متِي رو لِکيل پَوِيتر شاستر 16

پرڀُو يسُوع نا پرچي ڏيکاۯڻ رو ڪھڻ

‏1 پرڀُو يسُوع وٽ ڪينهڪ فرِيسِي آن صدوقِي اُوئي نا آزماڻ سارُون آيا۔ آن ڪھڻ لگا تہ، ”اَسان نا ڪوئِي ايھڙو پرچو ڏيکاۯ، جِڪي سين خبر پئي تہ واقعي تُون اِيشوَر ريَ طرف سين آيل اَھين۔“ ‏2 پڻ پرڀُو يسُوع اُوئان نا وۯتِي ڏِنِي تہ، ”جڏھين ڏِينھ آنٿوڻ ري ٽاڻي سُورج رتو ٿي تو، تڏھين اَوھين ڪھو تا تہ ڏاڍِي صاف موسم ٿيسي۔ ‏3 آن جڏھين ساڪۯي ٽاڻي آڪاس رتو آن جھُڙالو تو ٿي تڏھين ڪھو تا تہ، اج ميھ آسي۔ اَوھان نا آڪاس ري نشانيان رِي خبر تہ پئي تِي، پڻ زماني ري نشانيان رِي خبر ڪوتِي پئي! ‏4 اِيئي زماني را ماڙھُو ڪِتا بُڇڙا آن بي وِشواس اَھين جڪو مين سين پرچي ڏيکارڻ رو تا ڪھين! پڻ اُوئان نا يوناہ اِيشوَر ري نياپو ڏيڻ واۯي ري پرچي بنا ٻِيجو ڪوئِي پڻ پرچو ڪِنھِي ڏيکاۯيو جائي!“ پَڇي او اُوئان نا ڇڏي روانو ٿي گيو۔

فريسيان آن صدوقيان ري پرچار سين خبردار ڪرڻ

‏5 جڏھين چيلا ڍنڍ ري ٻِيجي پاسي گيا تڏھين اُوئان نا روٽِي کڻي وِسري گئِي۔ ‏6 پَڇي پرڀُو يسُوع آپري چيلان نا ڪھيو تہ، ”جوئو، فريسيان آن صدوقيان ري خمير سين ھوشيار ٿيا۔“ ‏7 او آپت ۾ بحث ڪرڻ لگا، ”اُوئي اَسان نا اِيئي ري ڪري ڪھيو، ڪِي تہ اَسِين روٽِي ڪو کڻي آيا اَھان۔“ ‏8 پڻ پرڀُو يسُوع اُوئان رِي وات سمجھي ڪھيو تہ، ”اَوھانجو وِشواس ڪِتو نہ گھٽ اَھي! آپت ۾ تڪرار ڪِي تا ڪرو تہ اَسان وٽ روٽِي ڪو اَھي؟ ‏9 اڃان تائين اَوھين ڪوتا سمجھو؟ ڪِي اَوھان نا ياد ڪو اَھي تہ، اَوھان پنچ روٽين پنچ ھزار ماڙھُوئان ۾ وۯھائين تين آن اَوھان ڪِتين کاۯين بچل ٽُڪران رين ڀري کڻين تين؟ ‏10 آن نڪوئي ست روٽين چار ھزار ماڙھُوئان ۾ وۯھاڻ ياد اَھين، اُوئي ٽاڻي اَوھان ڪِتين کارين ڀري کڻين تين؟ ‏11 مين اَوھان نا روٽِي ري باري ۾ ڪو ڪھيو اَھي تہ، ڪي ري ڪري اَوھين ڪو تا سمجھو ؟ آپ نا فريسيان آن صدوقيان ري تعليم سين اَۯگا رکيا جڪو گوهل کَٽري اَٽي ري جين جڪو سجي اَٽي ۾ پکرجي جائي تو۔اِهڙي نمُوني اُوئان سين ھوشيار رھيا!“ ‏12 پَڇي چيلان سمجھو تہ، ”او اَسان نا روٽِي ۾ ڪم آتل خمير ري باري ۾ نہ پڻ فريسيان آن صدوقيان رِي تعليم سين خبردار رھڻ سارُون ڪھي پيو۔“

