Copa ra José
44
Tsa ndɨhɨ̱ tsatsi̱ ra naha, tava̱ tyiñu ra José tsi musu ra tan catyí ra:--Ja̱cutu tandɨhɨ tindaa ra ihya naha ra tsihin trigo, nácaa cutahan maa tsitsi tindaa can tan ti̱nyii xuhun ra naha nu tindaa ra naha. 2 Tan nu tindaa ra luhlu yañi ra naha cua tinyii un copa yu tsa tsinu̱ tsihin xuhun cuitsin iin cahnu ñi tsihin xuhun tsa cua cuhva ra cuenda trigo.
Tan tacan javaha̱ musu can. 3 Cunditsin cuii ñi tan jacunuhu̱ ra José tsi ra naha tsihin quɨtɨ jana ra naha. 4 Ña cañi xaan ñi ndi cuahan ra naha tan tava̱ tyiñu ra José tsi musu ra:
--Cua̱ahan cua nyicun tsi ra can naha ra, tsa taha̱n un tsi ra naha, catyi un tsihin ra naha: ꞌ¿Náa cuví javaha̱ ndo tsa ña vaha tsihin ra tsitoho yu tan nduve tsa ña vaha javaha̱ ra tsihin ndo? ¿Náa cuví suhu̱ ndo copa ra? 5 Copa tsa tsihí nducu tsihin ra, tan tsa tavá cuenda ra tsihin. ¡Ña vaha maa javaha̱ ndo!ꞌ, ca̱tyi un tsihin ra naha --catyí ra tsihin musu can.
6 Tacan tan cuahan musu can, tsa taha̱n ra tsi ra can naha ra, caahán ra tsihin ra naha ndɨhɨ maa cuhva tava̱ tyiñu ra José tsi ra. 7 Tan catyí ra can naha ra tsihin ra:
--¿Náa cuví tacan caahán un taa? ¡Ña cana iñi ndi javaha ndi tacan! 8 Ña cuví suhu ndi xuhun cuaan ndi xuhun cuitsin vehe tsitoho un, ñavin ñasuhu cuví ndi, tyin quɨvɨ quitsi̱ jihna ndi quitsi̱ jata̱ ndi trigo, xuhun tsa nañihi̱ ndi tsitsi tindaa ndi naquihi̱n vaha ndi can tan ndaha nyico ndi can nacuhva̱ cuenda ndi tsi un. 9 Tun nañihi un copa can tsitsi tindaa ra yañi yu naha ra, na cúu ra tsa ndahá copa can, tan nandɨhɨ ca maa ndi na cuvi ndi musu ndo ―catyí ra.
10 Tacan tan nacaha̱n musu can tsihin ra naha:
--¡Vaha!, na cundaa cuhva caahán ndo, maa tyin intuhun ñi ra cua nañihi yu copa can nu tindaa cua cuvi musu yu, tan nandɨhɨ ca ndo nduve cuatyi cua cuhun sɨquɨ ndo --catyí ra tsihin ra naha.
11 Iyaha ñi januu̱ ra naha tindaa ra naha nu ñuhu tan intuhun intuhun ra ndatsi̱ ra yuhu tindaa ra. 12 Quitsaha̱ musu can nanducú ra tsitsi tindaa ra naha, quitsaha̱ ra tsihin tindaa ra tsitsa, tan jandɨhɨ̱ ra tsihin tindaa ra Benjamin ra luhlu ca, tan nuu tindaa ra ihya nañihi̱ ra copa can. 13 Tacan tan ndata̱ ra naha jahma ra naha tsa ndasɨ cuñí ra naha tyin nañihi̱ copa can tsitsi tindaa ra Benjamín, yaha can tyaa̱ nyico ra naha xiin quɨtɨ jana ra naha tsaha cuahan nyico ra naha ñuu can. 14 Tan ndi nanyií ra José yuvehe ra tsaha tsaa̱ ra Judá tsihin yañi ra tan tsicuɨñɨ̱ tsɨtɨ ra naha tan tsaqui̱n ra naha nuu ra naha nda nu ñuhu ityi nuu ra. 15 Tan nacaha̱n ra José tsihin ra naha:
--Ña vaha maa javaha̱ ndo. ¿A ña tsitó ndo tyin yuhu vasu ndi maa ña nyehe yu, tsitó yu náa javahá nyɨvɨ?
16 Tan nacaha̱n ra Judá tsihin ra:
--Ña ñihi ndi náa cahan ndi tsihin un, ña cuví catyi ndi tyin nduve cuatyi ndi iyó. Tsitó Nyoo tyin iyó cuatyi ndi, na cuvi ndi musu un tsihin ra tsa nañihi̱ ra naha copa can tsitsi tindaa --catyí ra tsihin ra.
