2
Ndɨhɨ̱ tsinu̱ ñuhu ñayɨvɨ jaha̱ ra tsihin tsa iyó nuu tsi, tan ndɨhɨ̱ tsinu̱ andɨvɨ tsihin tandɨhɨ tsa iyó nuu tsi jaha̱ ra. 2 Tan quɨvɨ utsa quitatu̱ ra, tyin ndɨhɨ̱ jatyiñu̱ ra. 3 Tacan tan nasoco̱ ra quɨvɨ can, tan cuví tsi iin quɨvɨ cahnu xaan jaha̱ ra tyin quɨvɨ can quitatu̱ ra tsa cuenda tandɨhɨ maa tyiñu javaha̱ ra.4 Tacan cuví cuhva tsinu̱ andɨvɨ tan ñuhu ñayɨvɨ quɨvɨ javaha̱ Nyoo itsi.
Nu yucú nyɨvɨ tsitsi yutun tata
Quɨvɨ javaha̱ ra Nyoo Jehová ñuhu ñayɨvɨ tan andɨvɨ, 5 nduve yutun tan ndi cuhu nu ñuhu ñayɨvɨ can tyin ñaha ca jacuun ra savi tan ñaha ca coo nyɨvɨ jatyiñú nu ñuhu can. 6 Maa tyin nu ñuhu ñayɨvɨ can caná ndutya tsa tyosó nɨɨ cahnu nu ñuhu can. 7 Tacan tan javaha̱ ra iin nyɨvɨ tsihin nyahyu. Tan tɨvɨ̱ ra ixtyin nyɨvɨ can tan naquɨhvɨ̱ tsa nyito tsi nyɨvɨ can, tacan tan cuvi̱ nyɨvɨ can nyɨvɨ nyito.
8 Yaha can, javaha̱ ra iin nu iyó cuaha yutun tata tsa tsahá yucu vixi. Javaha̱ ra can nda Edén ityi nu caná ñicanyii. Tinyii̱ ra tsi nyɨvɨ javaha̱ ra can tsitsi yutun tata can. 9 Tan jacana̱ ra tandɨhɨ maa nuu yutun tyaquɨ tsahá yucu vixi, tan vaha cu catsi yo. Tan mahñu jacana̱ ndɨhɨ ra iin yutun, tan tsɨtɨ yutun ihya tsahá cu ñayɨvɨ nyito, tan jacana̱ ra inga yutun, tan tsɨtɨ yutun can tsahá cu coto yo tsa vaha tan tsa ña vaha.
10 Tan nda Edén canyií iin yutya, ican queé ndutya tyosó nɨɨ cahnu yutun tata can, tan ican natahvi̱ cumi taahan yutya. 11 Intuhun yutya can nañí Pisón; tan yutya ihya tsinú nduvi nda ñuhu nu nañí Havila nu iyó xuhun cuaan. 12 Yaha xaan vaha xuhun cuaan quitá can. Tan iyó ndɨhɨ bedelio (caá can tumaa caá sɨcuɨ yutun, tuhvá can tsinú ndutya tami). Tan iyó ndɨhɨ yuu tyaquɨ nañí ónice. 13 Tan yutya tsinu uvi, nañí Gihón. Tan yutya ihya tsinú nduvi nɨɨ maa nu ñuhu nu nañí Cus. 14 Tan yutya tsinu uñi, nañí Hidekel tan yutya ihya yahá can xiin ñuu Asiria ityi nu caná ñicanyii. Tan Éufrates nañí yutya tsinu cumi.
15 Tan tsitsi yutun tata can tinyii̱ ra Jehová tsi nyɨvɨ can tyin cua jacuenda nyɨvɨ can tan cua jatyiñu nyɨvɨ can nuu tsi. 16 Tan tsaha̱ ra ndatu tsi nyɨvɨ can tan catyí ra: "Cuví catsi un tandɨhɨ yucu vixi tsahá yutun nyacú tsitsi yutun tata ihya, 17 maa tyin tsɨtɨ tsahá tsa coto un tsa vaha tan tsa ña vaha, ña catsi un. Tyin quɨvɨ cua catsi un tsɨtɨ can, tsa nditsa tyin cua cúu un", catyí ra.
18 Yaha can tan catyí nyico ra: "Cua javaha yu inga nyɨvɨ cutahan tsihin nyɨvɨ ihya tyin ña vaha coo maa ñi nyɨvɨ ihya."
19-20 Tsa yaha javaha̱ ra tandɨhɨ maa nuu quɨtɨ tsihin nyahyu, tsindaca̱ ra tsi tɨ naha tɨ tsi nyɨvɨ can tyin nyehe nyɨvɨ can náa cua cunañi tɨ naha tɨ. Nducu̱ nyɨvɨ can sɨvɨ intuhun intuhun quɨtɨ can. Tan ndoo̱ sɨvɨ can nañí tɨ naha tɨ. Maa tyin ña nañihi̱ maa yóo cuvi cutahan tsihin nyɨvɨ can. 21 Tacan tan jacusu̱ Nyoo Jehová tsi nyɨvɨ can, tan tava̱ ra intuhun yɨquɨ naha nyɨvɨ can tsitsi tsa yaha xaan quixí nyɨvɨ can, tan jandaha̱ ra nu tava̱ ra yɨquɨ naha can. 22 Tan tsihin yɨquɨ naha tsa tava̱ ra ican, javaha̱ ra iin ñaha. Tan tsindaca̱ cuenda ra tsi ñaha can tsi nyɨvɨ can. 23 Tacan tan catyí nyɨvɨ can:
"¡Tsihin yɨquɨ yu tan tsihin cuñu ñuhu yu tsinu̱ nyɨvɨ ihya yacan cuenda ꞌñahaꞌ cuví ña, tyin tsihin yɨquɨ naha yuhu rayɨɨ tsinu̱ ña jaha̱ Nyoo!" catyí ra.
24 Yacan cuenda rayɨɨ tan ñaha nanduví ñi iin ña cuñu ñuhu tsa yaha tindaha ñi, tan ña taahán ca tsi coo ñi vehe jutu ñi.
25 Quɨvɨ can, rayɨɨ tan ñaha tandɨɨ ñi, maa tyin ña cahán nuu ñi.