Nu nyehé Nyoo tsa ña vaha javahá nyɨvɨ
6
Quɨvɨ quitsaha̱ nducuaha nyɨvɨ nu ñuhu ñayɨvɨ, tan iyó sehe sɨɨhɨ ñi, 2 nyehe̱ sehe Nyoo tyin tyaquɨ xaan caá sehe sɨɨhɨ nyɨvɨ nu ñuhu ñayɨvɨ, nacatsi̱ ra naha ñaha taahán iñi maa ra naha tan tindaha̱ ra naha tsihin ñi. 3 Tacan tan catyí ra Jehová: "Nyɨvɨ cúu ñi maa cuví nyɨvɨ ihya, ña cua cuhva yu coo cuii ñi, cientu oco ñi cuiya cua coo ñi", catyí ra. 4 Tyembu ndu ii̱n sehe Nyoo tsihin sehe sɨɨhɨ nyɨvɨ ñuu ñayɨvɨ, tan quitsaha̱ tsicoó sehe ñi, nahnu sucun sehe ñi tsicoó, tan ñihi xaan ra naha, nda quɨvɨ can tan iyo cuñí nyɨvɨ tsihin ra naha.5 Tan nyehé ra Jehová tyin yaha xaan cuaha tsa ña vaha javahá nyɨvɨ nu ñuhu ñayɨvɨ tan maa ñi tsa ña vaha tsicá iñi ñi javaha ñi. 6 Tan ndaahvi xaan cuñí ra tan ndu uvi̱ iñi ra tsa javaha̱ ra nyɨvɨ nu ñuhu ñayɨvɨ. 7 Yacan cuenda catyí ra: "Cua janaa yu nyɨvɨ, tan cua janaa yu quɨtɨ, quɨtɨ tata, quɨtɨ cuuhu, quɨtɨ ndavá, quɨtɨ tsicá tsihin tsitsi. Ndu uví iñi yu tsa javaha̱ yu nandɨhɨ maa tsehe", catyí ra.
8 Maa tyin ra Noé ñihi̱ ra tumañi iñi nuu Nyoo.
Nu javaha̱ ra Noé yutun ndoo
9 Ihya cuví cuhva tsicoo̱ ra Noé can.
Cuvi̱ ra iin rayɨɨ vaha, ndɨhɨ maa tsaha tyaá yahvi ra tsi Nyoo. Intuhun ñi ra tsicoo̱ cuhva cuñí Nyoo, tsa nuu nandɨhɨ nyɨvɨ ñuu ra. 10 Tan sehe ra cuví tsi ra Sem, ra Cam tsihin ra Jafet.
11 Tsitu̱ nu ñuhu ñayɨvɨ tsihin nyɨvɨ javahá tsa ña vaha tan cuaha tsa ña vaha javahá ñi nuu Nyoo. 12 Tan nyehé Nyoo tyin tɨvɨ̱ nyɨvɨ ñuu ñayɨvɨ, tyin nacoo̱ nyɨvɨ can ityi vaha. 13 Tan catyí ra tsihin ra Noé: "Tsa tyaa̱ yu cuhva cua janaa yu tsi nyɨvɨ, tyin cuaha xaan cuatyi ñi. Tsa catyi cuatyi ñi cua janaa yu ñuu ñayɨvɨ. 14 Yacan cuenda ja̱vaha iin yutun ndoo tsihin yutun nañí gofer tan cuaha cuartu can javaha un. Tan ja̱ndutu un tyañu vitu nu ticohó can tsihin tsutsa yɨtɨ, ityi tsitsi tan ityi tsata tyin tacan tan ña cua quɨhvɨ ndutya tsitsi yutun ndoo can. 15 Cuhva ihya cua javaha un yutun ndoo can: Cientu oco tsahun metru tsa cañi yutun ndoo can, tan oco uvi metru sasava tsa ñiihi, tan utsi uñi metru sasava tsa sucun. 16 Uñi toto vehe ityi tsitsi can javaha un. Tan sava metru cua nacoo nuña un nda jucun vehe can. Tan xiin yutun ndoo can cua tyaa un yuhu vehe cahnu. 17 Tyin cua jacuun yu savi xaan, tan cua cutu ndutya nu ñuhu ñayɨvɨ, tan cua cúu tandɨhɨ maa tsa iyó tsa nyito nu ñuhu ñayɨvɨ; tandɨhɨ maa cua janaa yu. 18 Maa tyin cua ndoo yu tuhun tsihin un tyin tandɨhɨ ndo cua quɨhvɨ tsitsi yutun ndoo can: maa un, tsihin ñasɨɨhɨ un, nduñi sehe un tsihin ñasɨɨhɨ ra naha. 19 Tan cua quɨhvɨ ndɨhɨ tandɨhɨ nuu quɨtɨ tsihin un tan ña cua cundɨhɨ nuu tɨ naha tɨ: intuhun quɨtɨ yɨɨ, tan intuhun quɨtɨ sɨɨhɨ tsa intuhun intuhun nuu tɨ naha tɨ: 20 quɨtɨ ndavá, quɨtɨ tata, quɨtɨ cuuhu, quɨtɨ tsicá tsihin tsitsi, cua quɨhvɨ tsihin un tsitsi yutun ndoo can, tyin tacan tan ña cua cúu tɨ naha tɨ. 21 Tan ja̱caya tsa cua catsi un tsihin nyɨvɨ un tan tsihin tsa cua catsi quɨtɨ can naha tɨ, tyin tacan tan ñihi ndo tsa cua catsi ndo", catyí Nyoo tsihin ra Noé.
22 Tan tacan javaha̱ ra Noé; javaha̱ ra tandɨhɨ maa cuhva tava̱ tyiñu Nyoo tsi ra.