Nu cuu̱n savi xaan
7
Tsa yaha ndɨhɨ tsinu̱ yutun ndoo can tan catyí ra Jehová tsihin ra Noé: "Quɨ̱hvɨ tsihin nandɨhɨ nyɨvɨ un tsitsi yutun ndoo can, intuhun ñi yooho iyó cuhva cuñí yu tsa nuu nandɨhɨ ca nyɨvɨ ñuu ñayɨvɨ ihya. 2 Tan tandɨhɨ quɨtɨ cua cuvi catsi ndo na quɨhvɨ utsa quɨtɨ yɨɨ tan utsa quɨtɨ sɨɨhɨ; tan intuhun quɨtɨ yɨɨ tsihin quɨtɨ sɨɨhɨ quɨtɨ ña cua cuvi catsi ndo. 3 Tacan tucu ñi quɨtɨ ndavá na quɨhvɨ utsa quɨtɨ yɨɨ tan utsa quɨtɨ sɨɨhɨ tacan tan ña cua cundɨhɨ nuu tɨ naha tɨ nu ñuhu ñayɨvɨ. 4 Tyin cumañi utsa nduvi ña tan cua jacuun yu savi xaan. Uvi xico quɨvɨ cua cuun savi, nduvi tan ñiñu, tandɨhɨ maa tsa javaha̱ yu tsa iyó tsa nyito itsi tsa cua ndoo̱ ityi tsata yutun ndoo cua janaa yu", catyí Nyoo. 5 Tan tandɨhɨ maa tsa tava̱ tyiñu ra Jehová tsi ra jandaa̱ ra.6 Iyó iñu cientu cuiya ra quɨvɨ quitsaha̱ cuún savi tan tsitu̱ ndutya nu ñuhu ñayɨvɨ. 7 Quɨhvɨ̱ ra tsitsi yutun ndoo can tsihin nyɨvɨ ra, ñasɨɨhɨ ra, sehe ra, tsanu ra tyin tacan tan ña cunaa ñi. 8 Tan quɨhvɨ̱ ndɨhɨ quɨtɨ tsa caha̱n Nyoo tsihin ra tyin cua cacu. 9 Uvi taahan uvi taahan tɨ naha tɨ quɨhvɨ̱ tsitsi yutun ndoo can, quɨtɨ yɨɨ tan quɨtɨ sɨɨhɨ, tumaa tsa tava̱ tyiñu maa Nyoo tsi ra.
10 Taha̱n tsi tsa utsa quɨvɨ can, quitsaha̱ cuún savi tan cuahan tsitú ndutya nu ñuhu ñayɨvɨ. 11 Tyin tyahnya̱ tutyi ndutya ñuhu tsitsi ñuhu tan nuña̱ ndɨhɨ ityi andɨvɨ. Tan nu tsahun uvi tsicá yoo tsinu uvi cuvi̱ can, tan iñu cientu cuiya ra Noé tahan can. 12 Uvi xico quɨvɨ cuu̱n savi xaan nu ñuhu ñayɨvɨ nduvi tan ñiñu. 13 Juvin ñi maa quɨvɨ quitsaha̱ cuún savi can quɨhvɨ̱ ra Noé tsitsi yutun ndoo tsihin ñasɨɨhɨ ra tsihin sehe ra, ra Sem, ra Cam, tan ra Jafet, tan nduñi tsanu ra. 14 Tan tsihin ñi quɨhvɨ̱ tandɨhɨ nuu quɨtɨ cuuhu, quɨtɨ tata, quɨtɨ tsicá tsihin tsitsi tan quɨtɨ ndava. 15 Uvi taahan uvi taahan nuu quɨtɨ can quɨhvɨ̱ tsihin ra tsitsi yutun ndoo can. 16 Quɨhvɨ̱ quɨtɨ yɨɨ tan quɨtɨ sɨɨhɨ tsa intuhun intuhun nuu tɨ naha tɨ, tumaa tsa tava̱ tyiñu maa Nyoo tsi ra. Yaha can tan tyasɨ̱ Nyoo yuhu vehe yutun ndoo can.
17 Uvi xico quɨvɨ cuu̱n savi xaan, yaha xaan tsitu̱ ndutya nu ñuhu ñayɨvɨ tan yutun ndoo nu nyií ra Noé ndoo̱ tsi nyií tsi nu ndutya cuaha can. 18 Tan cuahan tsitú cuaha ca ndutya, tan yutun ndoo can nyií maa tsi nu ndutya can. 19 Tan cunyee̱ ndutya cuaha can yaha̱ tsi jiñi yucu sucun nyacú nu ñuhu ñayɨvɨ. 20 Ña yacan ñi, utsa metru ca yaha̱ ndutya cuaha can jiñi yucu sucun can. 21 Tan tsihi̱ nandɨhɨ nyɨvɨ, tsihin quɨtɨ tsa ña quɨhvɨ̱ tsitsi yutun ndoo can, quɨtɨ ndavá, quɨtɨ tata, quɨtɨ cuuhu tan quɨtɨ tsicá tsihin tsitsi iyó nu ñuhu ñayɨvɨ. 22 Tan tacan cuvi̱, tandɨhɨ maa tsa iyó tsa nyito nu ñuhu ñayɨvɨ tsa ixtá tatyi can tsihi̱. 23 Maa tyin nyɨvɨ yucú tsitsi yutun ndoo can cacu̱ ñi: ra Noé tsihin ñasɨɨhɨ ra, sehe ra tsihin tsanu ra. Tan nandɨhɨ maa nyɨvɨ tsa ndoo̱ ityi tsata tsihi̱ ñi, tacan tucu quɨtɨ, ndɨhɨ tɨ naha tɨ tsihi̱. 24 Tan quitsaha̱ ndocó ndutya cuaha can tsa yaha uhun yoo tsa tsitu̱ ndutya can nu ñuhu ñayɨvɨ.