متِي رو لِکيل پَوِيتر شاستر 19

پرڀُو يسُوع رو طلاق ري باري ۾ سکاڻ

‏1 پرڀُو يسُوع اي واتين سکاڻ سين پَڇي گليل سين روانو ٿي يردن دريا‌ ري ٻيجي ڪپ يهوديا صوبي ري علائقي ۾ آيو۔ ‏2 اُٿ پڻ گھڻا ماڙھُو پرڀُو يسُوع وٽ آئي ڀيۯا ٿيا۔ پرڀُو يسُوع اُوئان نا سجا سارا ڪريا۔ ‏3 پڻ اُٿ ڪينهڪ فرِيسِي پنٿ را ماڙھُو آيا آن پرڀُو يسُوع نا ڦاسائڻ سارُون پڇيو تہ، ”اي گروجي، ڪِي آپڻي ڌرم ۾ اي ٺيڪ اَھي، تہ ڪو ماڙھُو آپري گھر واۯي نا ڪھي وات ري ڪري ڇڏي سگھي تو يا نہ؟“ ‏4 تڏھين پرڀُو يسُوع اُوئان نا وۯتِي ڏِنِي تہ، ”اوھان نا شاستر ۾ اِيئي وات ري خبر ڪو اَھي ڪِي؟ اوھان تو ضرور پڙهيو ھوسي تہ ’اِيشوَر شروع ۾ نر آن ناري نا پيدا ڪريو اَھي؟‘ ‏5 آن اِيشوَر اين ڪھيو تہ، ’ماڙھُو آپري ما ٻاپ نا ڇڏي آپري ڏوسي سين ڀيۯو رھسي آن او ٻئي ڀيۯا ھيڪ ٿي جاسين۔‘ ‏6 تو پَڇي او ٻہ نہ پڻ ھيڪ اَھين جڪان نا اِيشوَر ملايو اَھي اُوئان نا ماڙھُو ڌار نہ ڪرين۔“ ‏7 تڏھين فريسيان پرڀُو يسُوع نا پُڇيو تہ، ”مُوسيٰ ڪي سارُون اي حُڪم ڏنو اَھي تہ، ’آڏمي آپري ڏوسي نا طلاق ڏي گھر سين ڪڍي سگھي تو؟‘“ ‏8 تڏھين پرڀُو يسُوع ڪھيو تہ، ”مُوسيٰ رُگو اِيئي سارُون موڪل ڏِنِي تہ اوهانجو مَن ڏاڍو ٿي گيو اَھي پڻ شروع ۾ ائين ڪو ھتو۔ ‏9 ھُون اَوھان نا ڪھان تو تہ جي ڪوئِي ماڙھُو آپري ڏوسي نا ڀوُنڏي ڪم ري ڪري ڇڏي تو آن ٻيجي ڏوسي سين ويھان تو ڪري تہ او پڻ ڀوُنڏو ڪم ڪري تو۔“ ‏10 تڏھين چيلان پرڀُو يسُوع نا ڪھيو تہ جي ڏوسي آن آڏمي ري اي وات اَھي تہ ”گروجي پَڇي سُٺو اَھي تہ پرڻجڻ ئي نہ کپي۔“ ‏11 تو پرڀُو يسُوع چيلان نا ڪھيو تہ ”اي تو ٺيڪ اَھي ۔ پڻ سجا ماڙھُو اين ڪري ڪوتا سگھين، ڪِي تہ ڪونئاران رھي پاپ آن ڏوھ سين اۯگا رھين، پڻ رگو او اين ڪري سگھين تا جڪي ري مدد اِيشوَر ڪري تو۔ ‏12 ڪِي تہ، ڪينهڪ ماڙھُو اِيئي سارُون ڪوتا پرڻجين تہ او جائي جاپي سين کدڙا اَھين آن ڪينهڪ ماڙھُو اِيئي سارُون ڪوتا پرڻجي تہ ماڙھُوئان اُوئان نا کدڙا ڪريا اَھين، آن ڪينهڪ ماڙھُو اِيئي سارُون ڪوتا پرڻجي تہ جين او اِيشوَر ري راج ۾ جائي سگھين۔ جڪو ماڙھُو اِيئان واتيان نا قبول ڪري سگھي او ڀلين ڪرين۔“

پرڀُو يسُوع رو ننڍيان ٻاۯيان نا پريم ڪرڻ

‏13 ھيڪ ڏِينھ ڪينهڪ ماڙھُو پرڀُو يسُوع وٽ ننڍيان ٻاۯيان نا تيڙي آيا، جين پرڀُو يسُوع اُوئان ٻاۯيان تي ھٿ رکي دُعا ڪري۔ پڻ چيلان اُوئان ماڙھُوئان نا آڻ ڪو پي ڏنو۔ ‏14 تڏھين پرڀُو يسُوع ڪھيو تہ، ”ٻاۯيان نا مين وٽ آڻ ڏيو اِيئان نا مَ روڪو ڪِي تہ اِيشوَر رو راج اُوئان ماڙھُوئان سارُون اَھي جڪو اِيئان ٻاۯيان جيھڙا اَھين۔“ ‏15 پرڀُو يسُوع اُوئان ٻاۯيان تي ھٿ رکي دُعا منگِي، پَڇي پرڀُو يسُوع اُوھا سين روانو ٿي گيو۔

