Nu tindaha̱ ra Booz tsihin ña Rut
4
Tacan tan cuahan ra Booz cua cunyaa ra yuhu cora ñuu can, tsinyaa̱ ra ican tyin ican tuhva nyɨvɨ ndu iín natuhún ñi tyiñu. Tan tsa cuví ñi maa ra tsa cuví nyɨvɨ ra Elimelec vatsí ra, ra tsa caha̱n ra Booz tuhun tsihin ña Rut. Tan catyí ra tsihin ra can:―Yooho xin, na̱han jihna tyin iyó iin tyiñu cuñí yu natuhun yu tsihin un. Cu̱nyaa tyin cua natuhun yo ―catyí ra tsihin ra.
Tacan tan tsinyaa̱ ra. 2 Tan cana̱ ra Booz utsi ra tsahnu ñuu can naha ra, tan tsinyacu̱ ra naha tsihin ra. 3 Tan quitsaha̱ caahán ra tsihin ra cuví nyɨvɨ ra, tan catyí ra:
―Ña Noemí tsaa̱ nuhu nyico ña quee̱ ña ñuhu Moab, tan catyí ña tyin xicó ña ñuhu tsa cuvi̱ tsii ra Elimelec, nyɨvɨ yoa. 4 Yacan cuví tyiñu cuñí yu cahan yu tsihin un, cuñí yu coto yu tun cuvi nyehe ndaahvi un tsi ñi tan jata un ñuhu ñi, tyin juvin un cuví nyɨvɨ ra Elimelec tsa yatyin ca. Iyó ndatu tsa ndoo ñuhu can tsi un. Maa tyin tun yooho tan ña naquihin ndaahvi un tsi ñi, maa yu cua nyehe ndaahvi tsi ñi, tyin juvin yu taahán tsi jata can, tyin juvin ñi nyɨvɨ ra cuví tucu tsi yuhu. Ca̱han ityi nuu tandɨhɨ ra tsahnu ihya naha ra tyin juvin ra naha cua cuvi tsa ndaa tun jata un ñuhu can o ña jata un can ―catyí ra tsihin ra.
Tan nacaha̱n ra can tan catyí ra:
―Cua jata maa yu ñuhu can ―catyí ra.
5 Tacan tan catyí ra Booz tsihin ra:
―Iyó inga tsa cuñí yu cuhva cuenda yu tsi un, tun cua jata un ñuhu xicó ña Noemí, taahán tsi tindaha un tsihin ña Rut, ña quee̱ ñuhu Moab, ña cuvi̱ ñasɨɨhɨ ra tsihi̱, tyin tacan tan cua cuvi ñuhu can tsi sehe ndo tsa cua coo, tan ña cundɨhɨ tata ra cuvi̱ yɨɨ ña ―catyí ra.
6 Tan nacaha̱n ra can:
―Tun tacan, ña cuví jata yu ñuhu can, tyin cuvi cunaa ihñi tsa nacoó jutu yu tsi yu. Vaha ca jata maa un itsi, tsahá yu ndatu tsa iyó tsi yu tsi un, tyin yuhu ña cuvi jata yu can ―catyí ra.
7 Tan tahan tsanahan tun xico ñi o jata ñi, o tsahá ñi ndatu iyó tsi ñi tsi inga nyɨvɨ, ñi xico o ñi tsahá ndatu can, tavá ñi intuhun nditsan ñi tan tsaha ñi can, tyin yacan janahán tyin tsahá ñi ndatu iyó tsi ñi tsi inga nyɨvɨ. 8 Tan tacan javaha̱ ra can, tava̱ ra intuhun nditsan ra tan tsaha̱ ra can tsi ra Booz, tan catyí ra tsihin ra:
―Ja̱ta ñuhu can ―caytí ra.
