Nu nasoco̱ ra Jacob tsi ra Efraín tsihin ra Manasés, sehe ra José
48
Tsa yaha juhva quɨvɨ tsa natuhu̱n ra Jacob tsihin ra José, quihi̱n cuehe tsi ra tacan tan jacoto̱ ra naha tsi ra José tyin cuuhví ra. Tsa tsito̱ ra José tyin nacuhví jutu ra, quihi̱n ra nduvi sehe ra, ra Efraín tan ra Manasés cuahan tsihin ra tsa cua nyehe ra tsi jutu ra. 2 Jacoto̱ ra naha tsi ra Jacob tyin tsaa̱ ra José, sehe ra, vatsí nyehe ra tsi ra, tan tsihin tsa nyee iñi ña ra Jacob nduvita̱ ra tan tsinyaa̱ ra yuhu tsito nu quixí ra. 3 Tan nacaha̱n ra tsihin ra José:--José, ñuhu nu nañí Luz cuenda ñuu Canaán, ican quita̱ Nyoo nuu yu, ra iyó tandɨhɨ tunyee iñi tan nasoco̱ ra tsi yu tsihin tuhun ihya: 4 ꞌJi̱hna Jacob, cuaha xaan tata un cua jaha yu tan cuaha xaan ñuu cua cuvi ra naha, tan cua cuhva cuii yu ñuhu Canaán ihya cua cuvi tsii ra nahaꞌ, catyí ra tsihin yu. 5 Vityin ihya ra Efraín tan ra Manasés sehe un tsa cacu̱ tsa ndi cumañi ca tsaa ndi coo ndi ñuu ihya, sehe yu cuví tsi ra naha tumaa tsa cuví sehe yu tsi ra Rubén tan ra Simeón. 6 Yañi ra naha tsa cua coo ityi nuu ca, ra ican naha ra cua cuvi sehe maa un, maa tyin cua ñihi ndɨhɨ ra naha ñuhu nu cua ñihi ra Efraín tan ra Manasés. 7 Quɨvɨ quita̱ yu ñuu Padan-aram tan cuahan yu Canaán ityi cuahan ndi tsihi̱ ña Raquel sɨhɨ un, tsihi̱ ña tsa ndi cumañi ca tsaa ndi ñuu Efrata tan juvin ñi maa ican quɨhvɨ̱ ñuhu ña jaha̱ yu nu cuví Belén vityin --catyí ra.
8 Tan nanyehe̱ ra nu nyacú sehe ra José tan catyí ra:
--¿Yóo ra cuví ra ihya naha ra?
9 --Sehe yu tsa tsaha̱ Nyoo tsi yu ñuu ihya cuví ra naha --catyí ra José tsihin ra.
--Ja̱tuhva tsi ra naha nu nyaá yu ihya tyin cua nasoco yu tsi ra naha --catyí jutu ra tsihin ra.
10 Tan ña nditsín ca nyehé jutu ra tyin tsa tsahnu xaan ra, yacan cuenda jayatyi̱n ra tsi ra naha nuu jutu ra. Tyaa̱ yuhu ra tsi ra naha tan tsinumi nyaa̱ ra tsi ra naha. 11 Tan catyí ra tsihin ra José:
--Ña tsica̱ maa iñi yu tatun cua nyehe ca yu tsi un, maa tyin tsaha̱ Nyoo ndatu nyehe̱ yu tsi un tan nda cuanda sehe un nyehe̱ yu --catyí ra.
12 Tan jatsiyo̱ ra José nduvi sehe ra nu sɨhɨn jutu ra tan tsaqui̱n ra nuu ra nda nu ñuhu. 13 Yaha can quihi̱n ra tsi ra Efraín tyaa̱ ra ndaha satyin ra Jacob, jutu ra, tan ra Manasés quihi̱n ra tyaa̱ ra ndaha cuaha jutu ra. 14 Tsa tyiso̱ ndaha ra Jacob jiñi ra naha, sama̱ ra ndaha ra, jiñi ra Efraín, ra ndi luhlu can, tyiso̱ ra ndaha cuaha ra, tan jiñi ra Manasés, ra tsitsa, tyiso̱ ra ndaha satyin ra, ndi maa tsa sehe nuu ra José cuví tsi ra Manasés can. 15 Tacan tan nasoco̱ ra tsi ra José tan catyí ra:
"Maa ra Nyoo, ra jacuendá tsi yu,
nda quɨvɨ cacu̱ yu nda cuanda vityin,
ra tsa tyaa̱ yahvi ra Abraham, tsii yu, tan ra Isaac, jutu yu,
16 tan juvin ra cuví ángel jacacú tsi yu nuu tsa ña vaha,
na nasoco ra tsi ra cuatyi ihya naha ra.
Tan tsa cuenda ra ihya naha ra cua nducuhun iñi nyɨvɨ sɨvɨ yu,
sɨvɨ ra Abraham, tsii yu, tan sɨvɨ ra Isaac, jutu yu,
tan na coo cuaha sehe ra naha
tan cuaha xaan nyɨvɨ cua cuvi ra naha nu ñuhu ñayɨvɨ", catyí ra.
17 Nyehe̱ ra José tyin ndaha cuaha jutu ra nyií jiñi ra Efraín, ña taha̱n maa iñi ra; tacan tan quihi̱n ra ndaha cuaha jutu ra cua tinyii ra jiñi ra Manasés. 18 Tan catyí ra tsihin ra:
--Ña vaha yosó ndaha un jiñi ra naha tyaa, ra ihya cuví sehe nuu yu, ti̱nyii ndaha cuaha un jiñi ra.
19 Tan nacaha̱n jutu ra tsihin ra:
--Tsa tsitó maa yu, José, juvin ñi cahnu ñuu cua cuvi ndɨhɨ maa ra Manasés, maa tyin yaha ca cahnu ñuu cua cuvi ra Efraín tan cuaha xaan ñuu cua cuví tata ra tan ñavin ca ra Manasés ihya --catyí ra tan ña javaha̱ ra cuhva caahán ra José.
20 Tan juvin ñi maa quɨvɨ can catyí ra tsihin ra naha:
--Tyehen cua cahan nyɨvɨ Israel tsa cua nasoco ñi tsi inga nyɨvɨ: ꞌNa javaha maa Nyoo tsihin un tumaa javaha̱ ra tsihin ra Efraín tan tsihin ra Manasésꞌ, cua catyi ñi.
Jihna ca sɨvɨ ra Efraín caahán ra tan tsinu uvi caha̱n ra sɨvɨ ra Manasés. 21 Tan catyí ra Jacob tsihin ra José:
--Yuhu tsa cua cúu yu, maa tyin Nyoo nyaá maa ra tsihin ndo tan cua jacunuhu nyico ra tsi ndo nu ñuhu nu tsicoo̱ tsii tsaahnu yo naha ra. 22 Cuaha ca ñuhu tsahá yu tsi un tan ñavin ca tsi ra yañi un naha ra. Tsa cañi̱ tahan yu tsihin nyɨvɨ Amor quinyaa̱ yu ñuhu Siquem tsi ñi tsahá ndɨhɨ yu ñuhu can tsi un --catyí ra tsihin ra José sehe ra.