Cuhva tsa ndoo̱ Nyoo tuhun tsihin ra Abram tan tsihin nandɨhɨ nyɨvɨ
17
Cumi xico tsahun cumi cuiya ra Abram, tsa quituvi̱ ra Jehová nuu ra tan catyí ra tsihin ra:--Cuɨtɨ coo un nuu yu tyin yuhu cuví Nyoo ra iyó tandɨhɨ tunyee iñi. 2 Tan cua ndoo yu tuhun tsihin un tan yaha cuaha tata un cua coo jaha yu.
3 Tacan tan tsaqui̱n ra Abram nuu ra nda nu ñuhu, tsitsi tsa ndi caahán Nyoo tsihin ra tyehen:
4 --Yacan cuví tuhun ndoó yu tsihin un: Cua cuvi un jutu nyɨvɨ cuaha. 5 Tan Abraham cua cunañi un tyin tyaa̱ yu tsi un tsa cua cuvi un jutu nyɨvɨ cuaha, tan ña cua cunañi ca un Abram. 6 Tan cuaha xaan tata un cua coo jaha yu, tan cuaha ñuu nahnu cua cuvi ñi tan ican cua quita ra cua cuvi rey naha ra. 7 Tan tuhun tsa ndoó yu tsihin un cua ndoo ndɨhɨ yu tuhun can tsihin tata un ityi nuu ca, tuhun tsa ña cua cundɨhɨ cuví tsehe. Tyin Nyoo ndo cua cuvi tsi yu cuahan maa quɨvɨ. 8 Tan cua nacuhva cuii yu tandɨhɨ ñuhu Canaán nu iyó un vityin tsi ra naha, tan yuhu cua cuvi Nyoo ra naha.
9 Tan nacaha̱n nyico Nyoo tsihin ra Abraham:
--Maa tyin yooho, ja̱ndaa tsa ndoo̱ yu tuhun tsihin un tsihin tandɨhɨ tata un. 10 Tsehe cuví tuhun tsa ndoó yu tsihin ndo, tyin jandaa ndo itsi tan tsihin tata un, maa un, sehe un, musu un tsihin sehe musu un tan inga ca ra iyó nu iyó un cua tyahnya ñɨɨ nu ica tsi ndo. 11 Tan yacan cua cuvi tuñi cuenda tuhun tsa ndoo̱ yu tsihin ndo, cuñí tsi cahnya ndo ñɨɨ nu ica tsi ndo. 12 Vityin tan cuahan tsi ityi nuu, tandɨhɨ lee rayɨɨ tsa una quɨvɨ, cuñí tsi tyahnya ñɨɨ nu ica tsi ra naha, tahan ñi musu tsa cacú nu iyó un, tacan tucu ñi musu tsa jatá un tsi nyɨvɨ inga ñuu. 13 Ña cua ndoo ndi intuhun ndo tsa ña cua tyahnya ñɨɨ nu ica tsi, tan yacan cuví tuñi cua cunyaa tsi ndo, tsa janahá tyin ña cua cundɨhɨ tuhun tsa ndoo̱ yu tsihin ndo. 14 Maa tyin ra tsa ña cua tyahnya ñɨɨ nu ica tsi, cuñí tsi jatsiyo ra tsi ra nu iyó ndo, tyin ña tyaá yahvi ra tuhun tsa ndoo̱ yu tsihin ndo.
15 Tan catyí ndɨhɨ ra tsihin ra Abraham:
--Ña cua cunañi ca ñasɨɨhɨ un, Sarai, vityin tan ityi nuu Sara cua cunañi ña. 16 Tan cua nasoco yu tsi ña, tan cua coo iin sehe ndo. Nditsa tsa cua nasoco yu tsi ña, sɨhɨ nyɨvɨ ñuu cua cuvi ña, tan nyɨvɨ tata sehe ndo cua cuvi ra naha rey cua quɨhɨ ndaha cuaha ñuu.
17 Tacan tan tsaqui̱n ra Abraham nuu ra nda nu ñuhu, tan tsacú naaha ra tan tsicá iñi ra: "Tsa cientu cuiya yuhu iyó, ¿a cuvi ca coo sehe yu tsihin ña Sara ñasɨɨhɨ yu? Tyin ña ihya tucu tsa iyó cumi xico utsi cuiya ña", cuñí ra, tsicá iñi ra. 18 Tacan tan catyí ra tsihin Nyoo:
--¡Náa tsa vaha tatun cuvi coo ra Ismael tsihin tsa nasocó un!
19 Tan catyí Nyoo tsihin ra:
--Tsa caha̱n yu tyin ña Sara, ñasɨɨhɨ un, cua coo iin sehe ña, tan cua jacunañi ndo lee can Isaac. Tan tsihin ra ican cua jandaa yu tyiñu tsa ndoo̱ yu tuhun, tan cuvi tsi tuhun tsa ña cua cundɨhɨ tsihin tata ra, tsa yaha cúu ra. 20 Tsiñi̱ ndɨhɨ yu tsa caha̱n un cuenda ra Ismael, cua nasoco yu tsi ra, cua janducuaha yu tata ra, tan utsi uvi taahan ra cuvi sehe ra cua cuvi ra naha rey tan cahnu xaan ñuu cua cuvi ra. 21 Maa tyin tsihin ra Isaac, sehe ndo tsa cua cacu quɨvɨ vityin inga cuiya, ña cua jandɨhɨ yu tuhun tsa ndoo̱ yu tsihin ra --catyí ra tsihin ra Abraham. 22 Tacan tan cuahan ra tsa ndɨhɨ̱ natuhu̱n ra tsihin ra Abraham.
23 Juvin ñi maa quɨvɨ can tsahnya̱ ra Abraham ñɨɨ nu ica tsi ra Ismael, sehe ra, tan tsihin nandɨhɨ musu cacu̱ yuvehe ra tan musu tsa jata̱ ra tsihin xuhun ra. Tandɨhɨ maa ra jatyiñú tan iyó ra naha yuvehe ra Abraham tyahnya̱ ñɨɨ nu ica tsi ra naha juvin ñi maa quɨvɨ can, tumaa tsa caha̱n maa Nyoo tsihin ra Abraham. 24 Tan cumi xico tsahun cumi cuiya ra quɨvɨ tyahnya̱ ñɨɨ nu ica tsi ra. 25 Tan utsi uñi cuiya ra Ismael, quɨvɨ tsahnya̱ jutu ra ñɨɨ nu ica tsi ra. 26 Iin ñi quɨvɨ tyahnya̱ ñɨɨ nu ica tsi nandɨhɨ ra naha: Ra Abraham, ra Ismael, 27 musu cacu̱ yuvehe ra, tahan ñi musu jata̱ ra tsi ra inga ñuu. Tyahnya̱ ñɨɨ nu ica tsi ra naha tsihin ra.