Nu tsito̱ yañi ra José tyin juvin ra cuví ra ndacá ñaha ñuu Egipto
45
Ña ñihi tsa cuu ca cuñí ra José nyaá ra nuu nandɨhɨ ra cuví musu nuu ra, tan nacaha̱n ra tsihin ra naha: "¡Qui̱ta nandɨhɨ ndo nuquehe!", catyí ra.Quita̱ nandɨhɨ ra can naha ra, tan ndoo̱ maa ña ra tsihin nandɨhɨ yañi ra.
2 Quitsaha̱ tsacú tsaa ra, tan nda cuanda ra Egipto naha ra tsiñi̱ tsacú tsaa ra, tan nandɨhɨ maa nyɨvɨ ra faraón tsito̱ tsa tacan cuvi̱. 3 Tan catyí ra José tsihin yañi ra:
--Yuhu cuví ra José. ¿A ndi nyito ca jutu yo?
Tan tsa tsiñi̱ ra naha tsa caahán ra nayuhvi̱ xaan ra naha, ña ñihi maa ra naha tsa cahan ra naha.
4 --Ja̱ha ndo tumañi iñi na̱tuhva ndo nu nyaá yu ihya --catyi ra.
Natuhva̱ ra naha nu nyaá ra tan catyí nyico ra tsihin ra naha:
--Yuhu cuví ra José, yañi ndo, ra tsa xico̱ ndo tsi ra Egipto naha ra. 5 Ña ndasɨ cuñi ndo tan ña xaan cuñi ndo tsa tacan xico̱ ndo tsi yu, cuhva cuñí maa Nyoo cuví tsa tsaa̱ yu ihya, maa ra jaquitsi̱ tsi yu tyin jacacu yu tsi nyɨvɨ. 6 Tsa uvi cuiya iyó tama ñuu ihya tan cumañi uhun cuiya ca tsa nduve maa náa cua coo ndi maa tatsi nyɨvɨ trigo. 7 Maa tyin Nyoo cuñí ra cuatyiñu ra tsi yu yacan cuenda yatyi ca jaquitsi̱ ra tsi yu ñuu ihya tyin tacan tan jacacu ra tsi ndo tan ña cúu ndo jaha tama, tan cuvi coo tata ndo nu ñuhu ñayɨvɨ. Maa Nyoo javaha̱ tsa iyo ihya. 8 Ñavin nyooho jaquitsi̱ tsi yu ihya, maa Nyoo jaquitsi̱ tsi yu, tyaa̱ ra tsi yu cuví yu tumaa jutu ra faraón, yɨhɨ́ ndaha yu tandɨhɨ ndaha tyiñu ra, tan juvin yu cuví ra ndacá ñaha ñuu ihya. 9 Cu̱aquihin ndo tsi jutu yo, ja̱numi ndo, ca̱tyi ndo tsihin ra, catyí ra José yañi ndi tyehen: ꞌTyaa, tsaha̱ Nyoo tsa quɨhɨ ndaha yu nanɨɨ ñuhu Egipto, cuñí yu quitsi un quitsi nyehe un tsi yu, ja̱numi. 10 Tan cua coo ndo nu ñuhu nañí Gosén, ican cua coo un tsihin nandɨhɨ sehe un, tan sehe yañi un tan tsihin quɨtɨ jana un, tan tsihin tandɨhɨ ca maa tsa iyó tsi un, tacan tan yatyin ñi coo un tsihin yu. 11 Cua jacatsi maa yu tsi nandɨhɨ nyɨvɨ un, tan ña cua cumañi tsa cua cumañi tsi ndo. Cumañí uhun cuiya ca tan ndɨhɨ tama ihyaꞌ, ca̱tyi ndo tsihin jutu yo. 12 Tsa ndaa cuví maa ndo tsihin ra Benjamín yañi yu ihya tyin yuhu maa yu quita̱ tuhun ihya. 13 Ca̱han ndo tsihin jutu yo tyin iyó vaha xaan yu ñuu ihya tan juvin yu cuví ra ndacá ñaha ñuu Egipto ihya, ja̱coto ndos tsi ra tandɨhɨ ca maa tsa nyehe̱ ndo. ¡Ja̱numi ndo, cuaquihin ndo tsi jutu yo quitsi ra ñuu ihya! --catyí ra tsihin ra naha.
