Nu jacacu̱ ra Abram tsi ra Lot
14
Tan tyembu can ra Amrafel cuví rey ñuu Sinar, tan ra Arioc cuví rey ñuu Elasar, tan ra Quedorlaómer cuví rey ñuu Elam, tan ra Tidal cuví rey ñuu Goim. 2 Tan ra ican naha ra cuví ra tsa nduvita̱ cuatyi tsihin ra ihya naha ra: ra Bera, rey ñuu Sodoma, ra Birsa, rey ñuu Gomorra, ra Sinab, rey ñuu Adma, ra Semeber, rey ñuu Zeboim, tan tsihin ra rey ñuu Bela, tan inga sɨvɨ ñuu can cuví Zoar. 3 Tan nu cuví nduhva cuenda Sidim nu canyií Ndutya Ñuhu Uhva Xaan, ndu̱ iin tsa uhun taahan ra rey can naha ra tsihin jandaru ra naha. 4 Tyin utsi uvi cuiya tsi yɨhɨ̱ ndaha ra Quedorlaómer rey ñuu Elam tsi tsa uhun ñuu nu yɨhɨ́ ndaha ra rey ican naha ra, tan inga cuiya can ndoo̱ ra naha tuhun tsa cua ndoo nuña ra naha tsitsi ndaha rey Quedorlaómer. 5 Tacan tan inga cuiya can tsaha̱n jihna ra Quedorlaómer tsihin nduñi rey tsa nyaá naa tsi ra tsicañi̱ tahan ra naha tan jacanaa̱ ra naha tsi tandɨhɨ ñuu ihya: cuenda Astarot Karnaim, ican jacanaa̱ ra naha tsi nyɨvɨ Refa, cuenda Ham, ican jacanaa̱ ra naha tsi nyɨvɨ Zuza, cuenda Save-quiriataim, ican jacanaa̱ ra naha tsi nyɨvɨ Emit. 6 Tan nda yucu Seir, ican jacanaa̱ ra naha tsi nyɨvɨ Hor tan tsinyaa ndaha̱ ra naha tsi nyɨvɨ can nda cuanda nu ndaa ñuhu cuenda Parán, canyií yatyin nu tsɨquɨ. 7 Yaha can, vatsi nuhu ra tsihin jandaru ra tsihin nduñi rey can naha ra, tsaa̱ ra naha nda En-mispat tan inga sɨvɨ ñuu can cuví Cades. Janaa̱ ra naha tandɨhɨ maa ñuu nyɨvɨ Amalec tan nyɨvɨ Amor tsa tsicoo̱ ñuu Hazezon-tamar.8 Tacan tan quita̱ ra rey ihya naha ra nu ndaa ñuhu Sidim: rey ñuu Sodoma, rey ñuu Gomorra, rey ñuu Adma, ra rey ñuu Zeboim, tan ra rey ñuu Bela (inga sɨvɨ ñuu can cuví Zoar) cua cañi tahan ra naha tsihin ra ihya naha ra: 9 Tsihin ra Quedorlaómer, rey ñuu Elam, tsihin ra Tidal, rey ñuu Goim, tsihin ra Amrafel, rey ñuu Sinar, tsihin ra Arioc, rey ñuu Elasar. Tsihin ra ican naha ra tsicoo̱ cuatyi can. Cumi rey nduvita̱ cuatyi tsihin uhun rey. 10 Tan tsa tsinú ra rey ñuu Sodoma tan ra rey ñuu Gomorra nducú ra naha nu cacu ra naha, nacava̱ ra naha tsitsi soco nu iyó tsa cuví tumaa chapopote, tyin quɨvɨ can cuaha xaan soco can nyacú nduhva Sidim nu cañi̱ tahan ra naha. Tan inga uñi ca ra rey naha ra cuahan ra naha tsitsi cuhu ityi yucu, ican cacu̱ ra naha.