9 Tacan tan catyí ra Booz tsihin ra tsahnu nyacú tsihin ra tan tsihin tandɨhɨ nyɨvɨ:
―Tsa ndaa cuví maa ndo tyin vityin cua jata yu tandɨhɨ maa tsa cuvi̱ tsii ra Elimelec, tsa cuvi̱ tsii ra Quelión tan ra Mahlón, tsa xicó ña Noemí. 10 Tan cuví tucu ndo tsa ndaa tyin cua tindaha yu tsihin ña Rut, ñaha quee̱ ñuhu Moab, tsa cuvi̱ ñasɨɨhɨ ra Mahlón. Tyin tacan tan ña cunaa tata ra, tan ña naa iñi nyɨvɨ ñuu ihya tsi ra ―catyí ra.
11 Tan nacaha̱n ra tsahnu can naha ra tan tandɨhɨ maa nyɨvɨ nyacú yuhu cora can, tan catyí ñi:
―Nditsa, tsa ndaa cuví ndi. Maa ra Jehová cua jatyinyee tsi ñaha cua cuvi ñasɨɨhɨ un, na cuvi ña cuhva cuvi̱ ña Raquel tan ña Lea, tyin ñi ican jaha̱ tsa nducuaha nyɨvɨ tata ra Israel, tan nyɨvɨ tata ñi cuví tucu yoo. Tacan tucu yooho, na cahnu cuví un cuenda nyɨvɨ tata ra Efrata iyó ñuu Belén ihya. 12 Na cuhva ra Jehová coo cuaha sehe un tsihin ñaha ihya, tumaa cuaha sehe ra Fares tsicoo̱, ra cuvi̱ sehe ña Tamar tsihin ra Judá ―catyí nyɨvɨ can.
13 Tacan cuvi̱ tan tindaha̱ ra Booz tsihin ña Rut, cuvi̱ ña ñasɨɨhɨ ra. Tan tsaha̱ ra Jehová ndatu ñihi̱ sehe ña tan tsicoo̱ iin sehe yɨɨ ña.
14 Tan tsa tsito̱ nyɨvɨ tyin cacu̱ sehe yañi ña Noemí, catyí ñi tsihin ña:
―Cahnu xaan cuví ra Jehová tyin cundaahvi̱ iñi ra tsi un tan tsaha̱ ra coo iin sehe yañi un nyehe ndaahvi tsi un, na cahnu cuví ra nuu nyɨvɨ Israel. 15 Lee ihya cua jacusɨɨ iñi un, juvin ra cua jaha cuenda tsi un nda cuanda cúu un. Tyin sehe ña Rut, tsanu un, tsa cuñí xaan tsi un cuví ra, cahnu ca cuví ña ihya tsa cuenda un tan ñavin ca tsa coo utsa sehe un ―catyí ñi tsihin ña Noemí.
16 Tacan tan quihi̱n ña Noemí lee can nyisó ña, tan jacuahnu̱ ña tsi ra. 17 Tan tsa tsitó nyɨvɨ yatyin vehe ña, tyin cacu̱ sehe yañi ña, catyí ñi:
―Cacu̱ iin lee cua cuvi sehe ña Noemí ―catyí ñi.
Tan jacunañi̱ ñi Obed tsi ra, ta juvin ra Obed ihya cuví jutu ra Isaí, ra cuvi̱ jutu ra David.
Nyɨvɨ ra David tsa tsicoo̱ tsa ndi cuamñi ca coo ra
18 Ra ihya naha ra cuví tata ra Fares: Ra Fares cuvi̱ jutu ra Hezrón, 19 tan ra Hezrón cuvi̱ jutu ra Ram, tan ra Ram cuvi̱ jutu ra Aminadab, 20 tan ra Aminadab cuvi̱ jutu ra Naasón, tan ra Naasón cuvi̱ jutu ra Salmón, 21 tan ra Salmón cuvi̱ jutu ra Booz, tan ra Booz cuvi̱ jutu ra Obed, 22 tan ra Obed cuvi̱ jutu ra Isaí, tan ra Isaí cuvi̱ jutu ra David.