14 Tan tsinumi̱ nyaa ra tsi ra Benjamín, yañi ra, nduvi ra naha quitsaha̱ tsacú. 15 Tsa yaha tsinumi̱ nyaa ra tsi ra Benjamín, tsinumi̱ nyaa ra tsi nandɨhɨ ca ra yañi ra, tyaa̱ yuhu ra tsi ra naha, tan tsacú ra tsinumi̱ nyaa ra tsi ra naha. Yaha can tan cuvi̱ nacaha̱n ra naha nu caahán ra.
16 Tsa tsito̱ ra faraón tan ra cuví tyiñu nuu ra tyin tsaa̱ yañi ra José, sɨɨ xaan cuñí ra naha. 17 Tan catyí ra faraón tsihin ra José:
--Ca̱han tsihin ra yañi un naha ra na tyaa ra naha xiin quɨtɨ jana ra naha tan na cuhun ra naha Canaán, 18 cuquihin ra naha tsi jutu ndo tsihin nandɨhɨ nyɨvɨ ra naha na quitsi ñi ñuu ihya. Tan maa ñi tsa vaha cua cuhva yu tsi ñi tan maa ñi tsa vaha cua catsi ñi ñuu ihya. 19 Ta̱va tyiñu tsi ra naha tan catyi un: ꞌQui̱hin ndo careta ñuu ihya tan cu̱quihin ndo tsi jutu yo tan nandɨhɨ nyɨvɨ ndo na quitsi ñi. 20 Na ña caca iñi ñi náa iyó tsi ñi vityin ihya tyin tandɨhɨ maa tsa vaha iyó ñuu Egipto ihya tsii maa ñi cua cuvi canꞌ, ca̱tyi un --catyí ra tsihin ra José.
21 Tacan javaha̱ sehe ra Israel, tsaha̱ ra José careta tan tsa catsi ra naha ra ityi cuhun ra naha. 22 Tsaha̱ ra intuhun intuhun jahma tsaa tsi ra naha cunditsi ra naha, maa tyin uhun nditsi jahma tan uñi cientu xuhun cuitsin tsaha̱ ra tsi ra Benjamín. 23 Tan jacuhu̱n ra maa ñi tsa vaha tsi jutu ra: utsi urru nyisó maa ñi tsa vaha iyó ñuu Egipto, tan utsi quɨtɨ sɨɨhɨ nyisó trigo, paan tan tsihin tsa cua catsi ra ityi quitsi ra. 24 Tan catyí ra:
--Cuhun vaha xaan ndo, maa tyin ña cañi tahan ndo ityi cuahan ndo --catyí ra tsihin ra naha.
25 Tacan tan quita̱ ra naha cuahan ra naha nda Canaán, tan tsa tsaa̱ nuhu ra naha yuvehe jutu ra naha, 26 jacoto̱ ra naha tsi ra tan catyí ra naha:
--Tyaa, nyito ra José, juvin ra ndacá ñaha ñuu Egipto ―catyí ra naha.
Tsa tsiñi̱ ra tsa caahán ra naha tyin ndi nyito ra José, cuñi̱ cúu naaha ra tyin ña tsinú iñi ra tsa caahán ra naha. 27 Maa tyin tsa yaha natuhu̱n ra naha tsihin ra tandɨhɨ maa tsa caha̱n ra José tsihin ra naha tan nyehe̱ ra careta tsa jacuhu̱n ra José cua quihin tsi ra, sɨɨ xaan cuñí ra cuvi̱. 28 Tan catyí ra: "¡Nduve ca náa cuñí yu vityin tyin tsito̱ yu tyin nyito ra José, sehe yu! Cuhun yu cunyehe yu tsi ra tsa ndi cumañi ca cúu yu", catyí jutu ra naha.