Nu ndɨhɨ̱ cuu̱n savi xaan
8
Tsitsi tsa ndi cuún savi, ña naa̱ iñi Nyoo tsi ra Noé tsihin tandɨhɨ quɨtɨ yucú tsihin ra tsitsi yutun ndoo can. Tacan tan quitsahá yɨhɨ́ tatyi jaha̱ ra tan nanuu̱ ndutya can. 2 Tyin na cundasɨ̱ tutyi ndutya ñuhu tan tsindasɨ̱ ndɨhɨ ityi andɨvɨ tacan tan tsicuɨñɨ̱ tsa cuún savi. Tan jayaha̱ Nyoo tatyi sɨquɨ ndutya can, tan quitsaha̱ ndocó tsi. 3 Tan tsa yaha̱ uhun yoo, ndoco̱ juhva ndutya cuaha can. 4 Tan nu tsahun uvi tsicá yoo utsa, ndoo̱ yutun ndoo can jiñi yucu nyacú nu nañí Ararat. 5 Tan cuahan nanuú ca ndutya can nda yoo utsi. Tan nu iin tsicá yoo utsi can, quitsaha̱ ndunditsín tandɨhɨ yucu sucun.6 Ndatu̱ ra Noé uvi xico quɨvɨ ca tsaha nuña̱ ra ventana tsa javaha̱ ra. 7 Tan jacuhu̱n ra iin ticaca, tan tyicatyihya cuahan tɨ ndavá tɨ ndatú tɨ nda na ityi ñuhu ñayɨvɨ. 8 Yaha can, jacuhu̱n ra iin paloma, tyin cuñí ra coto ra tatun tsa ndoco̱ ndutya nu ñuhu ñayɨvɨ. 9 Maa tyin ña ñihi̱ tɨ nu quitatu tɨ tyin ñaha ca ndoco ndutya nu ñuhu ñayɨvɨ, tan natsaa̱ nyico tɨ nu nyií ra tan quihi̱n ra tsi tɨ tyihi̱ ra tsitsi yutun ndoo can.
10 Ndatu̱ ra utsa nduvi ca tan jacuhu̱n nyico ra tsi tɨ. 11 Tacan tan tsaa̱ tɨ yɨhɨ́ yuhu tɨ ndaha numa cuii olivo tsa tsa cuñí cuaa. Tacan tan tsito̱ ra tyin tsa nducuu̱ ndutya nu ñuhu ñayɨvɨ. 12 Tan ndatu̱ ra inga utsa quɨvɨ ca, tan jacuhu̱n nyico ra tsi tɨ inga tsaha, tan ican tɨ ña tsaa̱ nuhu ca.
13 Tan quɨvɨ ndɨhɨ̱ ndutya can ndoco̱ nu ñuhu ñayɨvɨ, iñu cientu iin cuiya ra Noé tahan can. Tan nu iin tsicá yoo jihna, tsanɨ̱ ra jiñi yutun ndoo can tan nyehe̱ ra tyin tsa ndoco̱ ndutya nu ñuhu ñayɨvɨ. 14 Tan nu oco utsa tsicá yoo tsinu uvi na ityi̱ vaha ñuhu ñayɨvɨ.
15 Tacan tan catyí Nyoo tsihin ra: 16 "Qui̱ta tsihin ñasɨɨhɨ un, tsihin ra sehe un naha ra, tan tsihin ñi tsanu un tsitsi yutun ndoo juvin, 17 tsihin tandɨhɨ quɨtɨ tsa quɨhvɨ̱ tsihin un, quɨtɨ ndavá can, quɨtɨ tata can, quɨtɨ cuuhu can, quɨtɨ tsicá tsihin tsitsi can, ta̱va tsi tɨ naha tɨ na cuhun tɨ naha tɨ nanɨɨ catsico nu ñuhu ñayɨvɨ tan coo cuaha sehe tɨ naha tɨ tan cuña tɨ naha tɨ nu ñuhu", catyí Nyoo tsihin ra.
18 Tacan tan quita̱ ra tsihin ñasɨɨhɨ ra, tsihin sehe ra tsihin tsanu ra tsitsi yutun ndoo can, 19 tsihin quɨtɨ ndavá can, quɨtɨ tata can, quɨtɨ cuuhu can, quɨtɨ tsicá tsihin tsitsi can quita̱ tsihin ra.
Tuhun tsa ndoo̱ Nyoo tsihin ra Noé
20 Tsa yaha quita̱ ra, javaha̱ ra iin ata, tan nacatsi̱ ra tandɨhɨ nuu quɨtɨ tsa cua cuvi catsí ra naha, tyin jamañi ra nuu Nyoo. Tsahñi̱ ra tsi tɨ naha tɨ tan cayu̱ tɨ naha tɨ nuu ata can. 21 Tan tsa tsaa̱ xico tami can ityi nuu ra Jehová, catyí ra tsitsi añima ra: "Vasu ndi maa nda yoco nyɨvɨ tsicá iñi ñi javaha ñi tsa ña vaha, ña cua tahnu ndatu ca ñuhu ñayɨvɨ jaha yo tsa catyi cuatyi ñi. Ña cua janaa ca yo tsa iyó tsa nyito nu ñuhu ñayɨvɨ tumaa javaha̱ yo vityin.
22 "Tan tsitsi tsa ndi iyó ñuhu ñayɨvɨ,
ña cua xaña ñi tsa tatsi ñi, tan tsa naquihin ñi ndaha tyiñu ñi.
ña cua ndɨhɨ tsa ihñi tan tsa vitsin,
tyembu savi tan tyembu cahñi,
tsacuaa tan tsinu cahñi ña cua ndɨhɨ", catyí ra tsitsi añima ra.