11 Tandɨhɨ maa tsa cuca tan tsa cuví catsi yo iyó ñuu Sodoma tan Gomorra can naquihi̱n tsa cumi rey can naha ra tsaha cuahan ra naha. 12 Quihi̱n ndɨhɨ ra naha tsi ra Lot, sehe ndɨyɨ Harán, yañi ra Abram, tyin ican iyó ra. Icahnu ñi quihi̱n ndɨhɨ ra naha tandɨhɨ tsa cuca iyó tsi ra. 13 Tan intuhun ra tsa ña tsihi̱ nu tsicoo̱ cuatyi can tsaha̱n ra tsijacoto̱ ra tsi ra Abram, ra hebreo, nu iyó ra tsitsi cuhu ra Mamre, ra Amor, nu iyó cuaha tunyii. Tan yañi ra Mamre cuví ra Escol tsihin ra Aner, tan cutahán ra naha tsihin ra Abram can.
14 Tsito̱ ra Abram tyin quihi̱n ra rey can naha ra tsi ra Lot, tsatsin ra, jandu ii̱n ra uñi cientu tsahun uñi musu cacu̱ maa yuvehe ra, tan tsinyicu̱n ra naha tsi ra rey can naha ra nda cuanda ñuu Dan. 15 Tan tsacuaa sana iñi ra rey can naha ra, tsaa̱ ra Abram tsihin nyɨvɨ cuahan tsihin ra nu yucú ra naha, tan cañi̱ tahan ra tsihin ra naha, tan tsinyicu̱n ra Abram tsi ra can naha ra nda cuanda ñuu Hoba, tsa canyií ityi jiñi cuenda ñuu Damasco. 16 Tacan tan jacacu̱ ra Abram tsi ra Lot, tsatsin ra, tan quinyaa̱ ra tandɨhɨ maa tsa quihi̱n ra can naha ra, tan ñihi̱ nyico ra tsa cuví tsii ra Lot tsa quinyaa̱ ra can naha ra, jacacu̱ ndɨhɨ ra tsi ñi ñaha tan inga ca maa nyɨvɨ tsa quihi̱n ra can naha ra.
Nu nasocó ra Melquisedec tsi ra Abram
17 Tan tsa tsaa̱ nuhu ra Abram tsa yaha jacanaa̱ ra tsi rey Quedorlaómer tsihin inga ca maa ra rey can naha ra, quita̱ ra cuví rey ñuu Sodoma cua quihin cuenda ra tsi ra Abram nu canyií tsa ndaa ñuhu nda Save, tsa cuví nu ndaa ñuhu cuenda ra Rey. 18 Tan quita̱ ndɨhɨ ra Melquisedec ra cuví rey ñuu Salem, tan juvin ñi cuví ra jutu nuu Nyoo cahnu, tava̱ ra paan tsihin vinu. 19 Tan nasoco̱ ra tsi ra Abram tsihin tuhun ihya, tan catyí ra:
"Maa Nyoo cahnu nyaá andɨvɨ cua nasoco tsi un.
Ra javaha̱ ñuhu ñayɨvɨ tan andɨvɨ cuví ra.
20 Cahnu xaan cuví maa Nyoo nyaá andɨvɨ,
tyin jatyinyee̱ ra tan tsaha̱ ra jacanaa̱ un tsi nyɨvɨ xaan iñi tsi un."
Tacan tan tava̱ ra Abram utsi cuhva tsa tandɨhɨ maa tsa ñihi̱ ra tan quihi̱n ra iin cuhva can tsaha̱ ra tsi ra Melquisedec. 21 Tacan tan catyí ra rey ñuu Sodoma tsihin ra Abram:
--Ndoo maa tandɨhɨ tsa cuca ihya tsi un, nyɨvɨ ñi nacuhva un tsi yu --catyí ra.
22 -Ndoo̱ yu tuhun tsihin ra Jehová Nyoo cahnu, ra javaha̱ ñuhu ñayɨvɨ tan andɨvɨ, 23 tyin ndi intuhun maa ndaha tyiñu un ña cua quihin yu, ndi intuhun yuhva a yoho cunuhñi nditsan yu ña cua quihin yu; na ña catyi un: "Yuhu tyihi̱ ixta yuhu ra Abraham." 24 Maa tyin ra tsa tsaha̱n jatyinyee̱ tsi yu, ra Aner, ra Escol tan ra Mamre cua quihin maa ra naha tsa taahán tsi quihin ra naha, tyin yuhu ndoó yu vaha tsihin tsa tsatsi̱ musu ñi yu.