ڏسان ڪنواريان رو مِثال
25
1 پَڇي پرڀُو يسُوع ھيڪ مِثال ڏي ڪھيو تہ، ”جڏھين مُنش پُتر آسي تڏھين آڪاسِي راج ڏسان ڪنواريان ري مِثال ري جين ھوسي، جڪو آپرا ڏِيئا کڻي لاڏي نا تيڙڻ سارُون ٻاھر گئين۔ 2 اُوئان ۾ پنچ عقل واۯين ھتين آن پنچ بي عقل۔ 3 ڪِي تہ بي عقلان جڏھين آپرا ڏيئا کڻيا تڏھين آپ ڀيۯو تيل ڪو کڻيو، 4 پڻ عقل واۯيان ڏيئا کڻي ري ٽاڻي آپ ڀيۯو تيل پڻ کڻيو۔ 5 لاڏي نا آڻ ۾ دير ٿي گئِي اِيئي ري ڪري نينگريان نا اُونگھ آڻ لگِي آن سُوئي رھين۔ 6 پَڇي آڌِي رات رو جڏھين ھُل ٿيو تہ، ’لاڏو آئي گيو، ٻاھر آئو آن اُوئي سين مِلو،‘ 7 تڏھين او نينگرين اُٺين آن آپرا ڏِيئا ٺِيڪ ڪرڻ لگين۔ 8 پَڇي بي عقل نِينگريان عقل واۯيان نا ڪھيو تہ، ’ڪينهڪ تيل اَسان نا ڏيو ڪِي تہ اَسانجا ڏِيئا اُونجھاجين تا۔‘ 9 پڻ عقل واۯيان نينگريان ڪھيو تہ، ’اَسان وٽ اِتو تيل ڪو اَھي جڪو اَسان آن اَوھان سارُون پُورو ٿي سگھي۔ سُٺو اِين ٿيسي تہ اَوھين جائي دُڪان سين لي آئو۔‘ 10 جڏھين بي عقل نينگرين تيل ليڻ سارُون گئين پي اُوئي ٽاڻي لاڏو پڻ آئي پُگو۔ پنچ نينگرين جڪو تيار ھتين او لاڏي ڀيۯين ويھان رِي دعوت ۾ گئين آن دروازو بند ٿي گيو۔ 11 اُوئي سين پَڇي بي عقل پڻ آئي پُگين آن ڪھڻ لگين تہ، ’سائين، سائين، اَسان سارُون دروازو کولو۔‘ 12 لاڏي ڪھيو تہ، ’ھُون اَوھان نا سچ تو ڪھان تہ ھُون اَوھان نا ڪوتو اوۯکان۔‘ 13 اِيئي ري ڪري اَوھين پڻ ھوشيار رھيا ڪِي تہ اَوھين نا پڻ اُوئي ڏِينھ يا وقت رِي خبر ڪو اَھي۔“ترنان نوڪران رو مِثال،
14 ”يا وۯي آڪاسِي راج اُوئي ماڙھُو ري جِين اَھي جڪو ٻِيجي مُلڪ سمھون گھُمڻ سارُون پي گيو آن آپري نوڪران نا منگائي آپرو مال مِلڪيت اُوئان ري حوالي ڪريانتي۔ 15 اِيئي ھرڪي نا اُوئان رِي ھوشيارِي ري جِين مِلڪيت ڏِني۔ ھيڪي نا پنچ ھزار سون را سِڪا ڏِنا، ٻِيجي نا ٻہ ھزار آن تريجي نا ھيڪ ھزار سون را سِڪا ڏي آپ مُسافِرِي تي ھليو گيو۔ 16 جِڪي نا پنچ ھزار سون را سِڪا جُڙيا اُوئي جائي اُوئي سين واپار ڪريو آن ٻِيجا پنچ ھزار ٻيجا سِڪا ڪمايا۔ 17 ايھڙي نمُوني جِڪي نا ٻہ ھزار سون را سِڪا جُڙيا اُوئي پڻ ٻہ ھزار ٻِيجا ڪمايا۔ 18 پڻ جِڪي نا ھزار سون را سِڪا جُڙيا اُوئي زمين ۾ کڏ کوتري آپري مالڪ را سِڪا ٻوري ڇڏيا۔ 19 گھڻي وقت سين پَڇي اُوئان رو مالڪ پڇو آيو آن اُوئان سين حِساب ليڻ لگو۔ 