شاھُوڪار ماڙھُو آن اِيشوَر رو راج

‏16 پَڇي ھيڪ ماڙھُو پرڀُو يسُوع وٽ آيو آن پُڇيو تہ، ”اي گروجي، ھُون ڪِي ڪران جو مِنا ھميشہ رو جِيوَن جُڙي؟“ ‏17 تڏھين پرڀُو يسُوع ڪھيو تہ، ”تُون مِنا سُٺي ڪم ري باري ۾ ڪِي پُڇين تو؟ سُٺو تہ رگو ھيڪ ئي پرميشوَر اَھي۔ جڏھين تُون ھميشہ رو جِيوَن ليڻ چاھي تو تہ اِيشوَر ري حُڪمان تي هل۔“ ‏18 شاھُوڪار ماڙھُو پُڇيو تہ ، ” او ڪيھڙا حُڪم اَھين؟“ پرڀُو يسُوع ڪھيو تہ، ” اَوھان نا اِيشوَر ري حڪمان ري خبر ڪو اَھي تہ، برو ڪم مَ ڪر، خُون مَ ڪر، چورِي مَ ڪر، ڪُوڙِي شاھِدِي مَ ڏي، ‏19 تُون آپري مات ٻاپ ري شيوا ڪر، آن آپري پاڙي واۯي سين پريم ڪر۔“ ‏20 تڏھين اُوئي ماڙھُو ڪھيو تہ، ”اِيئان سجان حُڪمان تي ھُون اگي سين هلان پيو، اڃان مين ۾ ڪيھڙي وات ري ڪمي اَھي؟“ ‏21 تڏھين پرڀُو يسُوع اُوئي نا ڪھيو تہ، ”تُون ھميشہ رو جيون منگي تو تہ ھيڻا جائي تاھجو سجو مال ملڪيت ويچي اُوئي را پيسا غريبان ۾ وۯائي ڇڏ۔ تو سُرگ ۾ تِنا خزانو جُڙسي ، پَڇي آئي مانھجو چيلو ٿي۔“ ‏22 جڏھين شاھُوڪار ماڙھُو پرڀُو يسُوع ري اي وات سنڀۯي تڏھين پريشان ٿي هليو گيو، ڪِي تہ او وڏو شاهُوڪار ماڙھُو ھتو۔ ‏23 پَڇي پرڀُو يسُوع آپران چيلان نا ڪھيو تہ،”ھُون اَوھان نا سچ ڪھان تو تہ شاھُوڪار ماڙھُو نا اِيشوَر ري راج ۾ آڻ ڏاڍو ڏُکيو اَھي۔ ‏24 ھُون وۯي ڪھان تو تہ اُٺ رو سُوئي ري پاکي سين مٽڻ تو ڏوھورو اَھي پڻ شاھُوڪار ماڙھُو رو اِيشوَر ري راج ۾ آڻ اُوئي سين پڻ وڌِيڪ ڏوهورو اَھي۔“ ‏25 جڏھين چيلان اي وات سنڀۯي تہ او ڏاڍا حيران ٿي گيا، آن اُوئان پُڇيو تہ، ” پَڇي ڪوڻ ھوسي جڪي نا مُڪتي جُڙسي؟“ ‏26 تڏھين پرڀُو يسُوع اُوئان سمھون جوئي ڪھيو تہ، ”اي وات ماڙھُوئان ري وس سين ٻاھر اَھي پڻ پرميشوَر سڀ ڪجھ ڪري سگھي تو۔“ ‏27 تڏھين پطرس پُڇيو تہ، ” جوئو اَسِين آپرا گھر تڙ ڇڏي اَوھانجي پُٺيان آيا اَھان۔ اَسان نا ڪِي جُڙسي؟“ ‏28 تڏھين پرڀُو يسُوع اُوئان نا ڪھيو تہ، ”ھُون اَوھان نا سچ تو ڪھان تو جين اَوھِين مانھجا چيلا ٿي مين پُٺيا آيا اَھو، آڪاسِي راج جڏھين مُنش پُتر آپري ميهمان سين تخت تي ٻيسَسي، تڏھين اَوهين مانھجا ٻارھي چيلا تخت تي ٻيسسو آن اسرائيل ري ٻارھان قبيلان رو اَوهين فيصلو ڪرسو۔ ‏29 ايھڙي نمُوني جڪو مانھجي ڪري آپرو گھر، آپري ، ڀائي، ٻيھنان، ما ٻاپ، آپرا ٻاۯيان آن کيتر ڇڏسي تہ اُوئي نا سئو دفعا وڌِيڪ ٿي جُڙسي آن ھميشہ رو جِيون پَڻ جُڙسي۔ ‏30 آن گھڻان ئي جڪو ھيڻا سجان سين موھر ۾ اَھين او وانسي ٿيسين آن جڪو وانسي اَھين او موھر ٿيسين۔“