻي رو لي آئُون۔‘ 14 اُوئان اِيئي ڪري اِين ڪھيو، ڪِي تہ اُٿ پنچ ھزار کن رُگو مرد ھتا۔
تو پرڀُو يسُوع چيلان نا ڪھيو تہ، ’اِيئان نا پنجاھ پنجاھ ري ٽولي ۾ ٻيساۯو۔‘ 15 تڏھين چيلان جين پرڀُو يسُوع ڪھيو تو، اِين رو اِين ماڙھُوئان نا ٻيساۯيا۔ 16 پَڇي پرڀُو يسُوع پنچ روٽين آن ٻہ مڇين کڻي آڪاس سمھون جوئي اُوئان سارُون اِيشوَر را ٿورا مڃيا۔ پَڇي او جھوري آپري چيلان نا ڏيتو گيو، آن او ماڙھُوئان ري اَگ ۾ رکتا گيا۔ 17 سجا ئي ماڙھُو کائي ڍاپيا، آن جڪو ٽُڪر بچيا تا، اُوئان سين ٻارھي کارا ڀراڻا۔
پَطرس رو پرڀُو يسُوع تي ويساھ رِي پڌرائِي ڪرڻ آن پرڀُو يسُوع رو آپري موت ري باري ۾ سنڀۯاڻ
(متِي ۱۶:۱۳–۲۳، مرقس ۸:۲۷–۳۳، لُوقا ۹:۱۸–۲۲)
18 ھيڪ ڏِينھ پرڀُو يسُوع ھيڪلي دُعا پي منگِي، آن اُوئي را چيلا اُوئي ري پاسي ۾ ٻيٺا تا۔ دُعا ڪرڻ سين پَڇي پرڀُو يسُوع اُوئان وٽا پُڇيو تہ، ’ماڙھُو مانھجي باري ۾ ڪِي تا ڪھين تہ ھُون ڪوڻ اَھان؟‘
19 تڏھين چيلان وۯتِي ڏِنِي تہ، ’ڪي ماڙھُو اِين ڪھين تا تہ اَوھِين يُوحنا پَوِيتر سِنانَ ڏيڻ واۯا اَھو، ڪي ماڙھُو اِين ڪھين تا تہ اَوھِين ايلياہ اَھو، آن ڪي ماڙھُو وۯي اِين ڪھين تا تہ اَگلان اِيشوَر رو نياپو ڏيڻ واۯان مان ڪوئِي جِيتو ٿيو اَھي۔‘
20 پرڀُو يسُوع وۯي پُڇيو، ’پڻ اَوھِين ڪِي تا ڪھو تہ ھُون ڪوڻ اَھان؟‘
تڏھين پَطرس ڪھيو تہ، ’اَوھِين اِيشوَر را چُنڊيَل مسِيح اَھو۔‘
21 تو پرڀُو يسُوع اُوئان نا تمام گھڻو ڪھيو تہ، ’اي وات ڪيھِي نا متان ڪھيا‘، 22 آن وۯي ڪھيانتي تہ، ’اِين ٿيڻ کپي تہ مُنش پُتر گھڻا ڏُک سھي۔ ٻِيجو تہ آپڻِي قوم را اَگواڻ، وڏا پُوجارِي آن پنڊت اُوئي نا رد ڪري مارائي ڇڏين، آن پَڇي ٽِيجي ڏِينھ او جِيتو ٿي اُٺي۔‘
چيلو ٿيڻ رو شرط
(متِي ۱۶:۲۴–۲۸، مرقس ۸:۳۴–۹:۱، لُوقا ۹:۲۳–۲۷)
23 پَڇي پرڀُو يسُوع سجان نا ڪھڻ لگو تہ، ’جي ڪوئِي مين پُٺيا ھلڻ چاھي تو، او آپرو آپ نا وِساري، ھر روز آپرِي سُولِي کڻي، آن مين پُٺيا آئي۔ 24 ڪِي تہ جڪو آپرِي حَياتِي بچاڻ چاھي تو، او اُوئي نا گونسي۔ پڻ جڪو مين سارُون آپرِي حَياتِي گونئي تو، او اُوئي نا بچاسي۔ 25 جي ڪوئِي ماڙھُو دُنيا ري سجين شئين ھٿ ڪري، پڻ آپري جِيوَ نا گونئي ڇڏي، آن سزا کائي، تو اُوئي نا ڪيھڙو فائِدو؟ 26 جي ڪيھِي نا مين آن مانھجي واتيان سين ڦِڪائِي ٿي تِي، تو مين مُنش پُتر نا پڻ اُوئي ٽاڻي اُوئي سين ڦِڪائِي ٿيسي جڏھين ھُون آپرِي آن آپري پِتا آن پَوِيتر فرِشتان رِي روشني ۾ آئِيس۔
