پرڀُو يسُوع ري رُوپ رو بدلڻ
17
1 ڇھان ڏِينھان سين پَڇي پرڀُو يسُوع آپ ڀيۯو پطرس يعقُوب آن اُوئي ري ڀائي يوحنا نا ھيڪلائي ۾ ھيڪي اُونچي جبل تي تيڙي گيو ۔ 2 جين ئي اُوئان پرڀُو يسُوع سمھون جويو تہ اُوئي رِي صورت بدلجي گئي آن اُوئي رو مُونھ ڏِينھ ري جين چمڪڻ لگو آن اُوئي را گڀا سوجھري جين اَڇا ٿي گيا۔ 3 پَڇي اُوئان مُوسيٰ آن ايلياہ نا پرڀُو يسُوع سين واتين ڪرتي ڏٺا۔ 4 تڏھين پطرس پرڀُو يسُوع نا ڪھيو تہ، ”اي پرڀُو اِٿ اَسانجو رھڻ سٺو اَھي جي اَوھانجِي مرضي ھوئي تہ ھُون اِٿ ترن ڀونگڙين ٺاھُون ھيڪ ڀونگڙي اَوھان سارُون ، ھيڪ ڀونگڙي مُوسيٰ سارُون آن ھيڪ ڀونگڙي ايلياھ سارُون ٺاھُون۔“ 5 اڃان پطرس ٻوليو پي تہ ھيڪ چمڪتي واڏۯ اوئان آڏو آئي گيو آن اُوئي ۾ آواز آيو تہ اي مانھجو پيارو ڏڪرو اَھي آن ايئي سين ھُون گھڻو خوش اَھان آن اَوھِين ايئي رين واتين ڌيان سين سنڀۯو۔ 6 جڏھين چيلان اي آواز سنڀۯيو تہ او اتا تہ ٻِيھاجي گيا جڪو اُنڌي مونه زمين تي کري گيا۔ 7 پرڀُو يسُوع اُوئان وٽ آئي اُوئان نا ھٿ لگائي ڪھيو تہ اُٺو، ٻِيھاجو مَہ ۔ 8 پَڇي اُوئان اونچو جويو تہ پرڀُو يسُوع ھيڪلو ڏيکڻ ۾ آيو آن اُٿ ٻيجو ڪوئي ڪو ھتو ۔ 9 جين او جبل سين ھيٺا اُتريا پي تہ پرڀُو يسُوع اُوئان نا ڪھيو تہ، ”جڪو ڪينهڪ اوھان ڏِٺو اَھي او اُتي تائين ڪيھي نا مِتان سنڀۯايا جِتي تائين مُنش پُتر مرڻ سين پَڇي وۯي جِيتو نہ ٿي۔“ 10 پَڇي چيلان پرڀُو يسُوع سين پڇيو تہ، ”گرُوجِي شاستر جاڻڻ واۯا ڪي ري ڪري ڪھين تا تہ اِيشوَر ري چونڊل پرڀُو ري آڻ سين موھر ايلياھ سنت رو آڻ ضروري اَھي؟“ 11 اُوئي وۯتِي ڏي ڪھيو تہ، ”برابر ايلياہ سنت موھر آسي آن سجان نا تيار ڪرسي۔ 12 پڻ ھُون اَوھان نا ڪھان تو تہ ايلياہ سنت آئي چڪو اَھي پڻ ماڙھُوئان اُوئي نا ڪو اوۯکيو آن اُوئي سين جين وڻيو تيئن ئي سلوڪ ڪريانتي آن ساگي نمُوني مُنش پُتر سين او اين ئي سلوڪ ڪرسي۔“ 13 پَڇي چيلان سمجھو تہ او يوحنا پويتر سنان ڏيڻ واۯي ري باري ۾ وات پيو ڪري۔پرڀُو يسُوع رو مرگھي واۯي ڇوڪري سين ڀوت ڪڍڻ
