Nu cuahan ra Benjamín tsihin yañi ra nda Egipto
43
Ñihi xaan iyó tama nɨɨ cahnu maa, 2 tan ndɨhɨ̱ trigo tsa tsijata̱ sehe ra Jacob nda Egipto tsatsi̱ ra naha, tacan tan catyí jutu ra naha tsihin ra:--Cua̱ahan nyico ndo jata ndo juhva ca trigo tsi yo nda Egipto.
3 Tan nacaha̱n ra Judá tsihin ra:
--Tyaa, catsi ñi caha̱n ra ndacá ñaha ñuu can tsihin ndi, tyin tatun ña cuhun ra Benjamin tsihin ndi, vaha ca ña cuhun ndi, catyí ra. 4 Tatun cuhva un ndatu cuhun ra Benjamín tsihin ndi, cuhun ndi jata ndi trigo nda Egipto, 5 tatun ña cuhva un ndatu cuhun ra, vaha ca ña cuhun ndi, tyin catsi ñi caha̱n ra can tyin nduve náa tyiñu cuhun ndi tatun nduve ra cuhun tsihin ndi.
6 Tacan tan catyí jutu ra naha:
--Tan, ¿náa cuenda caahán ndo tsihin ra can tyin iyó inga yañi ndo?, cuaha xaan tsa ña vaha nacuú ndo tsihin yu.
7 Tan nacaha̱n ra naha tsihin ra:
--Tyaa, maa ra can tsicá tuhun xaan tsa cuenda yo, tan tsa cuenda nyɨvɨ yo. Tan catyí ra tsihin ndi: ꞌ¿A ndi nyito ca jutu ndo? ¿A iyó inga yañi ndo?ꞌ Tan catyí ndi: ꞌNdi iyó jutu ndi, iyó inga yañi ndiꞌ, catyí ndi tsihin ra, va tsitó nyuhu tatun cua cahan ra tyin cuhun ndɨhɨ yañi ndi tsihin ndi.
8 Tan catyí ra Judá tsihin ra:
--Tatun ña cuñí un tsa cúu yo jahá tama, cu̱hva ndatu cuhun ra tsihin ndi tan cuhun ndi iyaha ñi, jacuenda maa yu tsi ra. Tacan tan ña cúu yo, ndi yooꞌo ndi nyuhu tan ndi sehe ndi. 9 Tun náa tahan ra sɨquɨ maa yu cunyii cuatyi can nda cuanda cúu yu, maa yu ndaca tuhun un tsa cuenda ra tun nduve ca ra quitsi nuhu tsihin ndi. 10 Tsa uvi uñi tsaha tsaha̱n ndi tun tsa nduve tyin naha xaan nducuee̱ yo natuhún yo.
11 Tan catyí jutu ra tsihin ra:
--Nduve ca náa inga, cua̱ahan ndo. Qui̱hin ndo maa ñi tsa vaha iyó ñuu ihya cundaha ndo cuhun tsihin ndo. Cu̱ndaha ndo juhva balsamo, juhva ndutya ñuñu, juhva ndutya tami, juhva mirra, taahan nuez taahan almendra, tyi̱hi ndo can tsitsi tindaa cuhva ndo tsi ra. 12 Cu̱ndaha ndo xuhun tan cu̱ndaha nyico ndo xuhun tsa nacuhva̱ ra naha tsi ndo. Na̱cuhva tsihin ndaha ndo xuhun can tsi ra naha, vasɨquɨ naa̱ iñi ra naha yacan cuenda tyihi̱ ra naha xuhun can tsitsi tindaa ndo. 13 Qui̱hin ndo tsi ra Benjamín, yañi ndo, tan cua̱ahan nyico ndo cua nyehe ndo tsi ra can. 14 Tan maa Nyoo, ra iyó tandɨhɨ tunyee iñi cua jaha tsa cundaahvi iñi ra can tsi ndo tan nacoo nuña ra tsi ra Simeón, tan na ña ndoo ndɨhɨ ra Benjamín. Tatun cuhva cuñí maa Nyoo cuví tyin tandɨhɨ sehe yu cua cuhun tan ndoo intuhun ña maa yu, na cuví maa tsi tacan ―catyí ra tsihin ra naha.
15 Tacan tan quihi̱n ra naha xuhun tan ndaha tyiñu cua cuhva maa ra naha tsi ra ndacá ñaha can, quihi̱n ra naha tsi ra Benjamín tsaha cuahan ra naha nda Egipto.
Tsa tsaa̱ ra naha nuu ra ndacá ñaha can, 16 nyehe̱ ra can tsaa̱ ra Benjamín tsihin ra naha, tan catyí ra tsihin musu cuví nuu yuvehe ra:
--Cua ndaca tsi ra ihya naha ra yuvehe yu, ca̱hñi intuhun indɨquɨ tan ja̱tyihyo un tsi tɨ, tyin tsihin yu cua cusama ra naha --catyí ra tsihin musu ra.
