Nyɨvɨ tata nduñi sehe ra Noé
10
Nyɨvɨ ihya cuví tata sehe ra Sem, ra Cam, tan ra Jafet, sehe ra Noé. Tan tsicoo̱ sehe ra naha tsa yaha cuu̱n savi xaan.2 Tan ra ihya naha ra cuví sehe ra Jafet: ra Gomer, ra Magog, ra Madai, ra Javán, ra Tubal, ra Mesec tan ra Tiras. 3 Tan ra ihya naha ra cuví sehe ra Gomer: ra Askenaz, ra Rifat, tsihin ra Togarma. 4 Tan ra ihya naha ra cuví sehe ra Javán: ra Elisa, ra Tarsis, ra Quitim tsihin ra Dodanim. 5 Tan sehe ra Javán can cuví ra tsa tsicoo̱ yatyin ndutya ñuhu. Nandɨhɨ maa ra can naha ra cuví tata ra Jafet. Tan sɨɨn sɨɨn yuhu natuhún ra naha, tsa intuhun intuhun ñuu cuví ra.
6 Tan ra ihya naha ra cuví sehe ra Cam: ra Cus, ra Mizraim, ra Fut, tsihin ra Canaán. 7 Tan sehe ra Cus cuví ra Seba, ra Havila, ra Sabta, ra Raama tsihin ra Sabteca. Tan sehe ra Raama cuví ra Xeba tsihin ra Dedán. 8 Tan inga tata ra Cus cuví ra Nimrod, ra Nimrod cuvi̱ jihna ra ndacá ñaha nu ñuhu ñayɨvɨ. 9 Tan cuvi̱ ra ityi nuu Nyoo iin rayɨɨ vaha tsahñí quɨtɨ. Tan ican vatsí tuhun tsa catyí: "Tumaa ra Nimrod, ra tsahñí quɨtɨ tan ña jandacú ra tyin maa Nyoo tsaha̱ ndatu can tsi ra." 10 Tan ñuu nu tsiyɨhɨ̱ ndaha ra tsa jihna cuví: ñuu Babel, ñuu Erec, ñuu Acad, tan tsihin ñuu Calne. Tandɨhɨ ñuu can cayucú nda Sinar. 11-12 Tan quita̱ ra Nimrod Sinar can cuahan ra ityi Asiria, tan ican janduvita̱ ra ñuu Nínive, ñuu Rehobot, ñuu Cala, tan ñuu Resén; tan ñuu Resén can cuví ñuu cahnu canyií xiin Nínive tan xiin Cala.
13 Tan tata ra Mizraim, cuví nyɨvɨ Lud, nyɨvɨ Anam, nyɨvɨ Lehab, nyɨvɨ Naftu, 14 nyɨvɨ Patrus, nyɨvɨ Caslu, tan nyɨvɨ Caftor. Tan tata nyɨvɨ Caslu tan nyɨvɨ Caftor cuví tsi nyɨvɨ Filistia.
15 Tan sehe nuu ra Canaán cuví ra Sidón tan inga sehe ra nañí Het. 16 Tan tata ra Canaán can cuví nyɨvɨ ihya: nyɨvɨ Jebus, nyɨvɨ Amor, nyɨvɨ Gerges, 17 nyɨvɨ Hev, nyɨvɨ Arac, nyɨvɨ Sin, 18 nyɨvɨ Arvad, nyɨvɨ Zemar, tan nyɨvɨ Hamat. Nandɨhɨ tata ra Canaán can natsatsa̱ cua nducu ñi nu coo ñi. 19 Tan cahnu vaha cuví ñuhu nyɨvɨ can, nyií ñuhu can nda ityi ñuu Sidón, ityi ñuu Gerar, nda cuanda Gaza; tan nda cuanda ityi ñuu Sodoma, ñuu Gomorra, ñuu Adma, ñuu Zeboim, tan nda cuanda ñuu Lasa, cuví ñuhu nyɨvɨ can. 20 Nandɨhɨ nyɨvɨ can cuví tata ra Cam, tsa sɨɨn sɨɨn yuhu natuhún ñi tsa intuhun intuhun ñuu cuví ñi.
21 Tan ra Sem yañi tsitsa ra Jafet, cuví tsii tsaahnu nandɨhɨ nyɨvɨ ra Heber. 22 Tan ra ihya naha ra cuví tata ra Sem: ra Elam, ra Asur, ra Arfaxad, ra Lud tan ra Aram. 23 Tan tata ra Aram cuví ra Uz, ra Hul, ra Geter, tsihin ra Mas. 24 Tan ra Arfaxad cuví jutu ra Sala, tan ra Sala cuví jutu ra Heber. 25 Tan ra Heber tsicoo̱ uvi taahan sehe ra. Intuhun ra nañí Peleg, tyin tyembu cacu̱ ra can natahvi̱ ñuhu tsi nyɨvɨ tan ndusɨɨ̱n ñi. Tan inga sehe ra nañí Joctán. 26 Tan tata ra Joctán can cuví ra Almodad, ra Selef, ra Hazar-mavet, ra Jera, 27 ra Adoram, ra Uzal, ra Dicla, 28 ra Obal, ra Abimael, ra Seba, 29 ra Ofir, ra Havila tan ra Jobab; nandɨhɨ maa ra ican naha ra cuví tata ra Joctán. 30 Tan ñuhu nu tsicoo̱ ra naha cuví nɨɨ maa cuenda ityi Mesa tan nda cuanda ityi Sefar, ityi nu cuaha xaan yucu iyó ityi nu caná ñicanyii. 31 Tandɨhɨ maa ra can naha ra cuví tata ra Sem, tsa sɨɨn sɨɨn yuhu natuhún ra, tsa intuhun intuhun ñuu cuví ra.
32 Nandɨhɨ maa ra can naha ra cuví tata sehe ra Noé tsa intuhun intuhun ra tsihin nyɨvɨ ra, tan tsihin ñuu ra. Tan tata ra can naha ra cuví nandɨhɨ nyɨvɨ tsicoo̱ nu ñuhu ñayɨvɨ tsa yaha cuu̱n savi xaan.