50
Tacan tan tsinumi̱ nyaa ra José cuñu ñuhu jutu ra tan tsacu̱ ra tan tyaa̱ yuhu ra can. 2 Yaha can, tava̱ tyiñu ra tsi ra tatan naha ra, ra cuví musu nuu ra, na tyihi ra naha balsamo cuñu ñuhu jutu ra na ña tyahyu yatyi cuñu ñuhu can. Tacan javaha̱ ra naha ra. 3 Uvi xico quɨvɨ janduvaha̱ ra cuñu ñuhu can tyihi̱ ra naha balsamo can, tyin tacan quɨvɨ cuñí maa tsi janduvaha ra naha can.Tan uñi xico utsi quɨvɨ tsicoo̱ ra Egipto naha ra tucuiihya iñi tsa cuenda cuñu ñuhu ra Israel. 4 Tsa yaha uñi xico utsi quɨvɨ tan catyí ra José tsihin ra cuví tyiñu nuu ra faraón tyehen:
--Tatun cahnu jahá ndo tsi yu, ja̱ha ndo tumañi iñi ca̱han ndo tsihin ra faraón. 5 Tyin tsa ndi nyito jutu yu tsica̱n ra tsi yu tsa cucutsi yu cuñu ñuhu ra nu ndaa cumisantu nu janduvaha̱ ra nda Canaán, tan yuhu ndoo̱ yu tuhun tsihin ra tyin tacan cua javaha yu, yacan cuenda na cuhva ra faraón ndatu cuhun yu cundaca yu cuñu ñuhu jutu yu nu ndaa can, yaha can tsaha vatsi nyico yu ―catyí ra José tsihin ra naha.
6 Tan catyí ra faraón tsihin ra naha:
--Ca̱tyi ndo tsihin ra José: ꞌCua̱ahan cua cutsi tsi jutu un, ja̱ndaa tsa tsica̱n ra tsi un.ꞌ
7 Ñihi̱ ra José ndatu tan quee̱ ra cuahan ra cua cutsi ra cuñu ñuhu can, tan cuaha xaan nyɨvɨ cuahan tsihin ra, nandɨhɨ ra cuví tyiñu nuu ra faraón, nandɨhɨ ra nyisó tyiñu ñuu Egipto can, 8 nandɨhɨ nyɨvɨ maa ra José, nandɨhɨ yañi ra tsihin nandɨhɨ nyɨvɨ ra naha cuahan, nacoo̱ ñi sehe nyihi ñi tan quɨtɨ jana ñi yuvehe ñi nda Gosén. 9 Tuvi xaan nyɨvɨ cuahan tsihin ra, nyɨvɨ cuahan tsihin careta tan nyɨvɨ yosó cuayu. 10 Tsaa̱ ra naha nu nañí Atad inga tsiyo yutya Jordán, ityi caná ñicanyii. Ndoo̱ ra naha ican iin vitya maa tan jacahnu̱ ra naha cuñu ñuhu can tan tsacu̱ ra naha tsa cuiihya cuñí ra naha.
11 Tsa tsiñi̱ nyɨvɨ Canaán iyó yatyin can tyin iyo xaan tsacú nyɨvɨ nu nañí Atad can tan catyí ñi: "Cahnu xaan tucuiihya iñi iyó ra Egipto naha ra nu quɨhvɨ́ ñuhu ndɨyɨ can." Yacan cuenda jacunañi̱ ra naha ican Abel-mizraim.
12 Tan sehe ndɨyɨ can jandaa̱ ra naha tsihin cuñu ñuhu ra tsa tsica̱n ra tsi ra naha. 13 Tsindaca̱ ra naha cuñu ñuhu ra nda Canaán tan quɨhvɨ̱ ñuhu ra yavi yuu nyaá Macpela tsa canyií ityi caná nicanyii cuenda Mamre, nu ñuhu tsa jata̱ ra Abraham tsi ra Efrón, nyɨvɨ Het, tyin cuvi nu ndaa cumisantu ra naha. 14 Tsa yaha tyihi̱ ra naha cuñu ñuhu can tsitsi yavi yuu, cuanuhu̱ ra José nda Egipto tsihin nandɨhɨ yañi ra tan nyɨvɨ tsaha̱n tsihin ra.
