Ra Abraham tsihin ra Abimelec
20
Tan ra Abraham quita̱ ra cuahan ra ityi Neguev tan tsicoo̱ ra tumaa ra inga ñuu nda Gerar nu cuví xahñu Cades tsihin Shur. 2 Ñuu Gerar can cuví nu catyi̱ ra tyin ñaha cuhva ra cuví tsi ña Sara.Tacan tan ra Abimelec, rey ñuu can, jacuhu̱n ra tsi ra cua quihin tsi ñaha can, tyin cuvi ña ñasɨɨhɨ ra. 3 Maa tyin tsacuaa ican caha̱n Nyoo tsihin rey can tsitsi ñimaahna tan catyí tsi tyehen: "Tsa catyi ñaha quihi̱n un cua cuvi ñasɨɨhɨ un cua cúu un tyin ñaha iyó yɨɨ cuví ña."
4 Maa tyin ñaha ca coo rey can tsihin ñaha can, yacan cuenda catyí ra: "¿A cua cahñi un tsi iin ra nduve cuatyi iyó, Tyatya? 5 Tyin nduve náa tsa ña vaha javaha̱ yu. Catyí ra Abraham tyin ñaha cuhva ra cuví tsi ña, tan tacan caahán ndɨhɨ maa ña: "Cuhva yu cuví tsi ra", catyí ña. Yacan cuenda javaha̱ yu tyehen tsihin tsa vaha tsicá iñi yu", catyí ra Abimelec tsihin Nyoo.
6 Tan catyí Nyoo tsihin ra tsitsi ñimaahna can: "Tsitó vaha maa yu tyin tsihin tsa vaha tsicá iñi un javaha̱ un tacan, yacan cuenda ña tsaha̱ yu javaha un cuatyi tsihin ña ityi nuu yu. 7 Tyin yɨɨ ña, ndusu yuhu Nyoo cuví ra, tan maa ra cua cahan ndaahvi tsa cuenda un tan ña cúu un. Na̱cuhva cuenda tsi ña tsi ra, tyin tatun ña nacuhva cuenda un tsi ña tsi yɨɨ ña, tsa nditsa tyin cua cúu un tsihin nandɨhɨ nyɨvɨ un", catyí Nyoo tsihin ra.
8 Tan tsa tuvi can cana̱ ra Abimelec tsi nandɨhɨ musu ra tan catyi̱ tuhun ra ñimaahna can tsihin ra naha. Tan yaha xaan nayuhvi̱ ra naha tsiñi̱ ra naha ñimaahna can. 9 Yaha can, cana̱ ra tsi ra Abraham tan catyí ra:
--¿Maa tahan cumañi̱ yuhu tsi un, ñi?, tyin nducu̱ vaha un cuatyi cahnu cunyii sɨquɨ yu tan sɨquɨ ñuu yu. ¡Nye̱he jihna tsa javaha̱ un!, tsa ña taahán tsi javaha un, yacan javaha̱ un tsihin yu. 10 Tan tsa javaha̱ un tacan, ¿náa tsicá iñi un cuhva can? --catyí ra tsihin ra Abraham.
11 Nacaha̱n ra Abraham tan catyí ra:
--Tsicá iñi maa yu tyehen: "Ñuu ihya ña yuuhvi nyɨvɨ nyehé ñi tsi Nyoo tan cuví cahñi ñi tsi yo tsa catyi ñasɨɨhɨ yo tyin sɨɨ xaan caá ña", cuñí yu tsicá iñi yu. 12 Tan tsa nditsa maa, tyin ñaha cuhva yu cuví tsi ña. Iin ñi jutu ndi maa tyin sɨɨn sɨhɨ ndi, tan naquihi̱n yu tsi ña. 13 Tan quɨvɨ catyi̱ Nyoo tsihin yu tyin quita yu yuvehe jutu yu tsica̱n yu tumañi iñi can tsi ña: "Tandɨhɨ maa nu cua tsaa yo nu cuhun yo, ca̱tyi un tyin ñaha cuhva yu cuví tsi un."
14 Tacan tan nacuhva̱ cuenda rey can ñasɨɨhɨ ra Abraham, tan tsaha̱ maa ra mbee, indɨquɨ, musu rayɨɨ tan musu ñaha. 15 Tan catyí ra:
--Nɨɨ maa ihya cuví ñuhu yu, na̱nducu numaa taahán iñi maa un coo un.
16 Tan catyí ndɨhɨ ra tsihin ña Sara:
--Yoñi cua cahan ndasɨ tsata un, tyin mil xuhun cuitsin tsaha̱ yu tsi ra cuhva un, yacan cua cuvi tsa ndaa ityi nuu nyɨvɨ yucú tsihin ndo tyin nduve cuatyi un iyó --catyí rey can tsihin ña Sara.
17-18 Tacan tan caha̱n ndaahvi ra Abraham tsihin Nyoo tsa cuenda ra Abimelec tan nduvaha̱ ra, tan tacan tucu ñi ñasɨɨhɨ ra tsihin ñi cuví musu ra nduvaha̱ ñi, tyin tsa catyi ña Sara, ña cuvi̱ ca coo sehe ñi, jaha̱ Nyoo.