20 جِڪي نوڪر نا مالڪ پنچ ھزار سون را سڪا ڏِنا ھتا، او نوڪر ٻيجا پنچ ھزار سون را سڪا کڻي آيو آن مالڪ نا ڪھيانتي تہ، ’سائين اَوھان مِنا پنچ ھزار سون را سڪا ڏِنا ھتا، ھي مين اُوئان سين ٻيجا پنچ ھزار سون را سڪا ڪمايا اَھين۔‘ 21 تڏھين اُوئي ري مالڪ ڪھيو تہ، ’شاباش نيڪ آن ايماندار نوڪر تُون ٿوڙھو ۾ ايماندار رھيو اَھين۔ اُوئي ري ڪري ھُون گھڻو ڪينهڪ تاھجي حوالي ڪرِيس۔ تُون آئي مين ڀيۯو خوشي ڪر۔‘ 22 پَڇي ٻيجو نوڪر آيو جڪي نا مالڪ ٻہ ھزار سون را سڪا ڏِنا ھتا۔ اُوئي آئي ڪھيو تہ، ’سائين اَوھان مِنا ٻہ ھزار سون را سڪا ڏِنا ھتا۔ ھي مين اُوئان سين ٻيجا ٻہ هزار سون را سڪا ڪمايا اَھين۔‘ 23 تڏھين مالڪ ڪھيو تہ، شاباش نيڪ آن ايماندار نوڪر تُون ٿوڙھو ۾ ايماندار رھيو اَھين۔ اُوئي ري ڪري ھُون گھڻو ڪينهڪ تاھجي حوالي ڪرِيس۔ ھي تُون آئي مين ڀيۯو خوشي ڪر۔ 24 پَڇي ھي تريجو نوڪر گھر مھين آيو جڪي نا مالڪ ھيڪ ھزار سون را سڪا ڏِنا ھتا۔ اُوئي نوڪر آئي ڪھيو تہ، ’سائين مِنا خبر ھتي تہ اَوھِين ڏُکيا ماڙھُو اَھو، ڪِي تہ اَوھِين او لوڻو تا جڪو اَوھِين پوکو ئي ڪوتا آن او ڀيۯو ڪرو تا، جڪو اَوھِين ڇنٽُوئي ڪوتا۔ 25 اُوئي ري ڪري ھُون ٻيھاجيو پي تہ اَوھان مِنا ھيڪ ھزار سون را سِڪا ڏِنا اَھين۔ او سِڪا مين زمين ۾ ٻوري ڇڏيا اَھين۔ ھي اي اَوھانجا سِڪا لِيو۔‘ 26 تڏھين مالڪ ڪھيو تہ، ’اي بُرا آن بيڪار نوڪر جڏھين تِنا اي خبر ھتي تہ ھُون اي لُوڻان تو جڪو ھُون پوکان ئي ڪوتو آن او ڀيۯو ڪران تو جڪو ھُون ڇَنٽان ئي ڪوتو ۔ 27 پَڇي تِنا خبر ھتي تہ مانھجا سِڪا ڪِي سيڙايا آن جڏھين مانھجا سِڪا پَڇا ڏِنا ھونت تہ مِنا وياج سميت آئي ڏِنا ھُونت۔‘ 28 پَڇي اُوئي مالڪ حُڪم ڏنانتي تہ، ’اُوئي نوڪر سين ھيڪ ھزار سِڪا کوندائي لي آئو آن ڏس ھزار سِڪا واۯي نوڪر نا جائي ڏيو۔ 29 ڪِي تہ جڪي وٽ ڪينهڪ اَھي اُوئي نا گھڻو ڏنو جاسي پڻ جڪي ڪنھين ڪئين ڪو اَھي اُوئي سين کوندائيو جاسي جڪو ڪينهڪ اُوئي وٽ اَھي ۔ 30 اَوھِين اُوئي بيڪار نوڪر نا ڌڪا ڏي ٻاھر ڪڍو آن اُوئي نا انڌاري ۾ اُڇلائو جِٿ او رڙين ڪري آن آپرا ڏنت ڪُرٽي۔‘“
آخرِي عدالت
31 ”جڏھين مُنش پُتر آپرِي روشنِي ۾ سجان فرِشتان ڀيۯو آسي، تڏھين او آپرِي گادِي تي ٻيسي راج ڪرسي۔ 32 اُوئي ري اگ ۾ سجيان قومان را ماڙھُو ڀيۯا ڪريا جاسين۔ پَڇي جيھڙي نمُوني ڌراڙ آپري رِڍان ٻڪريان سين ڌار ڪري تو، ايھڙي نمُوني او سجيان قومان را ماڙھُو ھيڪي ٻِيجي سين ڌار ڪرسي۔ 33 او رِڍان نا آپري سُبتي پاسي ڀيچاۯسي، آن ٻڪريان نا اُبتي پاسي۔
