Ña Agar tsihin ra Ismael, sehe ña
16
Tan ña Sarai, ñasɨɨhɨ ra Abram, ñaha numa cuví ña; tan iyó iin musu ña nañí Agar, tan musu ña nyaá yahvi cuví ña ican, tan ñaha Egipto cuví ña. 2 Tacan tan catyí ña Sarai tsihin ra Abram:--Tsicán yu tumañi iñi tsi un: Co̱o tsihin ña Agar na coo iin sehe ña tan cuvi sehe yu, tyin maa yu ña tsahá Nyoo coo sehe yu --catyí ña.
Tan javaha̱ ra tsa tsica̱n ñasɨɨhɨ ra tsi ra. 3 Tacan tan quihi̱n ña tsi ña Agar, musu ña, nacuhva̱ cuenda ña tsi ra Abram tumaa ñasɨɨhɨ ra, tsa tsa iyó utsi cuiya tsa iyó ñi ñuu Canaán. 4 Tsicoo̱ ra tsihin ña Agar ican, tan ñihi̱ sehe ña. Tsa tsito̱ ña tyin ñuhú sehe ña, quitsaha̱ nyehé ndasɨ ña tsi ña Sarai, tsitoho ña. 5 Tacan tan catyí ña Sarai tsihin ra Abram:
--Juvin ñi maa yu tsaha̱ tsi ña Agar tsi un, tan vityin cahnu xaan ca jahá ña tsi ña tan ñavin ca yuhu tyin ñuhú sehe ña. ¡Cuatyi maa un cuví can tsa tacan icá ña tsihin yu!. Maa Nyoo catyi ndáa yoo cumí cuatyi --catyí ña.
6 Tan nacaha̱n ra tsihin ña:
--Ji̱hna, nyehe maa un náa cuñí un javaha un tsihin ña Agar, ndaha maa un nyií ña --catyí ra.
Tan tsa ña cunyeé ca iñi ña Agar tsa nyehé ña tundoho jahá ña Sarai, quita̱ ña cuahan ña.
7 Maa tyin nañihi̱ ángel Nyoo tsi ña nu tsɨquɨ nyaá ña yatyin ñi nu caná ndutya ityi cuahan ityi Shur. 8 Tan tsica̱ tuhun ra tsi ña:
--¿Maa ityi quee̱ un tan maa ityi cuahan un?, yooho Agar, musu ña Sarai.
Tan catyí ña tsihin ra:
--Nuu ña Sarai, tsitoho yu, tsinú yu.
9 Tan catyí ángel can tsihin ña:
--Cua̱nuhu nyico yuvehe ña Sarai nu quee̱ un, ja̱vaha tandɨhɨ tsa cua tava tyiñu ña tsi un.
10 Tan catyí ndɨhɨ ra tsihin ña:
"Cuaha xaan tata un cua jaha yu,
yoñi maa cua cuvi nacahvi tsi ra naha.
11 Tacan cua cuvi tyin ñihi̱ sehe un,
tan Ismael cua jacunañi un tsi lee sehe un.
tyin nyehé Nyoo tundoho yahá un.
12 Cua cuvi ra iin ra xaan, tumaa cuayu ndasɨ.
Cua cañi tahan ra tsihin nyɨvɨ tan nandɨhɨ nyɨvɨ can tsihin ra.
Tan cua coo ra yuvehe nandɨhɨ yañi ra ndi maa ña cuñi ra naha."
13 Tacan tan jacunañi̱ ña Agar tsi ra Nyoo tsa caha̱n tsihin ña: "Yooho cuví Nyoo tsa nyehé", tyin catyí ña: "Nyehe̱ yu tsi Nyoo tan nyehe̱ ra tsi yu, maa tyin ña tsihi̱ yu." 14 Tsa cuenda yacan jacunañi̱ ndɨhɨ ña soco can: "Soco ra nyitó ra nyehé tsi yu." Tan nu cuú xahñu Cades tan Bered nyaá soco can.