Nu tsaa̱ ra Jacob tsihin nyɨvɨ ra nda Egipto
46
Naquihi̱n ra Jacob tandɨhɨ tsa tsii ra tsaha cuahan ra. Tsa tsaa̱ ra nda Beerseba jamañi̱ ra iin quɨtɨ nuu Nyoo ra, Nyoo jacahnu̱ jutu ra. 2 Tan tsacuaa can cana̱ Nyoo tsi ra tsitsi tsa quixí ra:--Jacob, Jacob.
--Maa yu ihya --catyí ra Jacob.
3 Tan catyí Nyoo tsihin ra:
--Yuhu cuví Nyoo jacahnu̱ ra Isaac, jutu un. Ña nayuhvi un cuhun un Egipto, tyin cahnu ñuu cua jaha yu tsihin tata un ndacan. 4 Maa yu cua cuhun tsihin un, tan juvin ñi maa yu cua tava nyico tsi nyɨvɨ tata un ñuu can, tan quɨvɨ cúu un cua cunyaa ra José tsihin un --catyí Nyoo tsihin ra.
5 Yaha can, jandaa̱ ra naha tsi ra tsitsi careta tsa jacuhu̱n ra faraón cua quihin tsi ra naha, jandaa̱ ra naha nandɨhɨ ñasɨɨhɨ ra naha tan sehe ra naha, tsaha quita̱ ra naha Beerseba can tsihin nandɨhɨ nyɨvɨ ra, 6 tandɨhɨ ndaha tyiñu ra naha, tandɨhɨ quɨtɨ jana ra naha. Tandɨhɨ maa tsa ñihi̱ ra naha Canaán cuahan tsihin ra naha Egipto. 7 Nandɨhɨ sehe ra tsihin nandɨhɨ sehe yañi ra cuahan tsihin ra.
Sɨvɨ nyɨvɨ Israel tsa cuahan Egipto
8 Tandɨhɨ sɨvɨ nyɨvɨ Israel tsa tsaa̱ nda Egipto tsihin ra Jacob cuví tsehe:
Ra Rubén, ra cuví sehe nuu ra, 9 tsihin nandɨhɨ sehe ra Rubén can: ra Hanoc, ra Falú, ra Hezrón tan ra Carmi.
10 Ra Simeón tsihin nandɨhɨ sehe ra: ra Jemuel, ra Jamín, ra Ohad, ra Jaquín, ra Zohar tan ra Saúl sehe ra tsihin ñaha Canaán.
11 Ra Leví tsihin nandɨhɨ sehe ra: ra Gersón, ra Coat tan ra Merari.
12 Ra Judá tsihin nandɨhɨ sehe ra: ra Er, ra Onán, ra Sela, ra Fares tan ra Zara, (maa tyin ra Er tan ra Onán maa nda Canaán tsihi̱ ra can naha ra.) Tan sehe ra Fares cuví ra Hezrón tan ra Hamul.
13 Ra Isacar tsihin nandɨhɨ sehe ra: ra Tola, ra Fúa, ra Job tan ra Simrón.
14 Ra Zabulón tsihin nandɨhɨ sehe ra: ra Sered, ra Elón tan ra Jahleel.
15 Ra ican naha ra cuví sehe ña Lea tsihin sehe yañi ña tsa tsicoo̱ nda Padan-aram, sɨɨn maa ña Dina. Tsa icahnu ñi oco utsi uñi nyɨvɨ cuví tsa nandɨhɨ tata ña Lea, icahnu ñi rayɨɨ tan ñaha.
16 Ra Gad tsihin nandɨhɨ sehe ra: ra Zifión, ra Hagui, ra Ezbón, ra Suni, ra Eri, ra Arodi, tan ra Areli.
17 Ra Aser tsihin nandɨhɨ sehe ra: ra Imna, ra Isúa, ra Isúi, ra Bería, tan ña Sera ñaha cuhva ra naha. Tan sehe ra Bería cuví tsi ra Heber tan ra Malquiel. 18 Ra ican naha ra cuví sehe ña Zilpa tsihin sehe yañi ña, ña cuví musu ña Lea tsa nacuhva̱ jutu ña tsi ña. Tsa icahnu ñi tsahun iin tata ña can.