پطرس رو پرڀُو يسُوع رِي شاهدي ڏيڻ

‏13 جڏھين پرڀُو يسُوع قيصريہ فليپي شھر ري علائقي ۾ آيو، تڏھين آپري چيلان سين پُڇيانتي تہ، ”ماڙھُو منش پُتر ري باري ۾ ڪِي تا ڪھين تہ او ڪوڻ اَھي؟“ ‏14 اُوئان وۯتِي ڏِنِي تہ، ”ڪينهڪ ڪھين تا يوحنا پويتر سنان ڏيڻ واۯو اَھي، ڪينهڪ ڪھين تا تہ ايلياہ اَھي، آن ٻِيجا وۯي ڪھين تا تہ يرمياہ يا وۯي ٻِيجان اِيشوَر ري نياپو ڏيڻ واۯان ۾ ڪوئِي ھيڪ اَھي۔“ ‏15 پرڀُو يسُوع پُڇيو تہ، ”اَوھين ڪِي تا ڪھو تہ، ھُون ڪوڻ اَھان؟“ ‏16 تڏھين شمعون پطرس وۯتِي ڏِنِي تہ، ”اَوهين مسيح جِيتي اِيشوَر را ڏِڪرا اَھو۔“ ‏17 پرڀُو يسُوع ڪھيو تہ، ”اي يوحنا را ڏِڪرا شمعون، تُون ڀاگواۯو اَھين، ڪِي تہ، اي حقِيقت تِنا ڪھِي اِنسان سين نہ، پڻ مانھجي آڪاسِي پتا سين جُڙِي اَھي۔ ‏18 ھُون پڻ تِنا ڪھان تو تہ؛ تُون پطرس، مطلب ٽڪر اَھين آن اِيئي ٽڪر تي ھُون آپرِي منڊلِي اڏِيس، جِڪي تي موت رِي طاقت رو ڪوئِي اثر ڪِنھِي ٿي۔ ‏19 ھُون تِنا آڪاسِي راج رين ڪُونچين ڏيئِيس، آن جڪو تُون ڌرتِي تي بند ڪرِيس، او آڪاس ۾ بند ڪريو جاسي آن جڪو تون ڌرتِي تي کولِيس او آڪاس ۾ کوليو جاسي۔“ ‏20 پَڇي پرڀُو يسُوع آپري چيلان نا خبردار ڪريو تہ، ”ڪيھِي نا پڻ نہ سنڀۯايا تہ ھُون مسيح اَھان۔“

ڏُک آن موت ري باري ۾ اگڪٿِي ڪرڻ

‏21 اُوئي سين پَڇي پرڀُو يسُوع آپري چيلان نا کُليو کُليو ڪھي ڇڏيو تہ، ”ھُون يرُوشلم ضرُور جائِيس آن اُٿ شاستر جاڻڻ واۯان، وڏا پوجاريان آن ڌرمي پنچات اگواڻ ماڙھُوئان رين سختين سھِيس۔ مِنا ماريو جاسي، آن تريجي ڏِينھ وۯي اِيشوَر رِي طاقت سين جِيتو ٿي اُٺِيس۔“ ‏22 پطرس پرڀُو يسُوع نا ھيڪي پاسي تيڙي گيو آن سمجھايو تہ، ”اي پرڀو! شال اِيشوَر خير ڪري، تين سين اِين ڪڏھي پڻ ڪِنھِي ٿي!“ ‏23 پرڀُو يسُوع پاڇۯ ڦيري پطرس نا ڪھيو تہ، ”اي شيطان! مانھجي انکيان اگيا ٽۯي جا، مانھجي رستي ۾ تُون رُڪاوٽ اَھين، ڪِي تہ تُون اِيشوَر ري جين نہ پڻ ماڙھُوئان ري جين تو سوچين!“ ‏24 پَڇي پرڀُو يسُوع آپري چيلان نا سنڀۯايو تہ، ”جي ڪوئِي مانھجو سچو چيلو ٿيڻ چاھي تو، تہ او آپرو وڏوچار آن آڪڙ نا ماري آن آپرِي سولي کڻي مين پُٺيا ھلي۔ ‏25 ڪِي تہ جڪو چاھي تو تہ، ھُون آپرو پراڻ بچائُون او گونسي پڻ جڪو مين سارُون آپرو پراڻ ڏيسي اُوئي نا او جُڙسي۔ ‏26 ڪِي تہ ماڙھُو نا اِيئي سين ڪيھڙو فائدو جڪو سجي دُنيا تہ ھٿ ڪري، پڻ آپرو پران گونئي؟ ماڙھُو آپرو پران وۯي ليڻ سارُون ڪئين پڻ ڏي ڪو تو سگھي۔ ‏27 ڪِي تہ مُنش پُتر آپري ٻاپ رِي وڏائِي ۾ فرشتان ڀيۯو آسي، آن ھر ھيڪ ماڙھُو نا اُوئي ري ڪمان ري جين اجُورو جُڙسي۔ ‏28 ھُون اَوھان نا سچ تو سنڀۯائُون! تہ جڪو اِٿ ڀِيٽا اَھين، اُوئان ۾ ڪينهڪ ايھڙا اَھين، جڪو اُتِي تائين موت رو مزو ڪِنھِي چکين، جِتِي تائين منش پُتر نا اُوئي ري راج ۾ آتو ڪِنھِي ڏيکين۔“