Nu jaha̱ ra José tucahnu iñi tsi yañi ra
15 Tsa yaha tsihi̱ ra Jacob, catyí ra yañi ra José natuhún tahan ra naha: "Vasɨquɨ xaan cuñí ra José tsihin yo, tsa catyi tandɨhɨ tsa ña vaha nacuu̱ yo tsihin ra, cua cahnya yo cuenda jaha ra", catyí ra naha. 16 Tan jacuhu̱n ra naha tsi ra tsicaha̱n tsihin ra José tan catyí ra: "Quɨvɨ tsa ndi nyitó jutu ndo, tava̱ tyiñu ra tsi ra yañi un naha ra na cahan ra naha tsihin un tyehen: 17 ꞌJa̱ha tumañi iñi, ja̱ha tucahnu iñi tsi ra yañi un naha ra tsa cuenda tandɨhɨ tsa ña vaha nacuu̱ ra naha tsihin unꞌ, catyí ra. Yacan cuenda tsicán ra naha tumañi iñi tsi un jaha un tucahnu iñi tsi ra naha tyin musu Nyoo jacahnu̱ jutu ndo cuví ra nahaꞌ", catyí ra tsicaha̱n tsihin ra José.
Tan tsa tsiñi̱ José tsa caahán ra naha quitsaha̱ tsacú ra. 18 Tacan tan tsaa̱ nandɨhɨ yañi ra José tan tsicuɨñɨ̱ tsɨtɨ ra naha nuu ra tan tsaqui̱n ra naha nuu ra naha nda nu ñuhu tan catyí ra naha tsihin ra:
--Nyacú ndi ihya na cuvi ndi musu un.
19 Tan nacaha̱n ra José tsihin ra naha:
--Ña nayuhvi ndo, ñavin Nyoo cuví yuhu. 20 Tsica̱ iñi ndo javaha ndo tsa ña vaha tsihin yu quɨvɨ can, maa tyin sama̱ Nyoo can tan nanduvi̱ can tsa vaha, tyin tacan tan cuvi javaha ra tsa iyo nyehé yo vityin, tan ña cúu nandɨhɨ nyɨvɨ. 21 Yacan cuenda ña nayuhvi ndo; maa yu cua cuhva tsa cua catsi ndo tsihin sehe ndo --catyí ra tsihin ra naha.
Nda tacan tsaha ndu ii̱n iñi ra naha tyin vaha xaan caha̱n ra José tsihin ra naha.
Nu tsihi̱ ra José
22 Ndoo̱ ra José tsihin nandɨhɨ yañi ra iyó ra naha Egipto, tan tsicoo̱ ra cientu utsi cuiya. 23 Cuaha cuiya tsicoo̱ ra, yacan cuenda tsaa̱ nyehe̱ ra nuu sehe sucua ra Efraín tsihin nandɨhɨ sehe ra Maquir, sehe ra Manasés.
24 Tan iin quɨvɨ caha̱n ra José tsihin nandɨhɨ yañi ra: "Tsa nyaá naa quɨvɨ cúu yu, maa tyin maa Nyoo cua jatyinyee tsi ndo tan tava ra tsi ndo ñuu ihya tan cundaca ra tsi ndo nu ñuhu tsa ndoo̱ ra tuhun tsihin ra Abraham, tsihin ra Isaac tan tsihin ra Jacob, jutu yo. 25 Tsa nditsa cuví can caahán yu tsihin ndo, cua quitsi Nyoo cua jatyinyee ra tsi ndo. Quɨvɨ cundaa can, cuñí yu tava ndo cuñu ñuhu yu ñuu ihya cuhun tsihin ndo nu cuhun ndo. ¿A cua javaha ndo tsa caahán yu ihya?", catyí ra. Tan nacaha̱n ra naha tsihin ra: "Cua jandaa maa ndi tsa tsicán un." Tan tacan ndoo̱ ra naha tuhun.
26 Cientu utsi cuiya ra José tan tsihi̱ ra, tyihi̱ ra naha balsamo cuñu ñuhu ra na ña tyahyu yatyi can, yaha can tan tinyii̱ ra naha tsi ra tsitsi tsatun maa ñuu Egipto can.