Nu ndoo̱ Nyoo tuhun tsihin ra Abram
15
Tsa yaha can quituvi̱ Nyoo nuu ra Abram, tan catyí ra tsihin ra:--Yuhu cuví ra jacuendá tsi un, ña nayuhvi un, tyin tsa cua ñihi un, cahnu xaan tsi.
2-3 Tan catyí ra Abram tsihin ra:
--¿Náa cua cuhva un tsi yu, Jutu Mañi yu? tan ndi sehe ndi nduve. Tan tandɨhɨ maa tsa tsii yu, nu Eliezer, nu ra ñuu Damasco, musu cacu̱ vehe yu ihya, cua naquihin can, tyin maa un ñaha ca cuhva un coo iin sehe ndi.
4 Tan nacaha̱n Nyoo tsihin ra:
--Ñavin iin nyɨvɨ tucu cua naquihin tsa cuca iyó tsi un, tyin sehe maa un cua naquihin itsi -catyí ra.
5 Tacan tan cuahan ra tsihin ra Abram nu quehe, tan catyí ra tsihin ra:
--Nye̱he ndaa jihna ityi sɨquɨ tatun cuvi nacahvi un tiñuu, tyin tacan tsa cuaha tata un cua cuvi --catyí ra.
6 Tsinu̱ iñi ra Abram tsa caha̱n ra Jehová tsihin ra, yacan cuenda quihi̱n Nyoo tsi ra tumaa iin nyɨvɨ cuɨtɨ. 7 Tan catyí ra tsihin ra Abram:
--Yuhu cuví ra Jehová, ra tava̱ tsi un nda ñuu Ur cuenda nyɨvɨ Caldea tyin cua cuhva yu ñuhu ihya tsi un --catyí ra.
8 Tan catyí ra Abram tsihin ra:
--Jutu mañi yu, ¿Nácaa cua coto yu tyin cua naquihin yu ñuhu ihya? --catyí ra.
9 --Qui̱ndaca iin indɨquɨ sɨɨhɨ, intuhun mbee sɨɨhɨ iyó ndɨquɨ tsihin intuhun mbee ticatyi, maa tyin maa ñi quɨtɨ uñi cuiya, tan intuhun curuu tan iin paloma ―catyí Nyoo tsihin ra.
10 Quihi̱n ra Abram intuhun intuhun nuu quɨtɨ can naha tɨ tsahñi̱ ra, tan tsahnya̱ sava ra tsi tɨ naha tɨ. Intuhun intuhun sava tsa intuhun intuhun tɨ janyehe̱ nutahan ra, maa tyin curuu tan paloma ndicanɨɨ tɨ naha tɨ tsindaca̱ ra nuu Nyoo. 11 Tan nu yucú cuñu quɨtɨ can, tsaa̱ nditsii nducú tɨ naha tɨ catsi tɨ naha tɨ cuñu quɨtɨ can naha tɨ, maa tyin jacunu̱ ra tsi nditsii can naha tɨ. 12 Tan tsa tyiso̱ ñicanyii, yaha xaan cuñí ra Abram cusu ra, tacan tan tɨɨ̱n ñimaahna tsi ra tan ndoo̱ ra quixi̱ ra. Iyaha ñi tsinu̱ nduvi tsa naa tsi ra tan yuuhví xaan ra cuvi̱.
13 Tacan tan catyí ra Jehová tsihin ra:
--Cuñí tsi cotó un tyin cua coo tata un inga ñuu tan cua cuvi ñi musu ña nyaa yahvi ican, tan cumi cientu cuiya cua yaha ñi tundoho cua jaha nyɨvɨ ñuu can. 14 Maa tyin cua tatsi tuñi yu tsi nyɨvɨ ñuu nu cua cuvi ñi musu ña nyaa yahvi, tan tsa yaha can cua quita nuña ñi tan cuaha tsa cuca cua quihin ñi cuhun tsihin ñi. 15 Tan tsa cuenda un, cua quitatu un tsihin nyɨvɨ un tsa tsihi̱ tsanaha, tsahnu xaan un tsaha cua cúu un. 16 Tsa yaha coo nyɨvɨ un cumi cientu cuiya nda Egipto, cua quitsi nyico ñi nu ñuhu ihya, tyin ñaha ca tsaa tsa nducuaha cuatyi nyɨvɨ Amor nda tacan --catyí ra Jehová tsihin ra.
17 Tsa nuu cuaa cuví can, tsaha quituvi̱ iin ono tava̱ yuhma tan intuhun yɨtɨ cayú yaha̱ sava mahñu nu yucú cuñu ñuhu quɨtɨ tsa tsahnya̱ sava ra. 18 Juvin ñi maa quɨvɨ can ndoo̱ ra Jehová tuhun tsihin ra Abram, tan catyí ra:
--Ñuhu ihya cua cuhva yu tsi tata un, nda cuenda yuhu yutya ñuu Egipto tan nda cuanda yutya cahnu, tsa nañí Éufrates: 19 nu cuví ñuhu nyɨvɨ Cen, ñuhu nyɨvɨ Cenez, ñuhu nyɨvɨ Cadmon, 20 ñuhu nyɨvɨ Het, ñuhu nyɨvɨ Ferez, ñuhu nyɨvɨ Refa, 21 ñuhu nyɨvɨ Amor, ñuhu nyɨvɨ Canaán, ñuhu nyɨvɨ Gerges, tsihin ñuhu nyɨvɨ Jebus, cua cuhva yu tsi tata un --catyí ra tsihin ra Abram.