9
Nasoco̱ Nyoo tsi ra Noé tsihin sehe ra tsihin tuhun ihya: "Co̱o cuaha sehe ndo, tan co̱o tata ndo nɨɨ catsico ñuu ñayɨvɨ. 2 Tandɨhɨ maa quɨtɨ iyó nu ñuhu ñayɨvɨ ihya cua nayuhvi tɨ naha tɨ tsi ndo, quɨtɨ ndavá can, quɨtɨ tsicá nu ñuhu can, quɨtɨ iyó tsitsi ndutya can, tandɨhɨ tɨ naha tɨ nacuhvá cuenda yu tsitsi ndaha ndo. 3 Tsahá yu tandɨhɨ quɨtɨ can, tan tandɨhɨ yucu, ndáa tsa taahán iñi maa ndo catsi ndo. 4 Maa tyin iyó intuhun tsa ña cuví catsi ndo: cuñu yɨhɨ́ nɨñɨ, tyin nɨñɨ can tsahá tsa iyó nyito nyɨvɨ tan quɨtɨ. 5 Tsa nditsa tyin tatun cahñi nyɨvɨ tsi inga tahan ñi, cua tatsi tuñi yu tsi ñi tsa cuenda nɨñɨ nyɨvɨ can, tan tacan tucu ñi quɨtɨ tatun cahñi tɨ nyɨvɨ.6 "Nyɨvɨ tsahñí nyɨvɨ,
taahán tsi cúu ñi.
Tyin nandɨhɨ maa nyɨvɨ tsinu̱ ñi tumaa caá maa yu tsa cuví yu Nyoo.
7 Maa tyin nyooho na coo cuaha tata ndo tan na nducuaha ndo.
Tan na coo ra naha nɨɨ catsico ñuu ñayɨvɨ."
8 Tan catyí ndɨhɨ ra tsihin ra Noé can tsihin sehe ra: 9 "Jacotó yu tsi ndo tyin ndoó yu tuhun tsihin ndo, tan tsihin nandɨhɨ tata ndo, 10 tan tsihin tandɨhɨ quɨtɨ tsa nyacú quita̱ tsihin ndo tsitsi yutun ndoo ihya: quɨtɨ ndavá can, quɨtɨ tata can, quɨtɨ cuuhu can tsihin tandɨhɨ tɨ naha tɨ ndoó yu tuhun. 11 Ña cua nasama ca yu tuhun ndoó yu tsihin ndo, ña cua cuun ca savi xaan cua janaa ñuu ñayɨvɨ, tan ña cua janaa ca yu tandɨhɨ tsa iyó tsa nyito tsihin ndutya.
12 "Ihya cuví iin cuhva ndoó yu tuhun tsihin maa yu, tsihin maa ndo tan tsihin quɨtɨ, cuahan maa quɨvɨ: 13 Tyaa̱ yu coo cuiya nu vico, tan cuví tsi tsa ndaa cuhva ndoo̱ yu tuhun tsihin nyɨvɨ nu ñuhu ñayɨvɨ. 14 Tsa cua naquɨhvɨ vico ityi sɨquɨ jaha yu, cua quita coo cuiya can. 15 Tacan tan cua nducuhun iñi yu tuhun ndoo̱ yu tsihin ndo tan tsihin tandɨhɨ nuu quɨtɨ, tan ña cua coo ca savi xaan cua janaa tsi tsa iyó tsa nyito nu ñuhu ñayɨvɨ. 16 Tatun tsa nyaá coo cuiya can nu vico, cua nyehe yu can tan cua nducuhun iñi yu tuhun tsa ndoo̱ yu tsihin nyɨvɨ tan tsihin tandɨhɨ nuu quɨtɨ nda cuanda cundɨhɨ ñuu ñayɨvɨ. 17 Yacan cuví tsa ndaa cuenda tsa ndoo̱ yu tuhun tsihin maa yu tan tandɨhɨ tsa iyó tsa nyito nu ñuhu ñayɨvɨ", catyí ra tsihin ra Noé.
Ra Noé tsihin sehe ra
18 Sehe ra Noé tsa quita̱ tsitsi yutun ndoo tsihin ra cuví ra Sem ra Cam tsihin ra Jafet. Tan ra Cam cuví jutu ra Canaán. 19 Nduñi ra ihya naha ra, ra Sem, ra Cam tan ra Jafet cuví sehe ra Noé, tsihin tata ra ican naha ra tsiña̱ nyɨvɨ nu ñuhu ñayɨvɨ.
20 Quitsaha̱ jatyiñú ra Noé can nu ñuhu, tan tatsi̱ cuaha ra yoho tsahá yucu vixi tsa cuví uva. 21 Tan iin quɨvɨ tsihí ra vinu tsa tsinú tsihin uva can, tan naa̱ iñi ra jaha̱ vinu can. Tan ndoo̱ ra canyií jihñi ra mahñu tsitsi vehe ra tan nduve ca jahma nditsí ra. 22 Tan nyehe̱ ra Cam, jutu ra Canaán, tyin tandɨɨ ra Noé, jutu ra, tsaha̱n ra catyi̱ tuhun ra can tsihin nduvi yañi ra yucú nuquehe. 23 Tacan tan quihi̱n ra Sem tsihin ra Jafet jahma cua casɨ ra naha tsi jutu ra naha. Tyiso̱ ra naha jahma can tsata ra naha tsahan tsicá tsihin tsata ra naha tsicasɨ̱ ra naha tsi jutu ra naha tsihin jahma can tyin ña cuñí ra naha nyehe ra naha tsa tandɨɨ ra.
"¡Tahnu̱ ndatu ra Canaán, sehe ra Cam!
¡Tandɨhɨ tata ra cua cuvi ra naha musu ña nyaá yahvi,
nuu ra Sem tan nuu ra Jafet tan nuu tandɨhɨ tata ra naha!"
26 Tsa yaha caha̱n ra yacan, tan catyí ra:
"Ná nasoco ra Jehová, Nyoo yu, tsi ra Sem,
Tan na cuvi ra Canaán musu nuu ra.
27 ¡Maa Nyoo cua cuhva cuaha tata tan ñuhu tsi ra Jafet!
¡Tan na co̱o ndɨhɨ ra naha yatyin nu iyó ra Sem,
tan na cuvi ra Canaán musu ra naha!", catyí ra Noé.