Nu catyi̱ tuhun ra Jacob nácaa cua cuvi tsihin tsa intuhun intuhun sehe ra cuahan tsi ityi nuu
49
Nacana̱ ra Jacob nandɨhɨ sehe ra tan catyí ra: "Na̱tuhva ndo tan cua catyi tuhun yu tsihin ndo cuhva cua cuvi tsi ndo ityi nuu ca:2 "Na̱tuhva ndo tan cu̱ñi ndo tsa cua cahan yuhu Israel tsihin ndo,
sɨvɨ ihya jacunañi̱ Nyoo tsi yu, tya̱a soho ndo tsa cua cahan yu tsa cuví yu jutu ndo.
3 "Yooho, Rubén, sehe nuu yu cuví un,
cacu̱ un tyembu tsa ndi iyó tunyee iñi tsi yu,
tan sehe jihna tunyee iñi cuñu ñuhu yu cuví un,
nuu cuví un tan nyaá yahvi xaan un.
4 Maa tyin ñavin ca nuu cua cuvi un,
tyin cuví un tumaa yutya ñihi tsinú tan tanɨ xahva jahá can;
tan tsa catyi tsa quixi̱ un nu tsito yu
tan tsicoo̱ un tsihin ña Bilha, ñaha cumí yu,
ndoyo̱ ñuhu tyiñu jaha̱ un.
5 "Yooho Simeón tan yooho Leví, iin ñi yañi ndo,
maa ñi ndaha tyiñu jañicueehé tsi nyɨvɨ tsityiñú ndo.
6 Ña cuñí yu cunyaa yu nu ndu iin ndo,
tyin quɨvɨ tsa xaan cuñí ndo tsahñi̱ ndo nyɨvɨ,
ña ndɨhɨ maa iñi ndo, janducoxo̱ ndo indɨquɨ.
7 Na tahnu ndatu tsa xaan ndo
tyin tun tsa xaan cuñí ndo tumaa nduxaán quɨtɨ ña nduxaán ndo.
Tyicatyihya cua coo tata ndo nu ñuhu Israel nduve ñuhu nu cua coo cuii ndo.
8 "Tan yooho Judá, cua jacahnu ra yañi un naha ra tsi un;
tan cahnu cua jaha ra naha tsi un
tsihin tsa cañi nuu ra naha jiñi ra naha
tyin cua jacanaa un tsi nu xaan iñi tsi un.
9 Yooho Judá, sehe yu,
cuví un tumaa iin sehe ndicaha
tyin tsa ndɨhɨ̱ tsatsí ndicaha luhlu can cuñu quɨtɨ tɨɨ́n tɨ
tsicavá taxin tɨ, tumaa tsicava̱ ndicaha tsahnu,
tan yoñi cana iñi jacanda tsi tɨ.
10 Judá, yoñi cuvi quinyaa cetro*f9 ndahá un,
tan ndi yoñi cuví casɨ tsi un nu cua cundaca ñaha un,
tyin nda quitsi maa ra cua cuvi Rey, ra jatsií cetro can,
tandɨhɨ maa ñuu cua tyaa yahvi tsi ra.
11 Cuaha xaan yoho tsa tsahá uva cua coo tsi un,
nda cua cuvi ña cuhñi un urru jana un tsitsi yoho ican,
tan tsa cuaha vinu vaha coo vehe un
nda cua cuvi ña nacatya un jahma un tsihin vinu can,
tan cuvi ña nacatya un jahma cañi tsinditsí un tsihin nduxi uva can*f10.
12 Tan cuaaha xaan tunuu un cua jaha ndutya vixi uva can;
tan tsa yaha cuaha letsi cua cohon un cuitsin nuhu un cua cuvi*f10.
13 "Ra Zabulón cua coo ra yuhu ndutya ñuhu,
nu cua tsaa cuaha yutun ndoo cua cuvi can
tan nda cuanda ñuu Sidón cua cuvi xahñu ra.
14 "Yooho Isacar cuví un tumaa urru ndacui xaan
tsa tsicavá taxin nu quitatú quɨtɨ jana nyɨvɨ.
15 Nyehé un tyin vaha xaan ñuhu can,
tan vaha can quitatu un,
tsaha̱ un tsi un nyiso un ndaha tyiñu.
Tan nduve náa cahan un quihi̱n un tyiñu cuví un musu ña nyaá yahvi.
16 "Yooho, Dan cua cundaca ñaha un nyɨvɨ ñuu un
tumaa cuhva iyó inga ca ra yañi un naha ra.
