Nu nasama̱ yuhu natuhún nyɨvɨ
11
Tahan tsanaha iin ñi yuhu natuhún nyɨvɨ. 2 Tan cuvi̱ tsi tsa quita̱ ñi cuahan ñi ityi caná ñicanyii. Tsaa̱ ñi ityi cuenda ñuhu Sinar nu canyií iin tsa ndaa cahnu tan ndoo̱ ñi iyó ñi can. 3 Tacan tan quitsaha̱ natuhún tahan juhva ra naha tan catyí ra naha: "Cua javaha yo ndoho tan cua cahmi yo ndoho can", catyí ra naha. Tacan javaha̱ ra naha, tsityiñu̱ ra naha ndoho cayu̱ tsa nuu yuu, tan tyañu ndoho can tyihi̱ ra naha tsa cuví tumaa chapopote. 4 Yaha can catyí nyico ra naha: "Vityin ihya cua javaha yo iin ñuu cahnu tan iin torre sucun tan cua tsaa can nda andɨvɨ. Tacan tan cua cava tuhun yo nanɨɨ nu ñuhu ñayɨvɨ tan ña ñiñi cuhun yo", catyí ra naha.5 Tacan tan nuu̱ ra Jehová tyin nyehé ra ñuu tan torre tsa cuahan javahá nyɨvɨ can. 6 Tan tsicá iñi ra: "Iin xaan cuví nyɨvɨ ihya tan intuhun ñi yuhu caahán ñi, tsa quitsaha̱ jatyiñú ñi tyiñu tsa natuhu̱n tahan ñi, nduve náa cua casɨ tsi ñi tsa javahá ñi can. 7 Vaha ca nuu yo tan nasama yo yuhu caahán ñi, tacan tan ña cua cutuñi iñi ñi tsa caahán inga ñi", tsicá iñi ra. Tan tacan javaha̱ ra.
8 Tan tsihin cuhva can nacoo̱ ñi tsa javahá ñi ñuu can, tan ndɨhɨ ñi natsatsa̱ nu ñuhu ñayɨvɨ jaha̱ ra Jehová.
9 Tan yacan cuenda nañí ñuu can Babel, tyin ican nasama̱ ra Jehová yuhu natuhún nyɨvɨ ñuu ñayɨvɨ, tan ican natsatsa̱ ñi nɨɨ catsico nu ñuhu ñayɨvɨ.
Nyɨvɨ tata ra Sem
10 Tsa yaha uvi cuiya tsa cuu̱n savi xaan, cientu cuiya ra Sem tahan can, tan tsicoo̱ ra Arfaxad, sehe ra. 11 Tan tsa yaha cacu̱ ra Arfaxad can, uhun cientu ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
12 Oco tsahun cuiya ra Arfaxad tan tsicoo̱ ra Sala, sehe ra. 13 Tan tsa yaha cacu̱ ra Sala can, cumi cientu uñi ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
14 Oco utsi cuiya ra Sala tan tsicoo̱ ra Heber, sehe ra. 15 Tan tsa yaha cacu̱ ra Heber can, cumi cientu uñi ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
16 Oco utsi cumi cuiya ra Heber tan tsicoo̱ ra Peleg, sehe ra. 17 Tan tsa yaha cacu̱ ra Peleg can, cumi cientu oco utsi ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
18 Oco utsi cuiya ra Peleg tan tsicoo̱ ra Reu, sehe ra. 19 Tan tsa yaha cacu̱ ra Reu can, uvi cientu ɨɨn ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
20 Oco utsi uvi cuiya ra Reu tan tsicoo̱ ra Serug, sehe ra. 21 Tan tsa yaha cacu̱ ra Serug can, uvi cientu utsa ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
22 Oco utsi cuiya ra Serug tan tsicoo̱ ra Nacor, sehe ra. 23 Tan tsa yaha cacu̱ ra Nacor can, uvi cientu ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
24 Oco ɨɨn cuiya ra Nacor tan tsicoo̱ ra Taré, sehe ra. 25 Tan tsa yaha cacu̱ ra Taré can, cientu tsahun cumi ca cuiya tsicoo̱ ra, tan tsicoo̱ ca maa sehe ra, rayɨɨ tan ñaha.
26 Tan uñi xico utsi cuiya ra Taré tan tsicoo̱ ra Abram, ra Nacor tan ra Harán, sehe ra.
Ihya quitsahá cuenda tsii tsaahnu nyɨvɨ Israel
27 Ra ihya naha ra cuví sehe ra Taré: ra Abram, ra Nacor tan ra Harán. Ra Harán cuví jutu ra Lot. 28 Yatyi ca tsihi̱ ra Harán tan ñavin ca ra Taré, jutu ra. Tsihi̱ ra ñuu nu cacu̱ ra, ñuu Ur cuenda Caldea.
29 Tan ra Abram tindaha̱ ra tsihin ña Sarai. Tan ra Nacor tindaha̱ ra tsihin ña Milca, ñaha tahan ña Isca, sehe ra Harán. 30 Maatyin ña Sarai ña tsicoó sehe ña tyin ñaha numa cuví ña.