17 Tan tacan javaha̱ musu can, quihi̱n ra tsi ra naha cuahan tsihin ra yuvehe ra José. 18 Tan nayuhvi̱ ra naha tyin yuvehe ra José cuandacá musu can tsi ra naha, tan catyí iin ra tan inga ra:
--Tsa catyi xuhun tsa nacuhva ra naha tsi yo quɨvɨ quitsi̱ jihna yo yacan cuenda vatsí yo ihya, caahán maa ra can tsa cua cusama yo tsihin ra, cua cañi tahan ra naha tsihin yo tan cua tyaa ra naha cuatyi tsi yo tan cua cuvi yo musu ra naha icahnu ñi tsihin urru jana yo ―catyí ra naha.
19 Tsaa̱ ra naha yuvehe can, natuhva̱ ra naha nu nyaá musu cuví nuu yuvehe ra José tan catyí ra naha tsihin ra:
20 --Tata, tsa quitsi̱ jihna ndi quitsi̱ jata̱ ndi trigo ñuu ihya, 21 nañihi̱ ndi tandɨhɨ cuɨtɨ maa xuhun tsa jata̱ intuhun intuhun ndi trigo nu tindaa ndi nu tsicuɨñɨ̱ ndi cua cusu ndi ityi cuahan ndi, yacan cuenda ndahá ndi xuhun can cua nacuhva cuenda ndi tsi ndo, 22 tyin ña tsitó ndi yóo tinyii̱ xuhun can nuu tindaa ndi, maa tyin ndahá sɨɨn maa ndi xuhun cua jata ndi trigo vityin --catyí ra naha tsihin musu can.
23 Tan catyí musu can tsihin ra naha:
--Ña caca iñi ndo, ña nayuhvi ndo. Vasɨquɨ maa nyoo ndo tinyii̱ xuhun can tsitsi tindaa ndo, tyin yuhu naquihi̱n yu xuhun tyahvi̱ ndo cuenda trigo can --catyí ra.
Tan tsaha̱n ra tsitava̱ ra tsi ra Simeón, yañi ra naha, vehe caa tan tsindaca̱ ra tsi ra nu nyacú ra naha. 24 Tan catyí ra:
―Ya̱ha ndo tsitsi vehe --catyí ra.
Tan tsaha̱ ra ndutya tyin nacatya ra naha tsaha ra naha, tan tsaha̱ ndɨhɨ ra tsa catsi urru jana ra naha. 25 Tan tava̱ ra naha ra tsa cua cuhva maa ra naha tsi ra ndacá ñaha can, ndatú ra naha tsi ra nda tsaa maa ra tyin tsitó ra naha tyin ican cua cusama ra naha tsihin ra.
26 Tan cuhva tsa tsaa̱ ra José, tsaha̱ ra naha tsa quee̱ tsihin ra naha ñuu ra naha tsi ra: Balsamo, ndutya ñuñu, ndutya tami, mirra, nuez, almendra, tan tsaqui̱n ra naha nuu ra naha nda nu ñuhu. 27 Tan tsica̱ tuhun ra José tsi ra naha, tan catyí ra:
―¿Iyó vaha ndo, ñi? ¿Nácaa cuñí jutu ndo, ra tsahnu tsa caahán ndo tuhun tsihin yu?, ¿a ndi nyito ra?
28 ―Ndi nyito maa ra, vaha cuñí ra --catyí ra naha tsihin ra tan cañi̱ nuu ra naha jiñi ra naha nuu ra.
29 Nayaha̱ nuu ra nu nyacú ra naha tan nyehe̱ ra tsi ra Benjamín yañi cacu nducu tsihin ra, iin ñi jutu ra naha tan iin ñi sɨhɨ ra naha, tan catyí ra:
--¿A ra ihya cuví yañi luhlu ndo tsa caahán ndo tuhun tsihin yu?
--Juvin ra cuví --catyí ra naha tsihin ra.
Tan catyí ra:
--¡Nyoo nasoco tsi un juti! --catyí ra tsihin ra luhlu can.
30 Sɨɨ xaan cuñí ra nyehe̱ ra tsi yañi ra, tan tsa yaha sɨɨ cuñí ra quitsaha̱ cuñí vacu ra, tan iyaha ñi quɨhvɨ̱ ra tsitsi vehe ra tan quitsaha̱ tsacú ra ican. 31 Tsa ndɨhɨ̱ tsacu̱ ra, nacatya̱ ra nuu ra tsaha quita̱ ra tan catyí ra tsihin musu ra: "Tyi̱hi ndo tsa catsi ndi."
32 Iin mesa tsinyaa̱ maa ra José tan inga mesa tsinyacu̱ nandɨhɨ yañi ra, tan inga mesa tsinyacu̱ ra Egipto naha ra, tyin ña cuví catsi ra naha iin ñi nu mesa tsihin ra hebreo naha ra. 33 Nandɨhɨ maa yañi ra nyacú ra naha cuhva cuiya ra naha yuhu mesa can, ra tsitsa ca tyaa̱ jihna ra, tan nu jandɨhɨ tsi tyaa̱ ra tsi ra luhlu ca, tan iyó xaan cuñí ra naha nyacú ra nyehé nuu tahan ra. 34 Quihi̱n ra José tsa yucú nu mesa ra tsaha̱ ra tsatsi̱ yañi ra, maa tyin cuaha ca tsa tsaha̱ ra tsi ra Benjamín tsa nuu nandɨhɨ ca yañi ra. Tsatsi̱ ra naha tsihi̱ ra naha tan cusɨɨ̱ xaan iñi ra naha tsihin ra José, ra ndacá ñaha ñuu Egipto can.