17 Tan nacaha̱n ra José tsihin ra:
--Intuhun ñi ra tsa suhu̱ copa can cua cuvi musu yu, tan nandɨhɨ ca ndo cuanuhu ndo nu nyaá jutu ndo tsihin tsa taxin tyin ña cuvi ndoo nandɨhɨ ndo --catyí ra.
Nu caahán ndaahvi ra Judá tsa cuenda ra Benjamín, yañi ra naha
18 Tacan tan nacaha̱n ra Judá tsihin ra:
--Taa, ña cuxaan un tsi yu, cuñí yu natuhun yu tsihin tsa intuhun ñi maa un, ja̱ha tumañi iñi tya̱a soho tsa cua cahan yu tsihin un tyin vityin ihya maa un cuví tumaa cuví ra faraón. 19 Quɨvɨ quitsi̱ jihna ndi tsica̱ tuhun un tsi ndi tatun iyó jutu ndi, tatun iyó inga yañi ndi, 20 nyuhu catyi̱ ndi tsihin un tyin iyó jutu ndi, tsahnu xaan ra, tan iyó inga yañi luhlu ndi. Tsahnu jutu ndi tsaha tsicoo̱ ra luhlu can, tan cuñí xaan jutu ndi tsi ra, uvi taahan maa ra naha tsa iin ñi sɨhɨ ra, maa tyin yañi tsitsa ra tsihi̱ ra, tan intuhun ña ra luhlu ihya ndoo̱. 21 Tan catyí un tsihin ndi tyin na cuquihin ndi tsi ra luhlu can quitsi tsihin ndi tyin cuñí un nacoto un tsi ra. 22 Tan catyí ndi tyin ña cuvi nacoo ra tsi jutu ndi, tyin tatun nacoo ra tsi jutu ndi, cúu jutu ndi. 23 Maa tyin catyí un tsihin ndi tyin tun ña quitsi ra tsihin ndi ña cua naquihin cuenda ca un tsi ndi.
24 "Quɨvɨ tsaa̱ ndi yuvehe jutu ndi, catyi̱ tuhun ndi tuhun caha̱n un tsihin ndi tsihin ra. 25 Tan catyí ra tsihin ndi: 'Cua̱ahan nyico ndo cua jata ndo juhva ca trigo tsi yo.' 26 Tan catyí ndi tsihin ra: 'Ña cuví cuhun ndi tatun ña cuhun ra Benjamín tsihin ndi, nácaa cua tsaa ndi nuu ra ndacá ñaha can tatun ña cuhun ra tsihin ndi.ꞌ 27 Tan catyí nyico jutu ndi: 'Tsitó vaha maa ndo tyin uvi taahan ñi sehe ñasɨɨhɨ yu tsicoo̱, 28 iin ra nduve ca ra, ndaha cuahan maa ra, ña tan nyehe ca yu tsi ra. Ña yaha maa tyin quɨtɨ tsatsi̱ tsi ra tsicá iñi yu. 29 Tatun quihin ndɨhɨ ndo tsi ra luhlu ihya cuhun tsihin ndo tun náa tahan ra ityi cuhun ndo, tsa catyi ndo cua cúu yu tsihin tucuiihya iñiꞌ, catyí ra tsihin ndi.
30-31 "Tatun nduve ca ra luhlu ihya cua tsaa tsihin ndi nuu jutu ndi, cuiihya xaan cua cuñi ra tan cua cúu ra. Tan tsa catyi ndi cua cúu jutu ndi tsihin tucuiihya iñi, tyin iin xaan cuví ra tsihin ra luhlu ihya. 32 Catyí yu tsihin jutu ndi: ꞌSɨquɨ maa yu nyií cua jacuenda yu tsi ra, tyaa, tatun nduve ca ra tsaa tsihin yu, cua cuvi yu ra iyó cuatyi ityi nuu un nda cuanda cúu yuꞌ, catyí yu tsihin ra. 33 Yacan cuenda cuhva ndatu cunuhu ra luhlu ihya tsihin ra yañi yu naha ra, tan ndoo maa yu cuvi yu musu nuu un tsa cuenda ra. 34 Tyin ña cuvi tsaa yu nu jutu yu tatun nduve ra luhlu ihya cuhun tsihin yu. Ña cuñí yu nyehe yu tsa ña vaha cua tahan jutu ndi --catyí ra tsihin ra ndacá ñaha can.