34 پَڇي راجا آپري سُبتي پاسي ڀِيٽل ماڙھُوئان نا اِين ڪھسي تہ، ’ھليا آئو، اَوھان جِڪان نا مانھجي پِتا آسِيس ڏِنِي اَھي۔ اُوئي راج را وارث ٿيو، جڪو دُنيا رِي شرُوعات سين لي اَوھان سارُون تَيار ڪريو گيو اَھي۔ 35 ڪِي تہ جڏھين ھُون بُکيو ھتو، تڏھين اَوھان مِنا روٽِي کارائي۔ ھُون تِرسيو ھتو، تڏھين اَوھان مِنا پاڻِي پِيئاڙيو۔ ھُون ڌاريون ھتو، تڏھين اَوھان مِنا آپري گھر ۾ ٽِڪايو۔ 36 مين وٽ گڀا ڪو ھتا، تو اَوھان مِنا گڀا پيھرايا۔ ھُون بِيمار ھتو، تو اَوھان مانھجِي سنڀال ڪرِي۔ ھُون جيل ۾ ھتو، تو اَوھِين مين سين ملاقات ڪرڻ آيا۔‘
37 تڏھين نيڪ ماڙھُو اُوئي نا اِين ڪھسين تہ، ’پرڀُو، اَسان اَوھان نا ڪڏھي بُکيا ڏِٺا آن روٽِي کارائي؟ يا ترسيا ڏيکي اَوھان نا پاڻِي پِيئاڙيو؟ 38 ڪڏھي اَسان اَوھان نا ڌاريان ڏيکي آپري گھر ۾ ٽِڪايا؟ آن اَوھان نا ڪڏھي اُوگھاڙو ڏيکي گڀا پيھرايا؟ 39 اَسِين ڪڏھي اَوھان نا بِيمار يا جيل ۾ ڏيکي اَوھان سين ملاقات ڪرڻ آيا؟‘
40 تڏھين راجا اُوئان نا وۯتِي ڏيسي تہ، ’ھُون اَوھان نا سچ تو ڪھان تہ جڪو ئي ڀلائِي رو ڪم اَوھان مانھجي اِيئان ڀايان سين ڪيھِي سين ڪريو، ڀلين او سجان سين نِنڍو ماڙھُو ھوئي، توئي پڻ اِين سمجھو تہ او ڀلائِي رو ڪم اَوھان مين سارُون ڪريو۔‘
41 پَڇي آپري اُبتي پاسي ڀِيٽل ماڙھُوئان نا اِين ڪھسي تہ، ’مين سين اَۯگا ٿيو، اَوھِين جڪو اِيشوَر را پِٽيل اَھو۔ اَوھِين اُوئي ھميشہ ٻۯتل جوت ۾ جائو، جڪو شيطانَ آن اُوئي ري فرِشتان سارُون تَيار ڪريل اَھي۔ 42 ڪِي تہ ھُون بُکيو ھتو، پڻ اَوھان مِنا ڪو کارايو۔ ھُون ترسيو ھتو، پڻ اَوھان مِنا پاڻِي ڪو پِيئاڙيو۔ 43 ھُون ڌاريون ھتو، پڻ اَوھان مِنا آپري گھري ڪو ٽِڪايو۔ مين وٽ گڀا ڪو ھتا، پڻ اَوھان مِنا گڀا ڪو ڏِنا۔ ھُون بِيمار آن جيل ۾ ھتو، پڻ اَوھان مانھجِي سنڀال ڪو ڪرِي۔‘
44 تڏھين او پڻ ڪھسين تہ، ’پرڀُو، اَسان ڪڏھي اَوھان نا بُکيا، ترسيا، ڌاريان، اوگھاڙا، بِيمار يا جيل ۾ ڏِٺا آن اَوھانجِي مدد ڪو ڪرِي؟‘
45 تو او اُوئان نا وۯتِي ڏيسي تہ، ’ھُون اَوھان نا سچ تو ڪھان تہ جڪو ئي ڀلائِي رو ڪم اَوھان مانھجي اِيئان ڀايان سين ڪھِيي ھيڪي سين ڪو ڪريو، ڀلين او سجان سين نِنڍو ماڙھُو ھوئي، توئي پڻ اِين سمجھو تہ او ڀلائِي رو ڪم اَوھان مين سارُون ڪو ڪريو۔‘
46 پَڇي اُوئان ماڙھُوئان نا ھميشہ رِي سزا جُڙسي، آن نيڪ ماڙھُوئان نا ھميشہ رو جِيونَ جُڙسي۔“