Ra Caín tsihin ra Abel
4
Tsicoo̱ rayɨɨ can tsihin ña Eva tan ñihi̱ sehe ña, tan quɨvɨ cacu̱ lee sehe ña jacunañi̱ ña Caín itsi. "Cuhva cuñí maa ra Jehová cuví ihya, yacan cuenda tsaha̱ ra rayɨɨ luhlu tsi yu", catyí ña.2 Tan tsicoo̱ inga sehe ña tan jacunañi̱ ña Abel tsi lee can. Tsa tsahnu ra Abel jacuendá ra mbee, tan ra Caín yañi ra, ra jatyiñú tsitsi cuhu cuví ra.
3 Iin quɨvɨ quihi̱n ra Caín juhva tsɨtɨ yutun nuu jatyiñú ra tan tsijamañi̱ ra can tsi ra Jehová. 4 Tan quihi̱n tucu ra Abel sehe nuu quɨtɨ jana ra, quɨtɨ xaahan vaha tan jamañi̱ ra tsi tɨ naha tɨ nuu ra Jehová. Tan taha̱n iñi ra Jehová nyehe̱ ra tsi ra Abel tsihin tsa jamañi̱ ra. 5 Maa tyin ña taha̱n iñi ra nyehe̱ ra tsi ra Caín tsihin tsa jamañi̱ ra, tan tsa catyi yacan, xaan xaan cuñí ra Caín tan xaan nyehé ra. 6 Tacan tan catyí ra Jehová tsihin ra: "¿Náa cuenda yaha xaan xaan cuñí un tan xaan nyehé un, Caín? 7 Tsitó un tyin cuví jacanaa cuatyi tsi un tun javahá un tsa ña vaha, tyin nu ican nducú nu jacanaa nu tsi un, maatyin ña cuhva un tsi un tsi nu. Ja̱canaa tsi nu tsihin tsa javaha un tsa vaha", catyí ra Jehová tsihin ra.
8 Tan cuvi̱ tsi tsa cana̱ ra Caín tsi ra Abel yañi ra cuahan ra naha cuhu.
Tsa tsa yucú ra naha tsitsi cuhu, sana iñi ra Abel cañi̱ ra Caín tsi ra tan tsihi̱ ra. 9 Yaha can, tan tsica̱ tuhun ra Jehová tsi ra Caín:
--¿Caín, náa ra Abel yañi un, ñi?
Tan catyí ra can:
--Ña tsitó yuhu, ña nyaá tyiñu yu jacuendá yu tsi ra can --catyí ra.
10 --¿Náa javaha̱ un, Caín? Nɨñɨ ra yañi un tsa tsatɨ̱, caná tsaa tsi tsicán tsi tsi yu na jandaa yu cuatyi ihya. 11 Tsa catyi tsa tsahñi̱ un tsi yañi un, tahnu̱ ndatu un vityin tan cua quita un nu ñuhu nu tsatɨ̱ nɨñɨ ra. 12 Ndi maa cua jatyiñu un nu ñuhu ña cua quee ca tsɨtɨ tsa cua tatsi un. Tan cua caca tatu maa un nu ñuhu ñayɨvɨ tan ña cua ñihi maa un nu cua quitatu un --catyí ra Jehová tsihin ra.
13 Tan nacaha̱n ra:
--Ñavin cuhva cunyee iñi yuhu cuví cuhva tsa tatsí tuñi un tsi yu. 14 Tavá un tsi yu nu ñuhu ihya, tan ña cua nyehe ca yu tsi un, cua caca ndaahvi maa yu, tan nduve nu cua coo xuvehe yu, tan cuvi quitatu yu. Tan tsa tacan, yóo cuvi ñi maa cua nañihi tsi yu cahñi nahnu tsi yu --catyí ra.
15 Tan catyí ra Jehová tsihin ra:
--Nduve tsa cua cuvi, Caín, tyin tatun ndáa ra cua cahñi tsi un, utsa tsaha cua tatsi tuñi yu tsi ra tan ñavin tumaa tatsi̱ tuñi yu tsi maa un --catyí ra.
Tacan tan tyaa̱ ra Jehová tumaa iin tuñi tsi ra, tyin yóo nyehe ñi maa tsi ra na ña cahñi ra naha tsi ra. 16 Tsa yaha natuhu̱n ra Jehová tsihin ra, quita̱ ra cuahan ra ityi nu caná ñicanyii tan tsicoo̱ ra ityi nu nañí Nod.
Nyɨvɨ tata ra Caín
17 Tsa yaha tsaa̱ ra nu nañí Nod, tsicoo̱ ra tsihin ñasɨɨhɨ ra tan ñihi̱ sehe ña. Tan jacacu̱ ña iin rayɨɨ luhlu tan jacunañi̱ ñi tsi lee can, Enoc. Tan janduvita̱ ra iin ñuu tan jacunañi̱ ra Enoc, ñuu can, juvin ñi cuhva nañí sehe ra. 18 Tan ra Enoc can cuví jutu ra Irad, tan ra Irad can cuví jutu ra Mehujael, tan ra Mehujael can cuví jutu ra Metusael, tan ra Metusael can cuví jutu ra Lamec. 19 Tan ra Lamec can tindaha̱ ra tsihin uvi taahan ñaha, intuhun ña nañí Ada, tan inga ña nañí Zila. 20 Tan ña Ada can cuví sɨhɨ ra Jabal. Tan ra Jabal can tsihin nyɨvɨ tata ra iyó ñi vehe tsinu̱ tsihin ñɨɨ quɨtɨ tan nyɨvɨ jacuñá quɨtɨ tata cuví ñi. 21 Tsicoo̱ inga yañi ra nañí Jubal tan ra Jubal can tsihin tata ra cuví nyɨvɨ javacú arpa tan ra tɨvɨ tiyoo. 22 Tan ña Zila cuví sɨhɨ ra Tubal-caín, tan juvin ra can cuví ra javahá ndaha tyiñu tsihin caa tan tsihin inga caa tsa cuví bronce, tan iyó iin cuhva ra nañí Naama.
23 Cuvi̱ tsi iin quɨvɨ tan catyí ra Lamec tsihin nduvi taahan ñasɨɨhɨ ra:
"Yooho Ada tan yooho Zila, tya̱soho vaha ndo tsa cua cahan yu tsihin ndo:
Tsahñi̱ yu iin ra tyin maa ra jañicueehe̱ tsi yu,
na catyi yo, iin ra yoco tyin maa ra cañi̱ tsi yu.
24 Tatun cahñi ra naha tsi ra Caín, utsa tsaha cua cahnya ra naha cuenda,
maa tyin tatun cahñi ra naha tsi yuhu, uñi xico tsahun uvi tsaha cua cahnya ra naha cuenda", catyí ra tsihin ñi.
Tsinu uñi sehe ra Adán tsihin ñasɨɨhɨ ra
25 Tsicoo̱ nyico ra Adán tsihin ñasɨɨhɨ ra tan tsicoo̱ inga sehe ña, tan Set jacunañi̱ ña sehe ña, tan catyí ña: "Nyoo tsaha̱ inga sehe yu cuenda ra Abel ra tsa tsahñi̱ ra Caín", catyí ña.
26 Tan ra Set cuví jutu ra Enós. Nda tacan tan quitsaha̱ tsicán tahvi nyɨvɨ tsi Nyoo tsihin sɨvɨ ra "Jehová" tyin sɨvɨ maa ra cuví.