27 پڻ ھُون اَوھان نا سچ تو ڪھان تہ اِٿ ٻيٺل ماڙھُوئان ۾ ڪي ايھڙا اَھين، جڪو جِتِي تائين اِيشوَر رو راج نہ ڏيکسين، اُتِي تائين ڪِنھِي مرين۔‘
پرڀُو يسُوع رو سوجھرو پڌرو ٿيڻ
(متِي ۱۷:۱–۸، مرقس ۹:۲–۸، لُوقا ۹:۲۸–۳۶)
28 اِيئان واتيان نا ھفتو کن ٿي گيو، تو پرڀُو يسُوع آپ ڀيۯا پَطرس، يُوحنا آن يعقُوب نا تيڙي جبل مٿي دُعا منگڻ سارُون گيو۔
29 جڏھين پرڀُو يسُوع دُعا پي منگِي، تڏھين اُوئي رِي شِڪل بدلجي گئِي، آن اُوئي را گڀا کِوَڻ ري جين چمڪڻ لگا۔ 30 پَڇي ڪِي ٿيو تہ ٻہ ماڙھُو پرڀُو يسُوع سين واتين ڪرڻ لگا، جڪو مُوسيٰ آن ايلياہ ھتا۔ 31 اُوئان روشني ۾ درشن ڏي پرڀُو يسُوع ري موت ري باري ۾ واتين پي ڪرين، جڪو يرُوشلم شھر ۾ ٿيڻو ھتو۔
32 اُوئي ٽاڻي پَطرس آن اُوئي را ساٿِي گھڻِي اُونگھ ۾ ھتا۔ جڏھين اُوئان نا سار ٿئِي، تڏھين اُوئان پرڀُو يسُوع رو سوجھرو ڏِٺو، آن او ٻہ ماڙھُو پڻ ڀيۯا ڀِيٽل ڏِٺانتي۔ 33 پَڇي جڏھين مُوسيٰ آن ايلياہ پرڀُو يسُوع وٽا جاڻ لگا، تڏھين پَطرس پرڀُو يسُوع نا ڪھيو تہ، ’گرُو جِي، ڀلا ڀاگ اَسانجا جڪو اَسِين اِٿ اَھان۔ ھي اَسِين اِٿ ئي ٽِن ڀُونگين ٺاھُون، ھيڪ اَوھان سارُون، ھيڪ مُوسيٰ سارُون آن ھيڪ ايلياہ سارُون۔‘ پڻ اُوئي آپ نا اي خبر ڪو پئِي تہ ھُون ڪِي پيو ڪھان۔
34 اڃان پَطرس اِين ڪھيو پي تہ ھيڪي ڪڪر آئي اُوئان مٿي ڇانھ ڪرِي۔ جڏھين او ڪڪر سين ڍڪجي گيا تڌھين چيلا ٻِيھاجڻ لگا، 35 آن ڪڪر مان ھيڪ آواز سنڀۯڻ ۾ آيو تہ، ’اي مانھجو پُتر اَھي، مين اِيئي نا چُونڊيو اَھي۔ اَوھِين اِيئي رين واتين مڃي۔‘ 36 اي آواز آڻ سين پَڇي اُوئان نا پرڀُو يسُوع ھيڪلو ڏيکڻ ۾ آيو۔
پَڇي چيلان اي واقعو آپرِي دِل ۾ رکيو، آن جِڪِين اُوئان ڏِٺو تو، او اُوئان ڏِينھان ۾ ڪيھِي نا پڻ ڪو سنڀۯايانتي۔
پرڀُو يسُوع رو ھيڪي ڇوڪري مان ڀُوت ڪڍڻ
(متِي ۱۷:۱۴–۲۱، مرقس ۹:۱۴–۲۷، لُوقا ۹:۳۷–۴۳)
