Nyɨvɨ tata ra Adán
5
Ihya cuví sɨvɨ tata ra Adán.Quɨvɨ javaha̱ Nyoo tsi nyɨvɨ, javaha̱ ra tsi ñi tumaa caá maa ra. 2 Rayɨɨ tan ñaha javaha̱ ra tan jacunañi̱ ra tsi ñi "nyɨvɨ*f2". Tan nasoco̱ ra tsi ñi quɨvɨ can.
3 Cientu oco utsi cuiya ra Adán tan tsicoo̱ ra Set sehe ra, tan ndacu̱ xaan ra tsi ra. 4 Tsa yaha cacu̱ ra Set, una cientu ca cuiya tsicoo̱ ra Adán tan tsicoo̱ ca maa sehe ra tsihin ñasɨɨhɨ ra, rayɨɨ tan ñaha. 5 Tan tsicoo̱ ra ɨɨn cientu oco utsi cuiya tan tsihi̱ ra.
6 Cientu uhun cuiya ra Set tan tsicoo̱ ra Enós. 7 Tan tsa yaha cacu̱ ra Enós, una cientu utsa ca cuiya tsicoo̱ ra Set, tan tsicoo̱ ca maa sehe ra, rayɨɨ tan ñaha. 8 Tan ɨɨn cientu utsi uvi cuiya tsicoo̱ ra tan tsihi̱ ra.
9 Cumi xico utsi cuiya ra Enós tan tsicoo̱ ra Cainán. 10 Tan una cientu tsahun ca cuiya tsicoo̱ ra tan tsicoo̱ ca maa sehe ra, rayɨɨ tan ñaha, tsa yaha cacu̱ ra Cainán. 11 Tan ɨɨn cientu uhun cuiya tsicoo̱ ra tan tsihi̱ ra.
12 Uñi xico utsi cuiya ra Cainán tan tsicoo̱ ra Mahalaleel, sehe ra. 13 Tan una cientu uvi xico ca cuiya tsicoo̱ ra tsa yaha cacu̱ ra can, tan tsicoo̱ ca maa sehe ra, rayɨɨ tan ñaha. 14 Tan cuiya tsicoo̱ ra nu ñuhu ñayɨvɨ cuví ɨɨn cientu utsi cuiya tan tsihi̱ ra.
15 Uñi xico uhun cuiya ra Mahalaleel tsaha tsicoo̱ ra Jared, sehe ra. 16 Una cientu oco utsi ca cuiya tsicoo̱ ra tsa yaha cacu̱ ra can, tan tsicoo̱ ca maa sehe ra, rayɨɨ tan ñaha. 17 Tan una cientu cumi xico tsahun cuiya tsicoo̱ ra tan tsihi̱ ra.
18 Cientu uñi xico uvi cuiya ra Jared tsaha tsicoo̱ ra Enoc, sehe ra. 19 Tsa yaha cacu̱ ra can, una cientu ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha. 20 Tan cuiya tsicoo̱ ra nu ñuhu ñayɨvɨ cuví, ɨɨn cientu uñi xico uvi cuiya tan tsihi̱ ra.
21 Uñi xico uhun cuiya ra Enoc tsaha cacu̱ ra Matusalén, sehe ra. 22 Tan tsa yaha cacu̱ ra can, uñi cientu ca cuiya tsicoo̱ ra tan tsicoo̱ ca maa sehe ra, rayɨɨ tan ñaha. Tan cuhva taahán iñi maa Nyoo cuví can tsicoo̱ ra. 23-24 Tan uñi cientu uñi xico uhun cuiya ra tan naa̱ ihñi ra tyin maa Nyoo naquihi̱n tsi ra tyin tsicoo̱ ra cuhva taahán iñi maa Nyoo.
25 Cientu cumi xico utsa cuiya ra Matusalén tsaha tsicoo̱ ra Lamec, sehe ra. 26 Tan tsa yaha tsicoo̱ ra can, utsa cientu cumi xico uvi ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha. 27 Tan ɨɨn cientu uñi xico ɨɨn cuiya tsicoo̱ ra tan tsihi̱ ra.
28-29 Cientu cumi xico uvi cuiya ra Lamec tsaha tsicoo̱ ra Noé, sehe ra, tan catyí ra: "Tsaha̱ Nyoo tsi ra luhlu ihya tyin juvin ra cua jaha tsa ña yaha xaan ca nyehé yo tundoho nu ñuhu ñayɨvɨ tsa tsahnu̱ ndatu ra", catyí ra. 30 Tan tsicoo̱ ra uhun cientu cumi xico tsahun ca cuiya, tsa yaha cacu̱ ra Noé can, tan tsicoo̱ ca maa sehe ra, rayɨɨ tan ñaha. 31 Tan utsa cientu uñi xico tsahun uvi cuiya tsicoo̱ ra tan tsihi̱ ra.
32 Tsa yaha quihi̱n ra Noé uhun cientu cuiya tsicoo̱ uñi taahan sehe yɨɨ ra, ra Sem, ra Cam, tan ra Jafet.