Génesis 1

Libru tsahá cuenda nácaa quitsaha̱ iyó tandɨhɨ maa

Cuhva quituvi̱ ñuhu ñayɨvɨ tan andɨvɨ

Tahan tsanaha nda nu quitsaha̱ quituví tsa iyó, intuhun ñi Nyoo iyó. Tacan tan javaha̱ ra andɨvɨ tan ñuhu ñayɨvɨ. 2 Tan ñuhu ñayɨvɨ can nduve cuhva iyó tsi, nda maa ndutya ñi tsitu̱ nuu tsi tan nduve tsa nditsin iyó. Tan tatyi Nyoo nyií tsi candá tsi nu ndutya.

3 Tan catyí Nyoo: "¡Na coo tsa nditsin!"

Tan ndunditsi̱n. 4 Tan nyehe̱ ra tyin vaha tsa nditsin can. Tan jasɨɨ̱n ra tsa nditsin can tan tsa naa can. 5 Tan "tsinu cahñi" jacunañi̱ ra tsa nditsin can tan "tsacuaa" jacunañi̱ ra tsa naa can. Tyiñu can javaha̱ ra quɨvɨ jihna.

6 Yaha can catyí nyico ra: "Na coo iin nu ndoo nuña tsa cua jasɨɨn ndutya tyin tacan tan cuvi ndusɨɨn juhva tsi."

Tan tacan cuvi̱.

7-8 Sava ndutya can ndoo̱ ityi tsaha tan inga sava ndutya can cuahan ityi sɨquɨ tan nu ndoo̱ nuña can jacunañi̱ ra "andɨvɨ". Tyiñu can javaha̱ ra tsinu uvi quɨvɨ.

9 Tan inga quɨvɨ can catyí ra: "Na ndu iin ndutya tsa ndoo̱ ityi tsaha iin ña nu cua ndu iin tsi tan na coo nu ityi", catyí ra.

Tan tacan cuvi̱. 10 Nu ndu ii̱n ndutya cuaha can jacunañi̱ ra "ndutya ñuhu", tan nu ndoo̱ ityi can jacunañi̱ ra "ñuhu ityi".

Nyehe̱ ra tyin vaha tacan. 11-12 Tan catyí nyico ra: "Na cana tandɨhɨ nuu cuhu tan tandɨhɨ nuu yutun cuhva sɨɨn sɨɨn tsɨtɨ nu ñuhu ñayɨvɨ."

Tan tacan cuvi̱. Cana̱ tandɨhɨ maa nu cuhu tan yutun. Tan nyehe̱ ra tyin vaha tandɨhɨ tsa javaha̱ ra. 13 Tyiñu can javaha̱ ra tsinu uñi quɨvɨ.

14-15 Tacan tan catyí ra: "Na coo ñuhu̱ ityi sɨquɨ tan jandunditsin can andɨvɨ tan nu ñuhu ñayɨvɨ tan jasɨɨn can tsa tsinu cahñi tsihin tsacuaa tan cua coto yo quɨvɨ, tyembu tan cuiya", catyí ra.

Tan tacan cuvi̱. 16 Javaha̱ ra ñicanyii tan yoo cua jandunditsin. Ñicanyii cua jandunditsin tsinu cahñi, tan yoo cua jandunditsin tsacuaa, tan javaha̱ ndɨhɨ ra tiñuu. 17 Tan tyacu̱ ra itsi ityi sɨquɨ andɨvɨ tyin jandunditsin tsi sɨquɨ ñuhu ñayɨvɨ 18 tsinu cahñi tan tsacuaa. Tan jasɨɨ̱n ra tsa nditsin can tan tsa naa. Tan nyehe̱ ra tyin vaha tacan. 19 Tyiñu can javaha̱ ra tsinu cumi quɨvɨ.

20 Tan inga quɨvɨ can catyí ra: "Na quituvi tandɨhɨ maa nuu quɨtɨ tsitsi ndutya ñuhu, tan co̱o ndɨhɨ quɨtɨ cua ndava."

Tan tacan cuvi̱. 21 Javaha̱ ra quɨtɨ nahnu tan tsihin tandɨhɨ nuu quɨtɨ tsa tsicá intɨhvɨ ña tsitsi ndutya tan tsihin quɨtɨ ndavá.

Tan nyehe̱ ra tyin vaha tsa javaha̱ ra. 22 Tacan tan nasoco̱ ra tsi tɨ naha tɨ, tan catyí ra: "Cu̱ña ndo, na nducuaha sehe ndo tsitsi ndutya ñuhu, tan tahan tucu ñi quɨtɨ ndavá sɨquɨ nu ñuhu ñayɨvɨ", catyí ra.

23 Tyiñu can javaha̱ ra tsinu uhun quɨvɨ.

24 Tan inga quɨvɨ can catyí ra: "Na coo tandɨhɨ nuu quɨtɨ nu ñuhu ñayɨvɨ: quɨtɨ cuví tata, tandɨhɨ quɨtɨ tsicá tsihin tsitsi, tan tandɨhɨ quɨtɨ cuuhu."

Tan tacan cuvi̱. 25 Javaha̱ ra tandɨhɨ nuu quɨtɨ ihya. Tan nyehe̱ ra tyin vaha tacan.

26 Tacan tan catyí ra: "Vityin ihya cua javaha yo iin nyɨvɨ*f1 tan cua javaha yo itsi tumaa caá maa yo. Tan cua quɨhɨ ndaha nyɨvɨ ihya ñuhu ñayɨvɨ tsihin tandɨhɨ maa tsa iyó nuu tsi."

27 Tacan cuvi̱, javaha̱ ra nyɨvɨ*f1, rayɨɨ tan ñaha,

tumaa caá maa ra caá ñi jaha̱ ra.

28 Tan nasoco̱ ra tsi ñi, tan catyí ra:

"Co̱o cuaha sehe ndo,

co̱o sehe ndo nɨɨ catsico ñuu ñayɨvɨ.

quɨ̱hɨ ndaha ndo ñuu ñayɨvɨ,

quɨ̱hɨ ndaha ndo quɨtɨ iyó tsitsi ndutya, tan quɨtɨ ndavá,

tsihin tandɨhɨ quɨtɨ tsicá nu ñuhu", catyí ra.

29 Tsa yaha̱ can tan catyí nyico ra tsihin ñi: "Ji̱hna ndo, tsahá yu tandɨhɨ yutun tsahá tsɨtɨ tsi ndo: yutun tsahá yucu vixi tan iyó tsɨtɨ cu, tandɨhɨ tsehe cuví catsi ndo. 30 Tan tandɨhɨ quɨtɨ iyó nu ñuhu ñayɨvɨ: quɨtɨ cuuhu can, quɨtɨ ndavá can, quɨtɨ tsicá tsihin tsitsi can, tsahá yu tandɨhɨ cuhu cuii catsi tɨ naha tɨ", catyí ra.

Tan tacan cuvi̱. 31 Tan nyehe̱ ra tyin tandɨhɨ maa tsa javaha̱ ra yaha xaan vaha tsi, tan tsihin tyiñu ican ndu ii̱n tsa iñu quɨvɨ jatyiñu̱ ra.