Ndoo̱ Nyoo tuhun tyin cua cuhva ra iin sehe ra Abraham
18
Iin quɨvɨ maa maa hora cuɨtɨ quituvɨ ra Jehová nuu ra Abraham nu nyaá taxin ra nuquehe yuvehe ra nu iyó ra tsitsi cuhu ra Mamre nu iyó cuaha tunyii. 2 Tan nanyehe̱ xiin ra tan nyehe̱ ra nyacú uñi taahan rayɨɨ nuu ra. Tan iyaha ñi nduvita̱ ra cuahan ra cua jatahan ra tsi ra naha, tan tsaqui̱n ra nuu ra nda nu ñuhu. 3 Tan catyí ra:--Jutu mañi yu, tsicán yu tumañi iñi tsi un ña cuhun naha ndo. 4 Tatun taahán iñi un, cua ndacan yu juhva ndutya tyin ndoo tsaha ndo. Tan quitatu ndo nu vatɨ tsaha yutun ihya. 5 Vaha xaan tyin yaha̱ ndo nu iyó yuhu ra ndaahvi ihya. Cua quihin yu juhva tsa catsi ndo tan ñihi ndo tunyee iñi tsaha cuhun ndo.
--Vaha tucu maa --catyí ra naha tsihin ra.
6 Tacan tan iyaha ñi quɨhvɨ̱ ra tsitsi vehe nu nyií ña Sara, tan catyí ra tsihin ña:
--Qui̱hin oco kilu yutyi paan vaha tsa nuu tandɨhɨ ca yutyi paan, tan ja̱vaha yatyi paan catsi ra ihya naha --catyí ra tsihin ña.
7 Tan quee̱ ra tsinú ra cuahan ra nu yucú indɨquɨ jana ra, tan nacatsi̱ ra intuhun indɨquɨ yoco xaahan vaha. Tsaha tsaha̱ ra tsi tɨ tsi ra cuví musu ra, tan iyaha ñi maa janduvaha̱ ra ihya tsi tɨ cua cuvi tɨ tsa catsi ra can naha ra. 8 Yaha can quihi̱n ra mantequilla tsihin letsi tan nyayu indɨquɨ can tsaha̱ ra tsatsi̱ ra tsaa̱ can naha ra nu nyacú ra naha nu vatɨ tsaha yutun can. Nyaá ra ndatú ra cuhva ra náa inga ca cuñí ra naha ra.
9 Tan tsa ndɨhɨ̱ tsatsi̱ ra naha tsica̱ tuhun ra naha tsi ra Abraham:
--¿Náa ña Sara, ñasɨɨhɨ un?
--Maa ña nyií tsitsi vehe can --catyí ra.
10 Tacan tan nacaha̱n intuhun ra ican naha ra tsihin ra:
--Tsa cua quitsi nyico yu quitsi nyehe yu tsi un quɨvɨ vityin inga cuiya, tsa cacu̱ sehe ña Sara.
Tan tsiñí ñi ña Sara tsa natuhún ra naha nu nyaá ña ityi tsata ra Abraham nu cuví yuhu vehe. 11 Tsa tsahnu ña Sara tsihin ra Abraham, tsa yaha̱ tyembu tsa cuvi coo sehe ñi. 12 Yacan cuenda ña cunyee̱ iñi ña, tsacu̱ naaha ña tan tsica̱ iñi ña: "¿Nácaa ca coo tsa sɨɨ ihya tsi ndi, tan tsa tsahnu xaan ndi?" tsica̱ iñi ña. 13 Tan nacaha̱n ra Jehová tsihin ra Abraham:
--¿Náa cuenda tsacú naaha ña Sara? ¿An ña tsinú iñi ña tyin cuvi coo sehe ña ndi maa tsa tsahnu ña? 14 ¿An iyó iin tsa ña cuvi javaha Nyoo? Quɨvɨ vityin nda natsinu cuiya cua quitsi nyehe nyico yu tsi un, tan tsa nyisó ña Sara lee tacan.
15 Tsiñi̱ ña Sara tuhun caahán ra naha quitsaha̱ yuuhví ña tan cuñi̱ ña jandavi ñaha ña tan catyí ña:
--Ñavin tsacú naaha yu --catyí ña.
Tan catyí ra can tsihin ña:
--Tsitó yu tyin tsacú naaha un --catyí ra.
