Nu cuahan ña Rut cua jaha tyiñu ña tsitsi cuhu ra Booz
2
Tan iyó iin ra cuví nyɨvɨ ña Noemi nañí ra Booz, nyɨvɨ ra Elimelec, yɨɨ ña, cuví tsi ra, cuca xaan ra tan cahnu jahá nyɨvɨ tsi ra. 2 Tan iin quɨvɨ catyí ña Rut tsihin ña Noemi, tyiso ña:
―Mia, ja̱ha tumañi iñi cu̱hva ndatu tsi yu cuhun yu cunducu yu nu jaha tyiñu yu. Cuhun yu cunyehe yu yóo ra cundaahvi iñi tsi yu tan cuhva ra jataca yu yoco cebada tucuatyí jahá ra ―catyí ña.
Tacan tan nacaha̱n ña Noemí tsihin ña, tan catyí ña:
―Vaha maa sɨhɨ yu, cua̱ahan ―catyí ña.
3 Tacan tan cuahan ña Rut, tan tsaa̱ ña tsitsi iin cuhu tan quitsaha̱ jatacá ña yoco cebada tsa tucuatyí jahá musu. Tan cuɨtɨ ñi maa cuhu ra Booz, nyɨvɨ ra Elimelec, cuví cuhu nu tsaa̱ ña. 4 Tan quita̱ ra Booz ñuu Belén tan cuahan ra tsitsi cuhu ra. Tsa tsaa̱ ra nu yucú ra jahá tyiñu naha ra, tsaha̱ ra nacumi tsi ra naha tan catyí ra:
― Ra Jehová nasoco tsi ndo ―catyí ra.
Tan nacaha̱n ra naha:
―Ra Jehová nasoco tucu tsi maa un ―catyí ra naha tsihin ra.
5 Tacan tan tsicá tuhun ra Booz tsi ra tsa cuví ityi nuu tsihin ra tsa jahá tyiñu can naha ra tan catyí ra:
―¿Yóo ña cuví ña tyuvaa ican? ―catyí ra.
6 Tan ra tsa cuví ityi nuu can nacaha̱n ra tan catyí ra:
―Ñaha tyuvaa quee̱ ñuhu Moab cuví ña, tsaa̱ ña tsihin ña Noemí. 7 Tan tsica̱n ndatu ña tsi yu tsa cuhva yu jataca ña yoco cebada tsa tucuatyí jaha ra jaha tyiñu naha ra. Nda tsa tuvi tsa tsaa̱ ña tan jahá tyiñu ña, ñaha ca maa quitatu ña, a ndi vatsi ña cua quitatu ña luxu nu vatɨ ihya ―catyí ra.
8 Tacan tan natuhva̱ ra Booz nu nyaá ña Rut tan catyí ra tsihin ña:
―Jihna xihi, ña cuhun un cu jataca un yoco tsitsi inga cuhu, ña quita tsiyo un, ndo̱o tsihin ñi cuví musu yu ihya. 9 Nye̱he vaha cuhu nu cuhun ñi cua jaha tyiñu ñi, ña ndoo ihñi un, cuanyicun tsi ñi. Tsa tava̱ tyiñu yu tsi musu yu na ña jatyañu ra naha tsi un. Tatun na ityi iñi un, cua coho ndutya yɨhɨ́ tsitsi quɨyɨ tsa tava̱ ra naha ―catyí ra tsihin ña.
10 Tacan tan tsicuɨñɨ̱ tsɨtɨ ña Rut tan tsaqui̱n ña jiñi ña nda nu ñuhu, tyin tyaá yahvi ña tsi ra Booz, tan catyí ña tsihin ra:
―Náa cuvi cundaahví iñi un nyehé un tsi yu tan vaha nyɨvɨ cuví un tsihin yu, tan yuhu, ñaha inga ñuu cuví yu ―catyí ña tsihin ra.
11 Tan nacaha̱n ra Booz tan catyí ra:
―Nditsa, yuhu ñihí tuhun yu tandɨhɨ maa tsa vaha tsa javaha̱ un tsihin ña tyiso un tsa yaha̱ tsihi̱ yɨɨ un, tan catyí tucu nyɨvɨ tyin nacoo̱ un jutu un tan sɨhɨ un tan ñuu nu cacu̱ un, tan tsaa̱ un iyó un tsihin ndi ñuu ihya, vasu ndi maa ña nacotó un tsi ndi. 12 Maa ra Jehová cua tyahvi tsi un tsa cuenda tsa vaha javahá un, maa ra Jehová cuví Nyoo ndi tsa cuví ndi nyɨvɨ Israel cua nasoco tsi un, tyin maa ra nanducú un jacacu tsi un ―catyí ra tsihin ña.
