Génesis 42

Yañi ra José cuahan ra naha Egipto cua nducu ra naha trigo

Tsito̱ ra Jacob tyin nda Egipto iyó trigo, tan catyí ra tsihin sehe ra: "¿Náa nducú ndo nyacú ndo nyehé nuu tahan ndo? 2 Ñihí tuhun yu tyin Egipto iyó cuaha trigo. Cua̱ahan ndo jata ndo trigo catsi yo tyin na ña cúu yo jahá soco", catyí ra tsihin ra naha.

3 Tacan tan quita̱ utsi taahan ra naha cuahan ra naha cua jata ra naha trigo nda Egipto. 4 Maa tyin ña tsaha̱ jutu ra naha cuhun ndɨhɨ ra Benjamín, yañi ra José, tsihin ra naha, coto cuvi tahan ra tundoho, cuñí ra. 5 Tacan cuví nu cuahan ndɨhɨ sehe ra Israel cua jata ra naha trigo tsihin nyɨvɨ cuahan cua jata trigo nda Egipto, tyin nɨɨ cahnu maa cuenda Canaán iyó tama.

6 Maa ra José cuví ra xicó trigo tsi nandɨhɨ nyɨvɨ queé tandɨhɨ ndaha ñuu tan juvin ra cuví ra ndacá ñaha ñuu Egipto can. Tsa tsaa̱ ra yañi ra nu nyaá ra, tsaqui̱n ra naha nuu ra naha nda nu ñuhu. 7 Tan iyaha ñi nacoto̱ ra José tsi ra naha, maa tyin jaha̱ ra tuhun tyin ña nacotó ra tsi ra naha, tan xaan nacaha̱n ra tsihin ra naha tan catyí ra:

--¿Tan nyooho, ndáa ñuu quee̱ ndo?

Tan catyí ra naha:

--Nda ñuu Canaán quee̱ ndi, vatsí jata ndi trigo --catyí ra naha tsihin ra.

8 Maa tyin ña nacoto̱ ra naha tsi ra, tan maa ra nacoto̱ ra tsi ra naha. 9 Tan nducuhu̱n iñi ra tsa nyehe̱ ra ñimaahna tsi ra naha, tan catyí ra:

--Nyɨvɨ vatsí nducu cuhva cuví nyooho, vatsí ndo vatsí nyehe ndo numaa cuvi cañi tahan ndo tan jacanaa ndo --catyí ra tsihin ra naha.

10 --¡Ñavin, taa! Trigo ñi vatsí jata ndi. 11 Ñavin nyɨvɨ caahán un tuhun can cuví ndi, iin ñi jutu nandɨhɨ ndi, ña cana iñi ndi javaha ndi tacan --catyí ra naha tsihin ra.

12 --Ña nditsa ndo, tumaa tsa caahán yu nañi, vatsí ndo vatsí nyehe ndo numaa cuvi jacanaa ndo --catyí ra.

13 Tan nacaha̱n nyico ra naha:

--Utsi uvi taahan maa ndi tsa iin ñi yañi ndi, tan iin ñi jutu ndi tan nda Canaán iyó ndi. Intuhun ra ndoo̱ tsihin jutu ndi, tan inga ra nduve ca ra --catyí ra naha tsihin ra.

14 --¡Tumaa tsa caahán maa yu nañi, nyɨvɨ nducú cuhva cuví nyooho. 15 Maa tyin tsihin tsehe coto yo tatun nditsa ndo tsa caahán ndo. ¡Tsa nditsa maa tyin ña cua quita ndo ihya tatun ña quitsi ra luhlu yañi ndo! 16 Cuñí yu cuquihin intuhun ndo tsi ra, tan nandɨhɨ ca ndo cua ndoo ndo vehe caa. Tacan tan cua coto yu tatun nditsa ndo tsa caahán ndo tyin nyɨvɨ vaha cuví ndo, tan ñavin vatsí nducú cuhva ndo ñuu ndi --catyí ra tsihin ra naha.

17 Tan tyihi̱ ra tsi ra naha vehe caa uñi quɨvɨ. 18 Tsa tsinu uñi quɨvɨ catyí ra tsihin ra naha:

--Yuhu yuuhví yu nyehe yu tsi Nyoo, yacan cuenda, ja̱vaha ndo tsa cua cahan yu tsihin ndo, tan ña cua cahñi yu tsi ndo. 19 Ndo̱o intuhun ndo vehe caa tan na cunuhu nandɨhɨ ca ndo tsihin trigo catsi nyɨvɨ ndo tatun nditsa ndo tyin nyɨvɨ vaha cuví ndo. 20 Maa tyin na quitsi ra luhlu yañi ndo tsihin ndo tan cua coto yu tyin nditsa tsa caha̱n ndo tan ña cua cúu ndo --catyí ra tsihin ra naha.

--Vaha --catyí ra naha. 21 Tan catyí iin ra tan inga ra:

--Yahá yo tundoho ihya vityin tyin ña cundaahvi̱ maa iñi yo nyehe̱ yo tsi ra yañi yo vasu ndi nyehe̱ yo nyehe̱ ra tundoho tan caahán ndaahvi ra tsihin yo, ña vaha maa javaha̱ yo --catyí ra naha.

22 Tan nacaha̱n ra Rubén tsihin ra naha tan catyí ra:

--¿A ñavin tsihin ndo caha̱n yu tyin ña jañicueehe ndo tsi ra luhlu can? maa tyin ña cuvi̱ maa tsi ndo, tan vityin cua cahnya yo cuenda tsa catyi tsa tsihi̱ ra --catyí ra tsihin ra naha.

