Tutu ihya tsahá cuenda tsi nacaa cundaahvi̱ iñi Nyoo tsi ña Rut
Nu cuahan ra Elimelec ñuhu Moab tsihin nyɨvɨ ra
1
Tahan tsanaha quɨvɨ tsa nduve rey iyó yɨhɨ́ ndaha tsi nyɨvɨ Israel, ra nacatsí maa Nyoo yɨhɨ́ ndaha tsi ñi. Quɨvɨ can tsicoo̱ tama nɨɨ cahnu nu ñuhu nu iyó ñi. Tan iin ra ñuu Belén cuenda Judá quita̱ ra ñuu can tsihin ñasɨɨhɨ ra tan nduvi sehe ñi, tan cuahan ñi cua coo ñi ñuhu Moab. 2 Tan ndoo̱ ñi tsicoo̱ ñi nu ñuhu Moab can. Rayɨɨ can nañí ra Elimelec, tan ñasɨɨhɨ ra nañí Noemí. Iin sehe ñi nañí Mahlón tan inga ra nañí Quelión. Nyɨvɨ tata ra Efrata cuví tsi ñi.3 Tan tsihi̱ ra Elimelec, tan ndoo̱ ndaahvi ña Noemí tsihin nduvi taahán sehe ñi. 4 Yaha̱ can tan tindaha̱ ra naha tsihin ñaha ñuu can, iin ra tindaha̱ tsihin ña Orfa tan inga ra tindaha̱ tsihin ña Rut. Tan tsicoo̱ ñi ican tumaa utsi cuiya. 5 Tan tsihi̱ ndɨhɨ nduvi sehe ña Noemí, tan nandoo̱ ndaahvi ña, tyin nduve ca yɨɨ ña tan sehe ña.
6-7 Tan tsa tsito̱ ña Noemí tyin cundaahvi̱ iñi ra Jehová tsi nyɨvɨ ñuu ña, tan tsindɨhɨ̱ tama jaha̱ ra, tyaa̱ ña cuhva tsa cua cunuhun nyico ña. Tacan tan quihi̱n ña ityi cuahan ña tsihin nduvi tsanu ña. 8 Maa tyin ityi cuahan ñi, nacaha̱n ña Noemí tsihin nduvi tsanu ña tan catyí ña:
―Cua̱ahan ndo, cuanuhu ndo ñuu ndo nu iyó nyɨvɨ ndo. Tan na cundaahvi iñi ra Jehova̱ tsi ndo tumaa tsa cundaahvi̱ iñi ndo tsi maa yu tsihin sehe yu quɨvɨ tsicoo̱ ra naha. 9 Tan na cuhva ra coo yɨɨ ndo inga tsaha tan coo vaha ndo ―catyí ña tsihin ñi.
―Ña cunuhu ndi, cuñí ndi cuhun ndɨhɨ ndi tsihin un ñuu un ―catyí ñi
11 Maa tyin nacaha̱n ña Noemí tsihin ñi tan catyí ña:
―Cuanuhu ndo, sɨhɨ yu, ¿Náa cuvi tyin cuñí ndo cuhun ndo tsihin yu tan nduve ca sehe yu iyó tan tindaha tsihin ndo?. 12 Cua̱nuhu ndo, sɨhɨ yu, tyin yuhu tsa tsahnu xaan yu, ña cuvi ca coo yɨɨ yu tan ña cuvi ca coo sehe yu tindaha tsihin ndo. Vasu ndi maa tsacuaa vityin cuvi tindaha yu tan cuvi coo sehe yu, 13 ¿a cunyee iñi ndo cuatu ndo nda cuahnu ra naha tan tindaha ndo tsihin ra naha? Ña cuví javaha ndo tacan, sɨhɨ yu. Cahnu tundoho nyehé yuhu tan ñavin ca nyooho, tyin jaña̱ ndaha ra Jehová tsi yu ―catyí ña tsihin ñi.
14 Tan quitsaha̱ nyico ñi tsacú ñi. Tacan tan ña Orfa tyayuhu̱ ña tsi ña Noemí, tsahan cuahan ña, maa tyin ña Rut ña cuñi̱ ña cuhun ña, ndoo̱ ña tsihin ña Noemí. 15 Tan catyí ña Noemí tsihin ña Rut:
―Nye̱he jihna, ña Orfa cuahan ña cuanuhu ña ñuu ña, cuahán ña nu nyacú nyoo ña. Cua̱nyicun ndɨhɨ tsi ña, cua̱nuhu ―catyí ña tsihin ña.
16 Tacan tan nacaha̱n ña Rut tsihin ña Noemí:
―Ña jañiñi un tsi yu tsa nacoo yu tsi un, tyin nu cuhun un cua cuhun ndɨhɨ yu, tan nu cua coo un coo ndɨhɨ yu. Ñuu un cua cuvi ñuu yu. Tan Nyoo un cua cuvi Nyoo yu. 17 Nu cua cúu un cúu yu, tan ican cua quɨhvɨ ñuhu yu. Tatun ña javaha yu cuhva caahán yu ihya, na tatsi tuñi maa Nyoo tsi yu. Ña cua nacoo maa yu tsi un, nda cúu yu o cúu un tan cua nacoo ihñi tahan yo ―catyí ña Rut.
18 Nyehe̱ ña Noemí tyin nditsa tsa caahán ña Rut tyin cuñí ña cuhun ña tsihin ña, ña jañiñi̱ ca ña tsi ña. 19 Tacan tan cuahan nduvi taahán ñi, tan tsaa̱ ñi nda ñuu Belén. Tan tsa nyehe̱ nyɨvɨ ñuu can tsi ñi, quitsaha̱ caahán iyo ñi, tan catyí ñi:
―¿A ñavin ña Noemí cuvi ña can? ―catyí ñi.
20 Tacan tan tsa tsiñi̱ ña Noemí tsa caahán ñi, catyí ña tsihin ñi:
―Ña cahan ca ndo Noemía tsihin yu, cahan ndo Marab tsihin yu, tyin cahnu xaan tundoho nyehé yu jaha̱ ra Nyoo, ra iyó tandɨhɨ maa tunyee iñi.
21 Quɨvɨ quita̱ ndi cuahan ndi, tandɨhɨ ndi cuahan, maa tyin vityin intuhun ña maa yu vatsi nuhu. ¿Náa cuvi caahán ca ndo Noemí tsihin yu, tan nyehé ndo tyin nyehé xaan yu tundoho tan iyó yu tucuiihya iñi cahnu jaha̱ Nyoo Jehová, ra iyó tandɨhɨ maa tunyee iñi, maa ra nacoo̱ ndaahvi tsi yu.
22 Tacan cuvi̱ tan quita̱ ña Noemí tan ña Rut ñuhu nyɨvɨ Moab. Tsaa̱ nuhu nyico ña Noemí ñuu ña, tan tsaa̱ ña Rut, tsanu ña, tsihin ña. Maa quɨvɨ tsa quitsaha̱ naquihín vaha nyɨvɨ tsɨtɨ cebada tsaa̱ ñi Belén.