14 جڏھين پرڀُو يسُوع آن او ترن چيلا ماڙهوان ڪنهين پَڇا آيا تڏھين ھيڪ ماڙھُو پرڀُو يسُوع وٽ آيو آن پرڀُو يسُوع ري پگي پڙي 15 ڪھيانتي تہ، ”اي پرڀُو مانھجي ڏِڪري تي ديا ڪرو ڪِي تہ اُوئي نا گھُٽِي آئي تي آن اي ايھڙو مرض اَھي جو او ڪڏھي جوت ۾ جائي کري تو تہ ڪڏھي جائي پاڻِي ۾ کري تو۔ 16 ھُون اُوئي نا اَوھانجي چيلان وٽ تيڙي آيو تو، پَڻ او اُوئي نا ٺيڪ ڪري ڪو سگھيا۔“ 17 اُوئي تي پرڀُو يسُوع اُوئان نا ڪھيو تہ ،”اَوھِين جڪو ايئي زماني را ماڙھُو اَھو اَوھِين ويساھ ڪِي ڪوتا رکو۔ مِنا اڃان ڪِتا ڏينه اَوھان ڀيۯو رھڻو پڙسي آن اَوھان ري غلط سوچ مِنا ڪِتي گھوئي سھڻي پڙسي، ڇوڪري نا اُرھو مين وٽ تيڙي آئو۔“ 18 تڏھين پرڀُو يسُوع ڀُوت نا ڌڙڪو ڏنو۔ ڀُوت ڇوڪري سين نِسري گيو آن اُوئي ٽاڻي ڇوڪرو سجو سارو ٿي گيو۔ 19 پَڇي چيلا پرڀُو يسُوع وٽ ھيڪلائي ۾ آيا آن پرڀُو يسُوع سين پُڇيانتي تہ، ”اَسِين اُوئي ڀُوت نا ڪي ري ڪري ڪڍي ڪو سگھيا؟“ 20 پرڀُو يسُوع وۯتِي ڏِنِي تہ، ”اَوھِين اُوئي ڀُوت نا ايئي ري ڪري ڪو ڪڍي سگھيا جو اَوھان رو اتو وِشواس ڪو ھتو۔ ھُون اَوھان نا سچ تو سنڀۯائون تہ جڏھين اَوھان ۾ رائي ري ڏاڻي جتو بہ وِشواس ھونت تو اَوھِين جبل نا ڪھي سگھياتي تہ ايھا ھلي اُٿ جا تہ او جبل ھليو جانت اَيهڙي نمُوني اَوھِين ھر ڪم ڪري سگھو تا۔ 21 پڻ دُعا آن ورت رکڻ سَوا ايھڙان ڀُوتان نا اَوهين ڪڍي ڪو سگھو۔“
پرڀُو يسُوع رو ٻيجي گهوئي آپري موت ري باري ۾ سنڀۯاڻ
22 جڏھين سجا چيلا گليل ۾ آئي ڀيۯا ٿيا تہ پرڀُو يسُوع اُوئان نا سنڀۯايو تہ، ”مُنش پُتر نا ماڙھُوئان ري حوالي ڪريو جاسي۔ 23 او اُوئي نا مارسي پڻ ترنان ڏِينھان سين پَڇي او وۯي جِيتو ٿي اُٺسي۔“ اُوئي وات تي چيلا ڏاڍا پريشان ٿيا۔
وڏي مندر ۾ ناڪو ليڻ واۯا
24 جڏھين پرڀُو يسُوع آن اُوئي را چيلا ڪفرناحوم ۾ آيا تہ ھيڪل ري مندر را ناڪو ليڻ واۯا پطرس وٽ آيا آن پُڇيانتي تہ، ”ڪِي تاھجو گرُو ھيڪل ري مندر رو ناڪو ڏي تو؟“ 25 اُوئي تي پطرس ڪھيو تہ، ”ھوئي۔“ جڏھين پطرس گھر ۾ آيو تہ اُوئي ري ٻولڻ سين اگ ۾ پرڀُو يسُوع پڇيو تہ، ”شمعون تاھجو ڪي خيال اَھي؟ تہ دُنيا ري بادشاهان نا ناڪو آن ڍلان ڪوڻ ڏي تو؟ ڪِي مُلڪ را رھڻ واۯا ڏي تا يا ڌاريا ڏي تا۔“ 26 اُوئي تي پطرس ڪھيو تہ، ”ڌاريا“ تڏھين پرڀُو يسُوع ڪھيو تہ، ” ايئي رو مطلب اَھي تہ بادشاھ را آپرا ماڙھُو ناڪو ڏيڻ سين آجا اَھين ؟ 27 توئي پڻ اَسِين اُوئان ماڙھُوئان نا ورگلائو ڪو تا اُوئي ري ڪري تون جائي ڍنڍ ۾ ڪُنڊي ھڻ جڪو پھلڪي مڇي ڦاسي، اُوئي ري مُونھ ۾ چاندِي رو ھيڪ وڏو سِڪو ھوسي۔ او کڻي جائي مانھجي آن تاھجي پاران اُوئان نا ھيڪل ري مندر رو ناڪو ڏي آ۔“