Nu naa̱ ñuu Sodoma tsihin ñuu Gomorra
19
Tan ra ángel tsa cuahan nda Sodoma, tsaa̱ ra naha tsa cuñi cuaa ña ñuu ican. Tan yuhu vehe ñuu can nyaá ra Lot tan nyehe̱ ra tsi ra naha. Tacan tan nduvita̱ ra cua jatahan ra tsi ra naha tan tsicuɨñɨ tsɨtɨ ra tan tsaqui̱n ra nuu ra nda nu ñuhu. 2 Tan catyí ra tsihin ra naha:--Nyooho ra tsa vaha, ja̱ha ndo tumañi iñi co̱hon ndo yuvehe yu quitatu ndo, ican cuvi nacatya ndo tsaha ndo, tan ityaan tsa tuvi cuhun nyico maa ndo ityi cuahan ndo --catyí ra.
--Ña cua cuvi, xin. Tyahvi Nyoo xaan. Cua ndoo maa ndi tsitsi ityi cahnu ihya --catyí ra naha tsihin ra.
3 Maa tyin jañiñi̱ xaan ra Lot tsi ra naha, tsaha quihi̱n ra naha tyiñu cuahan ra naha yuvehe ra, tan tsa tsaa̱ ra tsihin ra naha, javaha̱ ra tsa cuxiñi ra naha; ica̱ ra paan tsa nduve yutsan iya yɨhɨ́ tsihin, jatyihyo̱ ra itsi, tan tsatsi̱ ra naha.
4 Tan ñaha ca cava ra naha nu cua cusu ra naha, tsaha tsaa̱ nandɨhɨ ra Sodoma naha ra, tsinu̱ nduvi ra naha vehe ra Lot. Ra tsahnu nda cuanda ra cuatyi naha ra. 5 Tan caná tsaa ra naha tsi ra Lot tan catyí ra naha:
--¿Náa ra tsa tsaa̱ yuvehe un naha ra tsa cunaaha ihya, Lot? ¡Ta̱va tsi ra naha! ¡Cuñí ndi coo ndi tsihin ra naha!
6 Quita̱ ra Lot cahan ra tsihin ra naha, tan tyasɨ̱ vaha ra yuhu vehe tsa yaha̱ quita̱ ra. 7 Tan catyí ra:
--Ja̱ha ndo tumañi iñi, yañi yo, ña ja̱vaha ndo tsa ña vaha ican. 8 Ji̱hna ndo, iyó uvi taahan sehe sɨɨhɨ yu tan ñaha ca coto ñi rayɨɨ; cua tava yu tsi ñi tan javaha ndo tsihin ñi cuhva cuñi maa ndo. Maa tyin tsihin ra ican naha ra ña javaha ndo náa javaha ndo, tyin yuvehe yu tsaa̱ ra naha tan taahán tsi jacuenda yu tsi ra naha.
9 Maa tyin nacaha̱n ra naha tsihin ra Lot:
--¡Ja̱nyaha tsi un juvin, Lot! Ña quitsi sɨɨn ra inga ñuu tava tyiñu tsi ndi náa taahán tsi javaha ndi --catyí ra naha--. ¡Yaha ca cua jacuu ndi tsa uhvi tsi un tan ñavin ca ra can naha ra! --catyí ra naha tsihin ra.
Tan tsa yaha caha̱n ra naha yacan, quitsaha̱ jacuú ra naha tsa uhvi tsi ra Lot. Tan cuahan ra naha cua canɨ ra naha yuhu vehe can. 10 Tacan tan ra yucú tsitsi vehe ra Lot, quihi̱n ra naha tsi ra jaquɨhvɨ̱ ra naha tsitsi vehe tan tyasɨ̱ nyico ra naha. 11 Tan ra Sodoma yucú nuquehe, cuaa̱ ra naha jaha̱ ra ángel can naha ra, tahan ñi nyɨvɨ tsahnu tan nyɨvɨ nyihi, tan ña cunyee̱ iñi ra naha nanducu̱ ra naha yuhu vehe can tyin cuaá ra naha.
12 Yaha can tan catyí ra ángel can naha ra tsihin ra Lot:
--¿A iyó ca nyɨvɨ un ñuu ihya? --catyí ra naha--. Ta̱va tsi sehe un, ra casa un tan nandɨhɨ ca maa yóo iyó tsi un ñuu ihya, tan qui̱ta cua̱ahan tsihin ñi. 13 Tyin maa ra Jehová jaquitsi̱ tsi ndi. janaa ndi ñuu ihya. Tyin cuaha xaan cuatyi nyɨvɨ ñuu ihya tsaá nuu ra, yacan cuenda cua janaa ndi ñuu ihya.
14 Tacan tan tsaha̱n ra Lot jacoto̱ ra tsi ra cua cuvi casa ra, tan catyí ra tsihin ra naha:
--¡Naha ndo, co̱hon ndo cua quita yo ñuu ihya tyin Nyoo cua janaa ra itsi! --catyí ra tsihin ra naha.
Tan tsicá iñi ra naha: "Caahán maa ra ihya", cuñí ra naha. 15 Tan tsa cuñí tuvi, catyí ra ángel can naha ra tsihin ra Lot:
--Ja̱numi Lot, qui̱hin ñasɨɨhɨ un tan nduvi sehe sɨɨhɨ un, qui̱ta ndo ñuu ihya. Na ña cúu un tsihin tsa cua tatsi tuñi ndi ñuu ihya --catyí ra naha tsihin ra.