37 ٻِيجي ڏِينھ جڏھين پرڀُو يسُوع آن او ٽِن چيلا جبل سين ھيٺا اُتريا، تڏھين پرڀُو يسُوع نا تمام گھڻا ماڙھُو ڀيۯا ٿيا۔ 38 اُوئان مان ھيڪي جڻي رڙ ڪري ڪھيو تہ، ’گرُو جِي، ھُون اَوھان نا مِنٿ تو ڪران تہ اي مانھجو سِڪِيلَڌو ڏِڪرو جڪو اَھي، اِيئي نا جوئو۔ 39 ھيڪ ڀُوت اِيئي نا قابُو ڪري تو، اوچتين رڙين ڪرائي ڇِۯڪان کارائي تو، آن اِيئي ري مُونھ مان گوگھِي وھي تِي۔ پَڇي او تمام گھڻا سُوۯ ڏي مس مس ڇڏي تو۔ 40 مين اَوھانجي چيلان نا ڀُوت ڪڍڻ سارُون مِنٿ ڪرِي، پڻ او ڪڍي ڪو سگھيا۔‘
41 تڏھين پرڀُو يسُوع ڪھيو تہ، ’اَوھِين اِيئي زماني را ماڙھُو ڪِتا بي اِعتبار آن ڀٽڪيَل اَھو۔ مِنا اَوھان ڀيۯو ڪِتا ڏِينھ رھڻو پاسي؟ آن ڪِتا ڏِينھ اَوھانجين واتين سھڻين پاسين؟ تاھجي ڏِڪري نا اُرھو تيڙي آ۔‘
42 اڃان او ڇوڪرو آيو پي، تو ڀُوت اُوئي نا ھيٺو کيرائي ڇِۯڪان کاراڻ لگو۔ تڏھين پرڀُو يسُوع ڀُوت نا نِسرڻ رو حُڪم ڏِنو، آن ڇوڪري نا سجو ڪري آپري ٻاپ ري حَوالي ڪريانتي۔ 43 سجا ئي ماڙھُو اِيشوَر رِي ايھڙِي طاقت ڏيکي حيرانَ ٿي گيا۔
پرڀُو يسُوع رو ٻِيجي گھوئِي آپري موت ري باري ۾ سنڀۯاڻ
(متِي ۱۷:۲۲–۲۳، مرقس ۹:۳۰–۳۲، لُوقا ۹:۴۳–۴۵)
اڃان سجا ئي ماڙھُو پرڀُو يسُوع ري سجان ڪمان تي حيرانَ ھتا، تو پرڀُو يسُوع آپري چيلان نا ڪھيو تہ، 44 ’اَوھِين مانھجِي اي وات دِل ۾ رکيا تہ مُنش پُتر نا ماڙھُوئان ري حَوالي ڪريو جاسي۔‘
45 پڻ چيلا اي وات سمجھيا ئي ڪو۔ وات اُوئان سين لِڪائِي گئِي تِي، تہ جين او نہ سمجھين۔ آن اِيئي ري باري ۾ او پرڀُو يسُوع وٽا پُڇڻ سين ٻِيھاجتا پي۔
سجان سين وڏو چيلو ڪوڻ اَھي؟
(متِي ۱۸:۱–۵، مرقس ۹:۳۳–۳۷، لُوقا ۹:۴۶–۴۸)
46 پَڇي چيلا آپت ۾ بحث ڪرڻ لگا تہ، ’آپان مان وڏو ڪوڻ اَھي؟‘
47 پڻ پرڀُو يسُوع اُوئان رِي دِل را خيال سمجھي گيو، تو اُوئي ھيڪ نِنڍيو ٻاۯيو تيڙي آپري پاسي ۾ ڀِيچاۯيو، 48 آن چيلان نا ڪھيانتي تہ، ’جڪو مانھجي نان ري ڪري اِيئي ٻاۯِيئي نا قبُول تو ڪري، اِين سمجھو تہ او مِنا قبُول ڪري تو۔ آن جي ڪوئِي مِنا قبُول تو ڪري، اِين سمجھو تہ او اُوئي نا قبُول تو ڪري جِڪي مِنا ميلھيو اَھي۔ ڪِي تہ جڪو اَوھان سجان ۾ نِنڍو اَھي، او ئيج وڏو اَھي۔‘
جڪو اَوھانجي خِلاف ڪو اَھي، او اَوھانجي پاسي اَھي
(مرقس ۹:۳۸–۴۰، لُوقا ۹:۴۹–۵۰)
49 پَڇي يُوحنا پرڀُو يسُوع نا ڪھيو تہ، ’گرُو جِي، اَسان ھيڪي ماڙھُو نا اَوھانجي نان سين ڀُوت ڪڍتي ڏِٺو، آن اَسان اُوئي نا منع ڪرِي، ڪِي تہ او اَسان ڀيۯو اَوھان پُٺيا ڪو تو ھلي۔‘
