Nu ndusɨɨ̱n ra Abram tsihin ra Lot
13
Tacan tan quita̱ ra Abram ñuu Egipto, tsihin ñasɨɨhɨ ra, tsihin ra Lot, tan tsihin tandɨhɨ tsa cuca iyó tsi ra, tan cuahan nyico ñi ityi cuenda Neguev. 2 Tan cuaha xaan quɨtɨ jana ra iyó, iyó xuhun cuaan tan xuhun cuitsin tsi ra, cuca xaan ra. 3 Tsa quita̱ ñi cuenda Neguev tsicuɨñɨ́ tsicuɨñɨ́ ñi ñi cuahan ñi nda Bet-el nda cuanda tsaa̱ ñi nu titahan xahñu Bet-el can tsihin ñuu Hai, nu tsicoo̱ ñi nda jihna, 4 nu javaha̱ ra iin ata, tan ican caha̱n ndaahvi nyico ra tsihin ra Jehová.5 Tan cuaha xaan mbee tan indɨquɨ jana ra Lot tan cuaha musu cuahan tsihin ra. Cuca xaan ndɨhɨ ra tumaa cuca ra Abram, ixto ra. 6 Tan ña cutsaa ca cuhu catsi quɨtɨ jana ra naha nu iyó ra naha tyin cuaha xaan tɨ naha tɨ, tan ña cuví ca coo ra naha iin ñi nu coo ra naha, 7 tyin ra jacuendá quɨtɨ jana ra Abram tan ra jacuendá quɨtɨ jana ra Lot cañí tahan ra naha. (Tahan ndi iyó nyɨvɨ Canaán tan nyɨvɨ Ferez ican cuví can.) 8 Tacan tan catyí ra Abram tsihin ra Lot: "Ña vaha tsa coo tisɨhɨ nu yucú yo, tan ndi tsihin ra jacuendá quɨtɨ jana un tsihin musu yu, tyin nyɨvɨ yo cuví. 9 Cahnu xaan ñuhu ihya, nye̱he ndaa ityi cuñí un cuvi tsi un, tun taahán iñi un ityi sɨquɨ cua̱ahan ican, tatun ityi tsaha taahán iñi un, cuví cuhun un ican tan yuhu cuhun maa yu nu nacoo un tyin ña cuvi ca coo yo iin ñi nu coo yo", catyí ra Abram tsihin ra Lot.
10 Nyehe̱ ra Lot nɨɨ nduhva cahnu tsa canyií xiin yutya Jordán tan nda cuanda Zoar, cuaha xaan ndutya yɨhɨ́ can. Tan tumaa caá yutun tata ra Nyoo ña, tan tumaa caá ñuhu Egipto ña caá nduhva can. Tacan caá ican tsa ñaha ca janaa ra Jehová ñuu Sodoma tan ñuu Gomorra. 11-12 Tacan tan ndusɨɨ̱n ra naha. Ra Abram ndoo̱ ra iyó ra ñuu Canaán can. Maa tyin ra Lot cuahan ra ityi nu caná ñicanyii nu canyií nduhva cahnu cuenda yutya Jordán, tan tsicoo̱ ra ñuu iyó nduhva can, nu tyaa̱ nuu ra, yatyin ñuu Sodoma can. 13 Tan nyɨvɨ ñuu Sodoma can cuaha xaan cuatyi quiñi caa javahá ñi nuu Nyoo, tan nyɨvɨ caquiñi xaan cuví ñi.
14 Tsa yaha ndusɨɨ̱n ra Lot tsihin ra Abram, caha̱n ra Jehová tsihin ra Abram tyehen: "Nye̱he vaha nɨɨ cahnu ñuhu ihya, nɨɨ canduvi nye̱he un, ityi iñi tan ityi tsaha, ityi caná ñicanyii, tan ityi tyisó ñicanyii. 15 Tyin ñuhu tsa nyehé un ihya, cua nacuhva yu can tsi un tan cua nacuhva ndɨhɨ yu tsi tata un cua cuvi tsii ra naha. 16 Tyin tatun cuvi nacahvi nyɨvɨ nyaca ñuhu, tacan cuvi cua nacahvi ñi tsi tata un, tyin tumaa tsa cuaha nyaca ñuhu can, tacan tsa cuaha tata un cua jaha yu. 17 Yacan cuenda ¡Cua̱ahan tan nacoto un nɨɨ cahnu ñuhu can, tyin tsii maa un cua nacuhva yu can!", catyí ra tsihin ra Abram.
18 Tacan tan tsanɨ̱ ra Abram vehe tsinú tsihin ñɨɨ quɨtɨ nu iyó ra, tsaha cuahan ra cua coo ra tsitsi cuhu ra Mamre nu nyacú tunyii tsa canyií cuenda ñuu Hebrón. Tan ican javaha̱ ra iin ata tan jacahnu̱ ra tsi Nyoo.