17 Cua cuvi un tumaa coo canyií yatyin yuhu ityi,
caán tɨ xusɨyɨ cuayu jana nyɨvɨ
tan janacavá tɨ tsi nyɨvɨ nyií tsata cuayu can.
18 Tan catyí ra Jacob tsihin Nyoo: "¡Jutu Mañi yu ndatú yu tyin jacacu un tsi yu!", catyí ra
19 "Yooho Gad, cuaha xaan jandaru cua cañi tahan tsihin un,
maa tyin cua cunyaa ndaha un tsi ra naha nu jandɨhɨ tsi.
20 "Tan yooho Aser maa ñi maa tsa asɨn cua catsi un yuvehe un,
tsa cua cuhva un catsi nyɨvɨ, cua cuhva un tsa tuhva rey tsatsí cua catsi ñi.
21 "Yooho Neftalí, cuví un tumaa isu nyií nuña
tan tyaquɨ caa sehe tɨ iyó.
22 "Tan yooho José cuví un tumaa iin yutun nyaá yuhu yutya
tan cuaha tsɨtɨ tsahá tun,
tan tandɨhɨ soco tun nditá can tsata ndaca.
23 Nyɨvɨ xaan iñi tsi un tutsí ñi tsi un tsihin nduva
ndɨhɨ ñi tsaha jatyañú ñi tsi un.
24 Maa tyin ¡tyahvi Nyoo tsi Nyoo ra iyó tandɨhɨ tunyee iñi,
ra jacuendá tsi nyɨvɨ Israel, na ña jacanaa tundoho tsi ñi,
tyin ña nɨhɨ ndaha un,
ndahá un nduva un!
25 ¡Maa ra Nyoo jacahnú yu cua jatyinyee tsi un,
ra iyó tandɨhɨ tunyee iñi cua nasoco tsi un!
¡Cua nasoco ra tsi un tsa cuún savi!
¡Cua nasoco ra ndutya caná tsitsi ñuhu, ndohyo tan tandɨhɨ ca maa nu caná ndutya!
¡Cua nasoco ra letsi caxin sehe lee ñi ñaha tan coo cuaha sehe ñi, tacan tucu ñi quɨtɨ!
26 Yaha xaan ca nasoco̱ yu tsi yooho
tan ñavin ca tsa nasoco̱ jutu yu tsi yu.
Cuaha ca tsa vaha tsahá yu tsi un
tan ñavin ca tsa vaha tsahá yucu nahnu tsa iyó ndɨhɨ tyembu.
Iyó maa can tsihin un tyin yooho nacatsi̱ yu tsa nuu nandɨhɨ ra yañi un naha ra.
27 "Yooho Benjamín cuví un tumaa lobo xaan,
tyin lobo can tɨɨ́n tɨ quɨtɨ tsa tuvi cua catsi tɨ,
tan tsa tseñi tsahá tɨ tsa ndoo̱ tsatsi̱ tɨ tsi inga tahan tɨ."
28 Ra ican naha ra cuví tsa utsi uvi sehe ra Jacob, tan yacan cuví tuhun caha̱n ra tsihin ra naha, tan nasoco̱ ra tsi intuhun intuhun ra naha.
Nu ndahva̱ cuñu ñuhu ra Jacob
29 Tan cuvi̱ tsi iin quɨvɨ catyí ra Jacob tsihin sehe ra: "Tun tsa tsihi̱ yu, cuhun ndo cutinyii ndo cuñu ñuhu yu yavi yuu nyaá nu cuvi̱ ñuhu ra Efrón, nyɨvɨ Het, nu quɨhvɨ̱ ñuhu jutu yu naha ra, 30 yavi yuu nyaá Macpela tsa canyií ityi caná nicanyii nyaá yatyin cuenda Mamre nda Canaán, nu ñuhu tsa jata̱ ra Abraham tsi ra Efrón, nyɨvɨ Het, tyin cuvi nu ndaa cumi santu ra naha. 31 Ican quɨhvɨ̱ ñuhu maa ra Abraham tsihin ña Sara, ra Isaac tsihin ña Rebeca, tan ican quɨhvɨ̱ ñuhu ndɨhɨ ña Lea jaha̱ yu. 32 Sehe ra Het xico̱ ñuhu can tan yavi yuu can tsi ra Abraham", catyí ra Jacob tsihin ra naha.
33 Tsa ndɨhɨ̱ tsaha̱ cuenda ra Jacob tsi nandɨhɨ sehe ra, tsicava̱ nyico ra nu tsito ra tan ican quita̱ tsa nyito tsi ra.