50 پڻ پرڀُو يسُوع اُوئي نا ڪھيو تہ، ’اُوئي نا ھي منع متان ڪريا، ڪِي تہ جڪو اَوھانجي خِلاف ڪو اَھي، او اَوھانجي پاسي اَھي۔‘
پرڀُو يسُوع رو گلِيل صُوبي سين يرُوشلم شھر سمھون جاڻ
پرڀُو يسُوع رو سفر شرُوع ڪرڻ
51 جڏھين پرڀُو يسُوع رو آڪاس تي کجڻ را ڏِينھ نيڙا آيا، تڏھين اُوئي يرُوشلم شھر سمھون جاڻ رو پڪو فيصلو ڪريو۔ 52 اُوئي آپ سين اَگ ماڙھُو ميلھيا، آن او پرڀُو يسُوع ري ٽِڪڻ رِي تَيارِي ڪرڻ سارُون سامرِي قوم ري ھيڪي گان ۾ آيا۔ 53 پڻ اُٿلان ماڙھُوئان پرڀُو يسُوع نا ٽِڪڻ ڪو ڏِنو، ڪِي تہ او يرُوشلم سمھون گيو پي۔
54 اي ڏيکي پرڀُو يسُوع ري چيلان يعقُوب آن يُوحنا اُوئي نا ڪھيو تہ، ’پرڀُو، جي اَوھانجِي مرضِي ھوئي، تو اَسِين حُڪم ڏيئان تہ آڪاس سين جوت اُتري اِيئان نا ٻاۯي ناس ڪري ڇڏي، (جين ايلياہ ڪريو تو)۔‘
55 پڻ پرڀُو يسُوع اُوئان نا دڙڪو ڏِنو تہ، ’نہ۔ (اَوھِين سمجھو ڪو تا تہ ڪيھڙي پاسي سين وات ڪرو پيا، اِيشوَر ري پاسي سين، يا شيطانَ ري پاسي سين۔ 56 ڪِي تہ مُنش پُتر ماڙھُوئان نا ختم ڪرڻ سارُون نہ، پڻ بچاڻ سارُون آيو اَھي۔)‘
پَڇي پرڀُو يسُوع آن چيلا ٻِيجي گان سمھان رَوانا ٿي گيا۔
پرڀُو يسُوع را چيلا ڪوڻ اَھين؟
(متِي ۸:۱۹–۲۲، لُوقا ۹:۵۷–۶۲)
57 پرڀُو يسُوع آن اُوئي را چيلا آپرِي واٽ ڏي گيا پي، تو ھيڪي ماڙھُو پرڀُو يسُوع نا ڪھيو تہ، ’اَوھِين جِٿ پڻ جاسو، ھُون اَوھان پُٺيا ھلِيس۔‘
58 پڻ پرڀُو يسُوع اُوئي نا ڪھيو تہ، ’لونڪڙيان سارُون ڏران اَھين، آن پکيان سارُون کُنڀل اَھين۔ پڻ مُنش پُتر نا مٿو لِڪاڻ سارُون ڪوئِي جگھا ڪو تِي ھوئي۔‘
59 پَڇي پرڀُو يسُوع ھيڪي ٻِيجي ماڙھُو نا ڪھيو تہ، ’مين پُٺيا آ۔‘
پڻ اُوئي ڪھيو تہ، ’پرڀُو، ھيڪاڻِي مِنا موڪل ڏيو تہ ھُون جائي مانھجي اَبا نا دفن ڪران۔‘
60 پڻ پرڀُو يسُوع اُوئي نا ڪھيو تہ، ’مُئلان نا ڇڏو تہ او آپري مُئلان نا دفن ڪرين۔ پڻ تُون جائي اِيشوَر ري راج ري باري ۾ سنڀۯا۔‘
61 ٻِيجي پڻ ھيڪي ماڙھُو پرڀُو يسُوع نا ڪھيو تہ، ’پرڀُو، ھُون اَوھان پُٺيا ھلِيس۔ پڻ ھيڪاڻِي مِنا موڪل ڏيو تہ آپري گھر واۯان وٽا جائي موڪلائي آئُون۔‘
62 پڻ پرڀُو يسُوع اُوئي نا ڪھيو تہ، ’جڪو ھۯ ۾ جھلي تو، آن پَڇو جوئي تو، او اِيشوَر ري راج ري ڪم رو ڪو اَھي۔‘