19 Tan sehe ña Raquel tsihin yɨɨ ña cuví: ra José tan ra Benjamín. 20 Sehe ra José tsihin ña Asenat cuví ra Manasés tan ra Efraín tsa cacu̱ Egipto, tan ña Asenat can, sehe ra Potifera ra cuví jutu ñuu On cuví tsi ña. 21 Tan sehe ra Benjamín cuví ra Bela, ra Bequer, ra Asbel, ra Gera, ra Naamán, ra Ehi, ra Ros, ra Mupim, ra Hupim tan ra Ard. 22 Ra ican naha ra cuví sehe ña Raquel tsihin sehe yañi ña tsihin yɨɨ ña, tsa nandɨhɨ ra naha, utsi cumi nyɨvɨ cuví ra naha.
23 Tan sehe ra Dan cuví ra Husim. 24 Sehe ra Neftalí cuví: ra Jahzeel, ra Guni, ra Jezer tan ra Silem. 25 Ra ican naha ra cuví sehe ña Bilha tsihin sehe yañi ña, ña cuví musu ña Raquel tsa nacuhva̱ jutu ña tsi ña, tsa icahnu ñi utsa nyɨvɨ cuví tata ña Bilha can.
26 Tsa nandɨhɨ nyɨvɨ tsaa̱ tsihin ra Jacob nda Egipto, uñi xico iñu nyɨvɨ cuví ñi, tsa cuví sehe ra tsihin sehe yañi ra, sɨɨn maa nandɨhɨ ca tsanu ra. 27 Tan titaha̱n ndɨhɨ nduvi sehe ra José tsa cacu̱ Egipto tsihin ra naha, tsa nandɨhɨ nyɨvɨ quɨhvɨ̱ tsihin ra Jacob ñuu Egipto can cuví uñi xico utsi nyɨvɨ tsa icahnu ñi.
28 Tsa ndi cumañi ca tsaa ra Jacob nda Gosén, jacuhu̱n ra tsi ra Judá cuacana ra tsi ra José na cuhun ra cunyehe ra tsi jutu ra nda Gosén. Tan tsitsi tsa cuahan ra Judá can, tsaa̱ ra Jacob nu ñuhu Gosén. 29 Tsa tsaa̱ ra Judá nu nyií ra José, catyi̱ tuhun ra tyiñu cuahan ra tsihin ra. Yaha can tava̱ tyiñu ra José na tyiso vaha ra naha careta ra tyin cua cuhun ra cujatahan ra tsi jutu ra, catyí ra tsihin ra naha. Tan tsa tsaa̱ ra naha nda Gosén nyehe̱ ra tsi jutu ra, tsinumi̱ nyaa ra tsi ra tan naha xaan tsacu̱ ra naha. 30 Tacan tan catyí jutu ra tsihin ra:
--Tsa cuví cúu yu vityin, vaha tyin tsa tsito̱ yu tyin nyito un tan nyehe̱ tsihin nuu yu tsi un --catyí ra tsihin ra José.
31 Tan catyí ra José tsihin nandɨhɨ yañi ra tan tsihin nandɨhɨ nyɨvɨ ra naha:
--Cuahan yu cua jacoto yu tsi ra faraón tyin tsa tsaa̱ ndo, tan cua catyi yu tsihin ra: ꞌJutu yu tan nandɨhɨ nyɨvɨ quee̱ tsihin ra nda Canaán vatsí ñi vatsí ndoo ñi ñuu ihya. 32 Ra jacuendá mbee tan indɨquɨ cuví ra naha, tandɨhɨ quɨtɨ jana ra naha tan ndaha tyiñu ra naha vatsí tsihin ra nahaꞌ, cua catyi yu tsihin ra. 33 Tsa cua cana ra tsi ndo tan cua ndacan tuhun ra tsi ndo náa tyiñu javahá ndo, 34 ca̱tyi ndo tsihin ra tyin ra jacuñá mbee cuví ndo, nda yoco maa ndo tan nyehé ndo tyiñu ihya, tumaa tsii tsaahnu yo. Tyin tacan tan cuvi coo ndo nu ñuhu Gosén ihya, tyin ña taahán iñi ra Egipto naha ra coo ra jacuendá mbee naha ra ñuu ra naha --catyí ra tsihin ra naha.