Nu ña tyaa̱ yahvi nyɨvɨ tuhun caha̱n Nyoo
3
Intuhun ñi nu coo tsitó xaan cuhva jandaví ñaha nu, tsa nuu tandɨhɨ ca quɨtɨ javaha̱ Nyoo Jehová, tan catyí nu tsihin ñaha can:--¿Aan, yacan catyí Nyoo tyin ña cuví catsi ndo tsɨtɨ yutun nyacú tsitsi yutun tata ihya? --catyí nu coo can tsihin ña.
2 Tan catyí ñaha can tsihin nu:
--Cuví maa catsí ndi tandɨhɨ ñi tsɨtɨ yutun nyacú ihya, 3 maa tyin tsɨtɨ yutun nyaá mahñu yutun tata ihya, ña cuví catsi ndi tan ndi ña cuví tɨɨn ndi tsɨtɨ tun, tyin tatun cua javaha ndi tacan cua cúu ndi, catyí Nyoo --catyí ña.
4 --Ña nditsa, ña cua cúu ndo --catyí nu--. 5 Tsitó vaha Nyoo tyin tatun cua catsi ndo tsɨtɨ yutun can cua coto ndo tsa vaha tan tsa ña vaha tumaa tsa tsitó maa ra --catyí nu tsihin ña.
6 Nyehe̱ ñaha can tyin vaha tsɨtɨ yutun can, tan sɨɨ caá cu nda cua ña catsiyó ca nuu ña nyehé ña tsi cu tsa yaha cuñí ña catsi ña tsi cu, tan cuñí ña catsi ña tsi cu tyin cuñí ña ñihi ña tsa nyityi. Tan quihi̱n ndɨhɨ ña tsi cu tsaha̱ ña tsi yɨɨ ña tsatsi̱ ra. 7 Tsa ndɨhɨ tsatsi̱ ñi, juvin ñi cuhva can tsitó ñi tyin tandɨɨ ñi. Tacan tan quicu̱ ñi ndaha yutun nañí higuera tan tyasɨ̱ ñi tsi ñi tsihin can.
8 Tan tsiñi̱ ñi cundasún yutun nu vatsí ra Nyoo Jehová tsitsi yutun tata can tsa tseñi. Tan tsinu̱ xeehe ñi nuu ra tyañu yutun tata can. 9 Maa tyin cana̱ ra tsi rayɨɨ can, tan tsica̱ tuhun ra tsi ra:
--¿Numaa nyií un, ñi? --catyí ra.
10 Tan nacaha̱n ra tsihin ra:
--Ihya nyií yu, tsiñí yu tsicá un vatsí un tsitsi yutun tata ihya, yacan cuenda quɨhvɨ̱ xeehe yu, yuuhví yu tsa cua cuxaan un tsi ndi tyin tandɨɨ ndi --catyí ra tsihin Nyoo.
11 Tan tsica̱ tuhun ra tsi ra:
--¿Tan yóo caahán tsihin un tyin tandɨɨ un? ¿A tsatsi̱ un tsɨtɨ yutun tsa catyi̱ yu tyin ña catsi un?
12 Tan nacaha̱n ra:
--Maa ñaha tsa tsaha̱ un cutahan tsihin yu tsaha̱ tsɨtɨ yutun can tsatsi̱ yu --catyí ra.
13 Tacan tan catyí ra Nyoo Jehová tsihin ñaha can:
--¿Náa javaha̱ un? --catyí ra tsihin ña.
Tan catyí ña can:
--Nu coo ihya jandavi̱ ñaha tsi yu, tan tsatsi̱ yu tsɨtɨ yutun can --catyí ña.
14 Yaha can tan catyí ra tsihin nu coo can:
--Tsa cuenda tsa tyehen javaha̱ un, cua cuvi un quɨtɨ tahnu̱ ndatu nuu tandɨhɨ maa nuu quɨtɨ, tan tsihin tsitsi un cua caca un, tan nyahyu ña maa un cua cuvi vityin tan cuahan tsi ityi nuu. 15 Tan xaan iñi ñaha tsi un cua jaha yu tahan ñi tata un tsihin tata ña; cua jañicueehe tata ña jiñi un, tan maa un cua jañicueehe xuu sɨyɨ tata ña.
16 Tan catyí ndɨhɨ ra tsihin ñaha can:
--Quɨvɨ coo sehe un yaha cua nyehe un tundoho cua jaha yu; tan tsihin tsa uhvi cua cacu sehe un. Ndi maa nyehe un tundoho cua cuñi ca un coo un tsihin yɨɨ un, tan cua quɨhɨ ndaha ra tsi un.
17 Tan nacaha̱n ndɨhɨ ra tsihin rayɨɨ can:
--Tsa cuenda tsa tyaa̱ yahvi un tsa caha̱n ñasɨɨhɨ un, tan tsatsi̱ un tsɨtɨ yutun catyi̱ yu tyin ña catsi un, tsa catyi yacan, tahnu̱ ndatu ñuhu ñayɨvɨ vityin ihya. Tandɨhɨ maa quɨvɨ cua coo un tsihin tundoho cua jatyiñu un tan ñihi un catsi un. 18 Cua cana tandɨhɨ nuu iñu nu ñuhu, tan cua catsi un yucu iyó tsitsi cuhu. 19 Cuaha xaan tundoho cua nyehe un cua jatyiñu un tan ñihi un catsi un, nda cuanda cúu un, tan nanduvi nyico un ñuhu. Tyin tsihin ñuhu tsinu̱ un, ñuhu cuví un, tan ñuhu cua cuvi nyico un --catyí ra tsihin ra can.
20 Tan Eva jacunañi̱ rayɨɨ can tsi ñasɨɨhɨ ra tyin ña ican cua cuvi sɨhɨ nandɨhɨ nyɨvɨ ñuu ñayɨvɨ. 21 Tan javaha̱ ra Nyoo Jehová tsihin ñɨɨ quɨtɨ tsa cua cunditsi ñi. 22 Tan catyí ra: "Vityin, nyɨvɨ cuví ñi tumaa cuví yo, tyin tsitó ñi tsa cuví tsa vaha tan tsa ña vaha. Maa tyin ña cua jocon ndɨhɨ ñi tsɨtɨ yutun tsahá ñayɨvɨ nyito tan catsi ñi tan coo cuii ñi", catyí ra.
23 Yacan cuenda tava̱ ra tsi ñi tsitsi yutun tata canyií nda Edén, tan quitsaha̱ jatyiñu ñi nuu ñuhu jaha̱ ra tan juvin tsihin ñuhu tsinu̱ ñi. 24 Tsa yaha tava̱ tsiyo ra tsi ñi, tyacu̱ ra ángel jacuendá yuhu yutun tata can ityi caná ñicanyii. Tan tyaa̱ ra mityi, tsa maa ñi maa ñuhu̱ cuví, tsitsi ityi cuahan nu nyaá yutun nu queé tsɨtɨ tsa tsahá coo cuii nyɨvɨ. Tan tsicó nduvi mityi can tyin tacan tan ña cuvi yaha nyɨvɨ cuhun ñi nu nyaá yutun can.