Nu tsicán tahvi ra Abraham tsa cuenda ñuu Sodoma
16 Tan nduvita̱ nduñi ra tsa tsinyehe̱ tsi ra Abraham tan cuahan ra naha ityi ñuu Sodoma, nduvita̱ ndɨhɨ ra Abraham cuahan ra cua jaña ityi ra tsi ra naha. 17 Tan tsicá iñi Nyoo: "¿An cua tyihi xeehe yo tsa cua javaha yo tsihin ñuu Sodoma tsi ra Abraham, 18 tan tsa ndoo̱ yo tsihin ra tyin tsa cuenda ra cua nasoco yo tandɨhɨ ñuu tan juvin ra cua cuvi jutu iin ñuu cahnu tan ñihi? 19 Tsitó yo tyin cua jacuaha ra tsi sehe ra tan tsi tata ra, na tyaa yahvi vaha ñi ityi Nyoo tan javaha ñi tandɨhɨ maa tsa cuví tsa vaha tan tsa ndaa, tyin tacan tan cua jandaa yo tandɨhɨ tsa ndoo̱ yo tuhun tsihin ra." 20 Tacan tan catyí ra tsihin ra Abraham:
--Catyí nyɨvɨ tuhun nyɨvɨ Sodoma tan nyɨvɨ Gomorra tyin cuaha xaan cuatyi javahá ñi, tan quɨvɨ tan quɨvɨ cuahan nducuaha cuatyi ñi. 21 Cua coto maa yu tatun nditsa tsa caahán nyɨvɨ tyin cahnu xaan cuatyi ñuu can iyó, cua cuhun maa yu cunyehe yu --catyí ra.
22 Tacan tan cuahan uvi taahan ra naha ityi ñuu Sodoma, maa tyin ra Jehová ndoo̱ ra tsihin ra Abraham. 23 Natuhva̱ ra Abraham nuu ra tan catyí ra:
--¿An cua janaa ndɨhɨ un tsi nyɨvɨ vaha tsihin nyɨvɨ iyó cuatyi can? 24 Tatun iyó uvi xico utsi taahan nyɨvɨ vaha ñuu can, ¿an ña cua jaha un tucahnu iñi tsi ñuu can tsa cuenda tsa uvi xico utsi taahan ra can naha ra? 25 Ña cana iñi un cahñi un tsi ra vaha icahnu ñi tsihin nyɨvɨ caquiñi tumaa tsa tyin iyó ndɨhɨ cuatyi ñi. ¡Ña cana iñi un javaha un tacan, juee cahnu cuví un nɨɨ catsico ñuu ñayɨvɨ! ¿An ña cua javaha un cuhva cuñí tsi? --catyí ra tsihin Nyoo.
26 Tacan tan nacaha̱n Nyoo tsihin ra:
--Tatun nañihi yu uvi xico utsi nyɨvɨ vaha ñuu ican, tsa cuenda ñi ican cua jaha yu tucahnu iñi tsi nyɨvɨ ñuu Sodoma.
27 Maa tyin caahán nyico ra Abraham inga tsaha:
--Jutu mañi yu, ja̱ha maa un tucahnu iñi tsi yuhu tyin ña ndɨhɨ maa iñi yu caahán yu tsihin un tyehen, tyin Nyoo cuví un tan yuhu nduve náa cuví yu. 28 Cuvi ñi tyin yucú uvi xico uhun nyɨvɨ vaha ñuu can, ¿an ña cua jaha un tucahnu iñi tsi ñuu can tsa cuenda tsa uvi xico uhun nyɨvɨ can?
Tan nacaha̱n Nyoo:
--Tatun nañihi yu uvi xico uhun nyɨvɨ vaha, ña cua janaa yu ñuu can.
29 --Tatun iyó uvi xico nyɨvɨ vaha, ¿a cua janaa maa un ñuu ican? --catyí ra Abraham inga tsaha.
--Tsa cuenda tsa uvi xico nyɨvɨ vaha, ña cua janaa yu ñuu ican --catyí Nyoo.
30 Maa tyin ra Abraham caahán ndaahvi ra inga tsaha.
--Jutu mañi yu ña nduxaan un tatun catyi yu tsihin un tyin cuvi ñi cua nañihi un oco utsi taahan ñi nyɨvɨ vaha ñuu ican --catyí ra.
Tan nacaha̱n Nyoo tsihin ra:
--Ña cua janaa yu ñuu ican tatun iyó oco utsi nyɨvɨ vaha ican --catyí ra.
31 Tan ra Abraham jañiñí ca ra caahán ra:
--Jutu mañi yu, tsitó yu tyin ña taahán tsi cahan yu tyehen tsihin un, ña nacañi iñi maa un, maa tyin ¿náa cua cuvi tatun nañihi un oco taahan ñi nyɨvɨ vaha.
--Ña cua janaa yu ñuu can tsa cuenda tsa oco taahan nyɨvɨ vaha ican --catyí Nyoo.
32 Maa tyin jañiñí ca maa ra Abraham caahán ndaahvi ra tsihin Nyoo:
--Jutu mañi yu, jaha maa un tumañi iñi tsi yu tan ña quihin un tɨsɨhɨ tsihin yu, tyin cua cahan yu iin tsaha ña tan ña cua jatyañu ca yu tsi un. ¿Tatun nañihi un utsi taahan ñi nyɨvɨ vaha ñuu ican náa cua javaha un? --catyí ra.
Tan catyí Nyoo tsihin ra:
--Ña cua janaa yu ñuu can tsa cuenda tsa utsi taahan ñi nyɨvɨ vaha ican --catyí ra tsihin ra Abraham.
33 Yaha can tsaha cuahan ra Jehová tsa yaha ndɨhɨ natuhu̱n ra tsihin ra Abraham, tan ra Abraham cuanuhu̱ ra yuvehe ra.