47
Tacan tan quihi̱n ra José uhun taahán yañi ra cuahan tsihin ra tsa cuahan ra cua cahan ra tsihin ra faraón, tsaa̱ ra tan catyí ra:―Jutu yu tsihin ra yañi yu naha ra tsa tsaa̱ ra naha, yucú ra naha nda Gosén. Tan tsaa̱ ndɨhɨ quɨtɨ jana ra naha tsihin tandɨhɨ tsa iyó tsi ra naha tsihin ra naha. 2 Ihya vatsí taahan ra yañi yu naha ra tsihin yu --catyí ra.
3 Tan tsica̱ tuhun ra faraón tsi ra can naha ra:
--¿Náa tyiñu jahá ndo?
--Mbee ñi jacuendá maa nyuhu ra ndaahvi, tyiñu ihya javaha̱ maa ra ndɨyɨ tsii ndi naha ra. 4 Vatsí ndi vatsí ndoo ndi ñuu ihya tyin ñihi xaan iyó tama nda Canaán tan nduve ca cuhu catsi quɨtɨ jana ndi, yacan cuenda, ja̱ha tumañi iñi cu̱hva ndatu coo ndi nu ñuhu Gosén ―catyí ra naha tsihin ra faraón.
5 Tacan tan catyí ra faraón tsihin ra José:
--Jutu un tan ra yañi un ihya naha ra, vatsí ra naha vatsí ndoo ra naha ñuu ihya tsihin un. 6 Maa un yɨhɨ́ ndaha ñuhu ihya, cu̱hva ñuhu vaha coo ra naha, cu̱hva ñuhu Gosén coo ra naha. Tatun tsitó un tyin iyó ra vaha jatyiñú yucú tsihin ra naha, cu̱hva quɨtɨ jana yu jacuenda ra naha --catyí ra tsihin ra José.
7 Yaha can tsindaca̱ ndɨhɨ ra José tsi ra Jacob, jutu ra, nuu ra faraón tan catyí ra:
--Ra tsahnu ihya cuví jutu yu, Jacob nañí ra --catyí ra.
--Tata, ¿náa java cuiya un?
9 Tan catyí ra Jacob tsihin ra:
--Iyó cientu oco utsi cuiya tsa tsicá yu tsicoo̱ yu tyica tyihya ñi. Juhva ñi cuiya cuví can tan nyehé xaan yu tundoho iyó yu, ñaha ca quita cuiya yu tumaa cuiya tsicoo̱ ra jutu yu naha ra --catyí ra.
10 Yaha can nasoco̱ nyico ra tsi ra faraón tsaha quita̱ ra tsitsi vehe tyiñu can. 11 Tan tsaha̱ ra José ñuhu coo ra tsihin nandɨhɨ sehe ra, tumaa tava̱ tyiñu ra faraón tsi ra, tan tsicoo̱ jutu ra tsihin nandɨhɨ nyɨvɨ ra naha nu cuví ñuhu vaha nañí Ramesés. 12 Tan jatyinyee̱ ra tsi jutu ra tsihin nandɨhɨ maa nyɨvɨ ra tan jacatsi̱ ra tsi ñi najava maa ñi vehe ñi.
13 Nanɨɨ cahnu maa cuenda Egipto tan cuenda Canaán iyó tama, yacan cuenda cuaha nyɨvɨ tsiihí tyin nduve náa catsi ñi. 14 Tandɨhɨ maa xuhun tyahví nyɨvɨ Egipto tan nyɨvɨ Canaán cuenda trigo, naquihi̱n vaha ra José tsitsi vehe tyiñu ra faraón. 15 Quɨvɨ ndɨhɨ̱ xuhun nyɨvɨ Egipto tan nyɨvɨ Canaán, tsaha̱n nandɨhɨ maa ra Egipto naha ra tsicaha̱n ra naha tsihin ra José tan catyí ra naha:
―Cu̱hva juhva trigo tsi ndi, vasu ndi maa nduve ca xuhun tsi ndi tyahvi ndi cuenda trigo can, ña nyehe un cúu ndi jahá soco.
16 Tan nacaha̱n ra José tsihin ra naha:
--Cu̱hva ndo quɨtɨ jana ndo tsi yu tan cuhva yu trigo tsi ndo tsa cuenda tɨ naha tɨ tun nduve ca xuhun ndo.
