Rut 3

Nu jatyinyee̱ ra Booz tsi ña Rut

Tan iin quɨvɨ, catyí ña Noemí, tyiso ña Rut, tsihin ña:

―Sɨhɨ yu, vasɨquɨ tsa tahan tsi nducu yu nu cuvi coo un, vaha xaan tun ñihi yu yoo tindaha tsihin un tan coo vaha un. 2 Jihna, ra Booz nyɨvɨ yo, ra jatsii cuhu nu tsinyii̱ un jaha̱ tyiñu un, tsacuaa vityin cua cuhun ra tsitsi cuhu cu tava ra tsɨtɨ cebada tsitsi soo tsi. 3 Ja̱vaha tsa cua cahan yu: Cu̱tyi, tyi̱hi ndutya tami tsi un, cu̱nditsi jahma vaha un. Tan cuhun un tsitsi cuhu nu cua cunyii ra Booz jaha tyiñu ra, maa tyin jaha un cuenda na ña nyehe ra tsi un, nda cuanda tsa ndɨhɨ catsi ra tan coho ra. 4 Nye̱he numaa cua cava ra cusu ra. Tatun tsa quixí ra, tacan tan cuhun un nu canyií ra, jatsiyo un jahma ndasɨ tsaha ra tan cava un ican. Yaha can, tan cahan maa ra tsihin un náa cua javaha un ―catyí ña tsihin ña.

5 Tan nacahan ña Rut tsihin ña, tan catyí ña:

―Nandɨhɨ maa tsa caahán un tsihin yu ihya, cua javaha yu ―catyí ña.

6 Tacan tan cuahan ña tsitsi cuhu tan javaha̱ ña nandɨhɨ cuhva caha̱n ña Noemí, tyiso ña, tsihin ña. 7 Sɨɨ xaan cuñí ra Booz tsa ndɨhɨ̱ tsatsi̱ ra tan tsihi̱ ra, tacan tan cuahan ra cua cava ra cusu ra nu canyií tsɨtɨ tsa tsa nduvaha̱. Tan tsa tsa canyií ra quixí ra, taxin taxin ñi cuahan ña Rut nu canyií ra, jatsiyo̱ ña jahma ndasɨ tsaha ra, tan tsicava̱ ña ican. 8 Tan maa ñuu, nacanda̱ ra Booz tan inyaha ñi ndoto̱ ra. Tsa nyehe̱ ra canyií iin ñaha ityi tsaha ra, iyo xaan cuñí ra cuvi̱. 9 Tacan tan nducu̱ tuhun ra tsi ña tan catyí ra:

―¿Yoo ñaha cuví yooho? ―catyí ra.

Tan nacaha̱n ña:

―Ña Rut cuví yu, ña jahá tyiñu tsihin musu un. Yooho cuví nyɨvɨ yu tan nyɨvɨ ña tyiso yu. Tan juvin un cuví ra cuvi jatyinyee tsi ndi. Cu̱ndaahvi iñi tsi ndi, tindaha tsihin yu ―catyí ña.

10 Tacan tan nacaha̱n ra tan catyí ra:

―Maa ra Jehová nasoco tsi un xihi, cahnu xaan cuví tsa cuñí un javaha un vityin, tan ñavin ca tsa javaha̱ jihna un. Ña nducu̱ un ra tyuvaa, ña nyehe̱ un tun cuca ra o ndaahvi ra, tyin cuñí un tsa yuhu tindaha tsihin un. 11 Vaha maa, ña caca iñi un, cua javaha maa yu tandɨhɨ tsa tsicán un. Tandɨhɨ maa nyɨvɨ ñuu Belén ihya tsitó ñi tyin vaha xaan ñaha cuví un. 12 Nditsa tyin yuhu cuví nyɨvɨ ndo tan juvin yu cuví ra cuvi jatyinyee tsi ndo, maa tyin iyó inga ra tsa yatyin ca cuví nyɨvɨ ndo tan ñavin ca yuhu, ra ican taahán tsi jatyinyee tsi ndo. 13 Ndo̱o ihya cusu un. Tan tyaan nyehe maa yo nácaa cua cuvi. Tun ndoo ra tyiñu naquihin ndaahvi ra tsi ndo^a, vaha xaan, maa tyin tun ña cuñi ra, yuhu cua jatyinyee tsi ndo, nyehé maa ra Jehová tsa caahán yu ihya. Ña caca iñi un, cava cusu un.

14 Tacan tan tsicava̱ ña Rut quixi̱ ña ityi tsaha ra Booz. Tan tsa ndi cumañi ca cunditsin inga quɨvɨ, tsa ñaha ca nacoto yo nyɨvɨ, nduvita̱ ña cuanuhu ña, tyin ña cuñí ra Booz tsa coto nyɨvɨ tyin tsaha̱n ñaha tsicusu̱ tsitsi cuhu ra.

15 Maa tyin tsa ndi cumañi ca cuhun ña, tsica̱n ra jahma ndasɨ ña tan tsitsi can tinyii̱ ra uvi xico kilu cebada tsaha̱ ra tsi ña. Tacan tan tinyii̱ ra can soco ña tan cuanuhun ña Belén.

16 Tsa tsaa̱ ña nu nyií tyiso ña, tsica̱ tuhun ña tsi ña:

―¿Nácaa cuvi̱ nu tsahan un, sɨhɨ yu? ―catyí ña.

Tacan tan natuhu̱n ña Rut tsihin ña tsa caha̱n ra Booz tsihin ña. 17 Tan catyí tucu ña:

―Ihya ndahá yu cebada tsaha̱ ra tsi yu. Catyí ra tsihin yu tyehen: "Ña cuhun un cunuhun un tsihin ndaha ndɨɨ ñi maa un nu nyaá tyiso un", catyí ra ―catyí ña.

18 Tacan tan catyí ña Noemí tsihin ña:

―Vaha sɨhɨ yu, cua cuatu nuu yo, nyehe jihna yo nácaa cua cuvi, tyin ra ican ña cua ndoo ra vaha tun ña cundaa tyiñu ihya vityin ―catyí ña.