23 Tan ña tsitó ra naha tsa cutuñí iñi ra José tsa natuhún ra naha, tyin natuhu̱n ra tsihin ra naha tan iyó ra cuu̱ yuhu ra. 24 Ña cunyeé ca iñi ra tsa cuñí ra vacu ra tacan tan cuatsiyo̱ ra nu nyacú ra naha tan tsacu̱ ra, tsa ndɨhɨ̱ tsacu̱ ra, cuahan nyico ra nu nyacú ra naha tan tava̱ tyiñu ra, na cuhñi ra naha tsi ra Simeón. Nyehé ñi ra naha tsahñi̱ ra can naha ra tsi ra Simeón. 25 Yaha can, tava̱ tyiñu ra tsi musu ra tan catyí ra:

--Ja̱cutu ndo tindaa ra naha tsihin trigo, na̱cuhva nyico ndo xuhun ra naha, ti̱nyii ndo can nu tindaa ra naha, cu̱hva ndɨhɨ ndo tsa cua catsi ra naha ityi cuhun ra naha --catyí ra tsihin musu ra.

Tacan javaha̱ ra naha, jacutu̱ ra naha tindaa nandɨhɨ yañi ra José. 26 Tyaa̱ ra can naha ra xiin urru jana ra naha, tsaha cuanuhu̱ ra naha.

27 Tsa tsaa̱ ra naha nu cua cusu ra naha tsacuaa. Ndatsi̱ intuhun ra yuhu tindaa ra cua cuhva ra tsa catsi urru jana ra, tan nyehe̱ ra tyin nyií xuhun ra tsitsi tindaa ra. 28 Tan catyí ra tsihin nandɨhɨ yañi ra:

--Ji̱hna ndo, xin, nacuhva̱ nyico ra naha xuhun yu, va xuhun can nyií tsitsi tindaa ihya --catyí ra.

Yaha xaan nayuhvi̱ ra naha tan catyí iin ra tan inga ra:

--¿Náa cuví javaha̱ Nyoo tyehen tsihin yo? --catyí ra naha.

29 Tan quɨvɨ tsaa̱ ra naha nda Canaán, catyi̱ tuhun ra naha tsihin jutu ra naha tandɨhɨ maa tsa cuvi̱ tsi ra naha nu tsaha̱n ra naha, tan catyí ra naha:

30 --Ra ndacá ñaha ñuu nu tsaha̱n ndi xaan xaan caha̱n ra tsihin ndi, tan tyaa̱ ra cuatyi tsi ndi tan catyí ra: ꞌNyɨvɨ nducú cuhva ñuu ndi cuví nyoohoꞌ, catyí ra tsihin ndi. 31 Maa tyin nyuhu catyí ndi tsihin ra tyin nyɨvɨ vaha cuví ndi tan ñavin nyɨvɨ caahán ra tuhun can cuví ndi. 32 Caahán ndi tyin utsi uvi taahan ndi tsa cuví yañi ndi, iin ra nduve ca ra nyií tsihin yo, tan ra ndi luhlu ca ndoo̱ ra tsihin un ñuu ihya, catyí ndi. 33 Tacan tan nacaha̱n ra: 'Tatun nditsa ndo tyin nyɨvɨ vaha cuví ndo, tsihin tsehe cua coto yu tatun nditsa ndo. Cua nacoo ndo iin yañi ndo tsihin yu, tan cua̱ahan ndo cua ndaca ndo juhva trigo catsi nyɨvɨ ndo, 34 maa tyin, cuñí yu quitsi ra luhlu yañi ndo tsihin ndo. Tacan tan cua ndu iin iñi yu tyin nyɨvɨ vaha cuví ndo, tan cua quita nuña yañi ndo nyií vehe caa, tan nuña cua jata ndo tsa iyó ñuu ihyaꞌ, catyí ra tsihin ndi ―catyí ra naha.

35 Yaha can tsaha ndatsi̱ ra naha yuhu tindaa ra naha tan nañihi̱ ra naha xuhun tsa tyahvi̱ ra naha cuenda trigo, tsa nyehe̱ ra naha can nayuhvi̱ xaan ra naha tan nayuhvi̱ xaan ndɨhɨ tucu jutu ra naha. 36 Tan catyí jutu ra naha:

--Sehe yuhu jandɨhɨ nyooho, ra José nduve ca ra nyií tsihin yo, ndi ra Simeón, tan vityin ihya cuñí ndɨhɨ ndo quihin ndo tsi ra Benjamín. Tsihin tsehe cua cahñi nyooho tsi yu --catyí ra tsihin ra naha.

37 Tan nacaha̱n ra Rubén tsihin ra:

--Sɨquɨ maa yu cunyii cua jacuenda yu tsi ra Benjamín tyaa, cu̱hva ndatu cuhun ra tsihin ndi, tatun ña tsaa ca ra tsihin yu cuví cahñi un nduvi sehe yu --catyí ra tsihin jutu ra.

38 Tan catyí jutu ra tsihin ra:

--Ña cuhun ra Benjamín tsihin ndo Egipto. Ra José, yañi ra, tsihi̱ ra, tan intuhun ña ra ihya ndoo̱. Tun náa tahan ra ityi cuhun ndo, cua cúu yu jaha tucuiihya iñi --catyí ra tsihin ra naha.