17 Tacan tan tsaha̱ ra naha cuayu, mbee, indɨquɨ tan urru jana ra naha tsi ra José tan tsaha̱ ra José trigo tsi ra naha nɨɨ maa cuiya can. 18 Tan inga cuiya tsa quɨhvɨ̱ can catyí nyico ra naha tsihin ra:
--Ña cuvi jandavi ñaha ndi tsi un, nduve ca xuhun ndi tan ndi quɨtɨ jana ndi, tyin jana un tsa cuví tɨ naha tɨ. Tun taahán iñi un, na̱quihin ñuhu ndi tan nyuhu na cuvi ndi musu un, yacan ña iyó tsi ndi. 19 Ja̱ta tsi ndi cuvi ndi musu ra faraón tan ja̱ta ndɨhɨ ñuhu ndi, ña nyehe un cúu ndi. Cu̱hva tsa catsi ndi tacan tan ña cúu ndi tan cuvi jatyiñu ndi nu ñuhu can tsa cuenda ra faraón --catyí ra naha tsihin ra.
20 Tacan tan jata̱ ra José ñuhu ra naha cuvi tsii ra faraón, xico̱ maa ra naha ñuhu ra naha tsa catyi tama. Tacan cuví nu jatsii̱ ra faraón nɨɨ cahnu ñuhu Egipto. 21 Tan nandɨhɨ nyɨvɨ ñuu Egipto can cuvi̱ ñi musu jaha̱ ra José. 22 Tan ñuhu tsa ña jata̱ ra José cuví ñuhu ra cuví jutu naha ra, tyin maa ra faraón tsahá trigo catsi ra naha, yacan cuenda ña xico̱ ra can naha ra ñuhu ra naha.
23 Tan catyí ra José tsihin nyɨvɨ ñuu can:
--Tsii ra faraón tsa cuví tsi ndo vityin ihya tahan ñi ñuhu ndo, tyin jata̱ yu tsi ndo cuvi ndo musu ra, ju̱hun ndo trigo ihya tatsi ndo. 24 Maa tyin tatun tsa iyo trigo can, na̱tahvi ndo can uhun cuhva, iin cuhva can cuhva ndo tsi ra faraón tan na ndoo tsa cumi cuhva can tsi ndo catsi ndo tan juvin can cua tatsi ndo --catyí ra.
25 Tan catyí ra naha tsihin ra:
--Yaha xaan vaha iñi un, Tata José, cundaahvi̱ iñi un tsi ndi. ¡Cua cuvi maa ndi musu ra faraón! --catyí ra naha.
26 Tacan tan tyaa̱ ra José iin ley tsa catyí tyin nandɨhɨ nyɨvɨ Egipto taahán tsi tyahvi ñi tsihin trigo tsi ra faraón tumaa tsa caha̱n ra tsihin ra naha nda jihna, tan tacan iyó ley can nda cuanda vityin. Tan ra cuví jutu nuu vehe ñuhu naha ra, nduve náa tyahvi ra naha tyin ña xico̱ ra naha ñuhu ra naha tsi ra faraón.
Nu tsica̱n ra Jacob iin tumañi iñi tsi ra José
27 Nandɨhɨ maa nyɨvɨ ra Jacob ndoo̱ iyó nda Egipto nu ñuhu nañí Gosén, nu jatsii̱ ñi, tan cuaha xaan ñi cuvi̱. 28 Tan cientu uvi xico utsa cuiya tsicoo̱ ra Jacob ñuu ñayɨvɨ, tyin tsahun uvi ca cuiya tsicoo̱ ra Egipto.
29 Tsa tsa tuví iñi ra Jacob tyin tsa yatyin cúu ra, tsicana̱ ra naha tsi ra José jaha̱ ra tan catyí ra tsihin ra José tsa tsaa̱ ra:
--Tatun nditsa un tyin cuñí un javaha un iin tumañi iñi tsi yu, tya̱a ndaha un sɨhɨn yu ihya, tan cahan tsihin yu tyin cua jandaa un tsa cua ndacan yu tsi un, tyin yuhu ña cuñí yu quɨhvɨ ñuhu yu ñuu Egipto ihya. 30 Quɨvɨ cúu yu ja̱ha tumañi iñi cundaca un cuñu ñuhu yu nundaa cumi santu nu quɨhvɨ̱ ñuhu tsii tsaahnu yo naha ra, tyin ña cuñí yu quɨhvɨ ñuhu yu Egipto ihya --catyí ra tsihin ra José.
Tan catyí ra José tsihin ra:
--Vaha maa, tyaa --catyí ra.
31 ―¿A nditsa un, ñi? --catyí ra Jacob jañiñí ra tsi ra José.
--Nditsa yu, tyaa, cua jandaa maa yu tsa caahán un --catyí ra tsihin jutu ra.
Tacan tan nacañi̱ nuu ra jiñi ra jiñi tsito nu quixí ra.