Nu cana̱ Nyoo tsi ra Abram
12
Tan caha̱n ra Jehová tsihin ra Abram, tan catyí ra: "Na̱coo ñuhu un, na̱coo nyɨvɨ un, tan vehe jutu un nu iyó un, tan cuhun un nuu ñuhu cua janaha yu tsi un. 2 Tan tsihin tata un cua javaha yu iin ñuu cahnu, cua nasoco yu tsi un, tan yaha cahnu cua jaha yu tsi un, yacan cuenda cua nasoco un tsi inga nyɨvɨ. 3 Cua nasoco yu tsi nyɨvɨ cua nasoco tsi un, tan nyɨvɨ cahnu ndatu tsi un, cua tahnu ndatu ñi. Tan tsa cuenda un cua nasoco yu nandɨhɨ nyɨvɨ nu ñuhu ñayɨvɨ", catyí ra tsihin ra Abram can.4 Tacan tan quita̱ ra Abram cuahan ra tumaa tsa tava̱ tyiñu Nyoo tsi ra, tan cuahan ndɨhɨ ra Lot tsihin ra. Tan quɨvɨ quita̱ ra Abram nda Harán, iyó uñi xico tsahun cuiya ra. 5 Quihi̱n ra tsi ña Sarai, ñasɨɨhɨ ra, tan tsihin ra Lot, tsatsin ra, tsihin tandɨhɨ maa ndaha tyiñu tsa jacaya̱ ra, tsihin nandɨhɨ maa musu tsa naquihi̱n cuenda ra, tsaha quita̱ ra naha cuahan ra naha nda ñuu Canaán.
Tan tsa tsaa̱ ra naha nda Canaán can, 6 nɨɨ maa cuenda ñuhu can tsica̱ ra, nda cuanda tsaa̱ ra nda Siquem, nu nyaá iin tunyii cahnu cuenda More nu catyí nyɨvɨ tyin ii xaan can. Tan tyembu tahan ndi iyó nyɨvɨ Canaán nu ñuhu can cuví can. 7 Tan ican quita̱ ra Jehová nuu ra, tan catyí ra tsihin ra: "Abram, nɨɨ maa ñuhu ihya cua cuhva yu tsi tata un", catyí ra.
Tacan tan javaha̱ ra Abram iin ata tan jacahnu̱ ra tsi Nyoo tyin ican quita̱ Nyoo caha̱n ra tsihin ra. 8 Yaha can cuahan ra ityi nu nyacú cuaha yucu cuenda Bet-el ityi caná ñicanyii. Tan tsicoo̱ ra nu titahan xahñu ñuu Bet-el*f3 tsihin ñuu Hai. Tan ican javaha̱ ra inga ata, tan caha̱n ndaahvi ra tsihin ra Jehová. 9 Yaha can, quihi̱n ra ityi cuahan tucu ra ityi cuenda Neguev, tan cuee ñi cuee ñi cuahan ra.
Nu tsaa̱ ra Abram ñuu Egipto
10 Tacan tan quitsaha̱ iyó tama ñuu ñayɨvɨ, tan tsa ñihi iyó tama, naquihi̱n ra ityi cuahan ra tsihin nyɨvɨ ra nda Egipto cua coo ra. 11 Tsa tsa cua quɨhvɨ ra ñuu can, catyí ra tsihin ñasɨɨhɨ ra: "Ji̱hna, tsitó yu tyin cuví un iin ñaha sɨɨ xaan caá. 12 Tan tsa cua nyehe ra Egipto naha ra tsi un, cua catyi ra naha: ꞌÑasɨɨhɨ ra ican cuví tsi ñaha canꞌ. Tan cua cahñi ra naha tsi yu, tan cua quihin ra naha tsi un, ña cua cahñi ra can naha ra tsi yooho. 13 Yacan cuenda catyi un tyin cuhva yu cuví tsi un. Tacan tan nduve náa cua javaha ra naha tsi yu tan vaha cua cuvi tsi yu nu cuahan yo tsa cuenda un. Ja̱ha tumañi iñi, ca̱han un tyin cuhva yu cuví tsi un", catyí ra.
14 Tsa quɨhvɨ̱ ñi ñuu can, nyehe̱ ra Egipto naha ra tyin sɨɨ xaan caá ña Sarai. 15 Nandɨhɨ ra jacuú tyiñu nuu ra faraón, nyehe̱ ndɨhɨ ra naha tsi ña, tan tsicaha̱n ra naha tsihin ra faraón tyin sɨɨ xaan caá ña. Tan tsindaca̱ ra naha tsi ña yuvehe ra faraón can. 16 Tan vaha xaan tyaa̱ nuu ra tsi ra Abram tsa cuenda ña Sarai. Tsaha̱ ra mbee, indɨquɨ, tsaha̱ ra musu rayɨɨ, tan musu ñaha, urru tsihin camello tsi ra Abram.
17 Maa tyin tatsi tuñi̱ Nyoo tsi ra faraón tsihin nyɨvɨ ra tsihin cuehe xaan tsa catyi ña Sarai. 18 Tan tsa cuenda yacan, cana̱ ra tsi ra Abram, tan catyí ra: "¿Náa cuenda javaha̱ un tsehe tsihin yu? ¿Náa cuenda ña caha̱n un tyin ñasɨɨhɨ un cuví tsi ña ihya? 19 Tan ¿náa cuenda catyí un: ꞌCuhva yu cuví tsi ñaꞌ? Tan tsa tacan, cuví ñi tyin quihi̱n yu tsi ña cuvi ña ñasɨɨhɨ yu. Vityin ihya, ¡qui̱hin ñasɨɨhɨ un tan qui̱ta cua̱ahan!", catyí ra tsihin ra. 20 Tacan tan tava̱ tyiñu ra tsi jandaru ra tyin na tava ra naha tsi ra Abram tsihin ñasɨɨhɨ ra, tsihin tandɨhɨ tsa iyó tsi ra nda yuhu ñuu Egipto can.