16 Nyehé ra naha tyin cuee ñi cuñí ra Lot. Tɨɨ̱n ra naha ndaha ra tan tava̱ ra naha tsi ra ñuu can tsihin ñasɨɨhɨ ra tan sehe ra tyin cundaahvi̱ iñi Nyoo tsi ra tsihin nyɨvɨ ra. 17 Tan tsa quita̱ ra naha yuhu ñuu can, catyí ra naha tsihin ra:
--Tsa ñihi cuhun ndo coto cucuɨñɨ ndo nduhva ican, ña nanyehe tsata ndo, coto cúu ndo. Cua̱ahan ndo nda nu cuví yucu, tacan tan ña cúu ndɨhɨ ndo --catyí ra naha.
18 Tan catyí ra Lot:
--Ja̱ha ndo tumañi iñi, nyooho ra tsa vaha, ña cua cuvi can. 19 Cuaha xaan tumañi iñi javaha̱ ndo tsi yu tan cundaahvi̱ xaan iñi ndo tsi yu, maa tyin ña cua cuvi cacu yu nu cuví yucu ican, tyin cuvi ñi tahan tsa ña vaha can tsi yu, tan cúu yu jaha can. 20 Cu̱hva ndo ndatu cuhun ndi ñuu luhlu canyií yatyin ñi ihya, tyin ican cuvi tsaa yu tan cuvi cacu yu --catyí ra tsihin ra naha.
21 Tan intuhun ra can nacaha̱n tsihin ra:
--Vaha, cua jandaa yu tsa caahán un tan ña cua janaa yu ñuu luhlu caahán un tuhun can. 22 Maa tyin ja̱numi, cua̱ahan ñuu can tyin nduve náa cua cuvi ica yu tatun ñaha ca tsaa un ñuu luhlu can --catyí ra tsihin ra Lot.
Yacan cuenda nañí ñuu can Zoar tyin luhlu ñuu can, catyí ra Lot.
23 Ndi cuahan nanyehé ñicanyii tan tsaa̱ ra Lot ñuu Zoar. 24 Tacan tan nanduvi̱ azufre ñuhu jaha̱ ra Jehová, tan jacoyo̱ ra can sɨquɨ ñuu Sodoma tan ñuu Gomorra, tsihin can cayu̱ nyɨvɨ can. 25 Tan cayu̱ nduvi ñuu can icahnu ñi tsihin nyɨvɨ, cayu̱ tucu nduhva tsihin tandɨhɨ tsa iyó nuu tsi. 26 Tan ñasɨɨhɨ ra Lot cuahan ña nyicún ña tsi ra, maa tyin nanyehe̱ ña ityi nu quitsi̱ ña tan nanduvi̱ ña ñɨɨ, tumaa caá tsitoho caá ña cuvi̱.
27 Tan tsa tuvi can quee̱ ra Abraham cuahan ra nu natuhu̱n Nyoo tsihin ra. 28 Tan nyehe̱ ra canyii̱ yuhma nɨɨ maa Sodoma tan Gomorra tsihin nduhva can, tan tumaa ndaá yuhma tsitsi ono ña ndaá yuhma ican. 29 Tacan janaa̱ Nyoo ñuu nu tsicoo̱ ra Lot, maa tyin ñuhú iñi Nyoo tsi ra Abraham yacan cuenda tava̱ ra tsi ra Lot tsa ndi cumañi janaa ra ñuu can tsihin ñuhu̱.
30 Tan tsa yaha can, quita̱ ra Lot tsihin nduvi sehe sɨɨhɨ ra cuahan ñi cua coo ñi ityi nu iyó cuaha yucu, tan ndoo̱ ñi iyó ñi tsitsi iin cava tyin yuuhvi ra ndoo ra tsihin sehe ra nda Zoar ñuu luhlu can. 31 Tan cuvi̱ tsi iin tsaha catyí ña tsitsa sehe ra tsihin ña tyuvaa tahan ña:
--Ji̱hna, nduve ca rayɨɨ ndoo̱ nu ñuhu ñayɨvɨ ndu iin tsihin yo tumaa cuhva iyó maa nyɨvɨ, tan jutu yo tsa tsahnu ra --catyí ña--. 32 Na̱ha jacoho yo vinu tsi jutu yo tyin tacan tan coo ra tsihin yo tan ña cua cundɨhɨ tata ra --catyí ña tsihin ña tyuvaa ican.
33 Tan tsacuaa can tsiñi̱ xaan jutu ñi jaha̱ vinu tsa jacoho̱ ñi tsi ra. Tacan tan quixi̱ ñaha tsa cahnu can tsihin ra maa tyin ña tsito̱ maa ra náa cuvi̱. 34 Tan inga quɨvɨ can catyí ña tsihin ñaha tahan ña:
--Cua jacoho nyico yo vinu tsi jutu yo tañiya tan cua cuvi cusu un tsihin ra. Tacan tan ña cundɨhɨ tata ra, tyin tsa quixi̱ yu tsihin ra tsacuaa icu --catyí ña tsihin ña tyuvaa tahan ña.
35 Tan tsacuaa can jacoho̱ nyico ñi vinu tsi jutu ñi, tan quixi̱ ña tyuvaa can tsihin ra, maa tyin ña tsito̱ maa ra náa cuvi̱ tsacuaa ican. 36 Tan nduvi taahan ñi can, ñihi̱ sehe ñi tsa tacan javaha̱ ñi tsihin jutu ñi. 37 Tan tsicoo̱ sehe ña tsitsa ican tan jacunañi̱ ña tsi lee can Moab, tan tata ra ican cuví nandɨhɨ nyɨvɨ Moab. 38 Tan Ben-ammi nañí sehe ña tyuvaa tahan ña, tan tata ra can cuví nandɨhɨ nyɨvɨ Amon.