13 Tan nacaha̱n ña tan catyí ña:
―Vasu ndi maa ñavin musu un cuví tsi yu, vaha xaan nyɨvɨ cuví un tsihin yu, vaha ña cuñí yu tsiñí yu tuhun caahán ihya, ―catyí ña.
14 Tacan tan tsa taha̱n tsi cuhva tsa cua catsi ñi, cana̱ ra Booz tsi ña tan catyí ra tsihin ña:
―Naha tyin catsi un tsihin ndi, qui̱hin paan jatyii un tsitsi ndutya iya ihya catsi un ―catyí ra.
Tacan tan cuahan ña Rut tsinyaa̱ ña nu nyacú musu ra, tan tsaha̱ ra tsa catsi ña. Tsatsi̱ ndaha vaha iñi ña tan ndoo̱ ca tsi. 15 Tsa ndɨhɨ̱ tsatsi̱ ña, nduvita̱ ña cuahan nyico ña cua naquihin ña yoco cebada. Tan tava̱ tyiñu ra Booz tsi musu ra tan catyí ra:
―Ña casɨ ndo tsi ña, na naquihin maa ña yoco cebada nu catsahan tsa cuenda nuhñi, ña cuhva ndo tsa cahan nuu tsi ña. 16 Vaha ca, nacoo vaha ndo yoco nuhñi can, na naquihin ña can. Ña cuxaan ndo tsi ña.
17 Tacan tan ndɨhɨ jataca̱ ña yoco cebada can nda cuanda tsa cunaahan. Tan jandava̱ ña yaa yoco can tan yaha oco kilu cuví tsɨtɨ tsi quita̱. 18 Quihi̱n ña itsi tan cuanuhun ña nu nyií ña Noemí, tyiso ña, nda ñuu. Tsa tsaa̱ ña, janaha̱ ña tsa ñihi̱ ña tsi ña, tan tava̱ ndɨhɨ ña tsa ndoo̱ tsatsi̱ ña tan nacuhva̱ cuenda ña can tsi ña. 19 Tacan tan nducu̱ tuhun tyiso ña tsi ña tan catyí ña:
―¿Numaa tahan jataca̱ un yoco cebada? ¿Numaa tahan jaha̱ tyiñu un? Maa ra Jehová nasoco tsi ra tsa cundaahvi̱ iñi tsi un ―catyí ña.
Tacan tan nacatyi̱ tuhun ña tsihin tyiso ña numaa tahan jaha̱ tyiñu ña. Tan catyí ña:
―Sɨvɨ ra jatsií cuhu nu jaha̱ tyiñu yu cuví Booz ―catyí ña.
20 Tan catyí ña Noemí tsihin ña Rut, tsanu ña:
―Maa ra Jehová nasoco tsi ra can. Tyin ra Jehová ña jandɨhɨ́ ra tsa javahá ra tsa vaha tsihin yo tumaa javaha̱ ra tsihin ra yɨɨ yo tsa tsihi̱ naha ra. Ra Booz can, nyɨvɨ yo cuví tsi ra, juvin ra cuví iin ra tsa taahán tsi naquihin ndaahvi tsi yoa ―catyí ña Noemí.
21 Tan nacaha̱n tucu ña Rut tan catyí ña:
―Tyehen caahán ra tsihin yu: "Ndo̱o jaha tyiñu un tsihin musu yu nda cuanda ndɨhɨ naquihin yoco cebada", catyí ra ―catyí ña.
22 Tan catyí ña Noemí tyiso ña tsihin ña:
―¡Náa tsa vaha sɨhɨ yu!, tun tacan caahán ra tsihin un tsa ndoo un jaha tyiñu un tsihin musu ra, vaha ca ndoo un ican tan ñavin ca tsa cuhun un inga tsitsi cuhu tan quita nyɨvɨ cuxaan tsi un ―catyí ña.
23 Tacan cuvi̱, ndoo̱ ña Rut jahá tyiñu ña nda cuanda tsa ndɨhɨ̱ naquihi̱n yoco cebada tan trigu. Tan ña nacoo̱ ña tsi tyiso ña, iyó ñi maa ña tsihin ña.