Nu cundaa̱ tsa caha̱n Nyoo tsihin ra Abraham tsihin ña Sara
21
Tan jandaa̱ ra Jehová tuhun tsa ndoo̱ ra tsihin ña Sara quɨvɨ tsa tyaa̱ ra cuhva, ña naa̱ iñi ra tsi ña. 2 Tan tsicoo̱ sehe ña quɨvɨ tyaa̱ ra tuhun tsihin ñi, tan tsa tsahnu vaha ra Abraham, yɨɨ ña, tyembu can. 3 Tan jacunañi̱ ra Abraham Isaac tsi lee sehe ñi. 4 Tsa quita̱ una nduvi lee can, tsahnya̱ ra ñɨɨ nu ica tsi lee can, cuhva ndoo̱ maa Nyoo tuhun tsihin ra. 5 Tan cientu cuiya ra iyó quɨvɨ cacu̱ ra Isaac. 6 Tan cuñí ña Sara tsicá iñi ña: "Tsacú naaha yu tyin sɨɨ cuñí yu jaha̱ Nyoo, tan tacan tucu nyɨvɨ tsa cua coto tyin iyó sehe yu, sɨɨ cua cuñi ndɨhɨ ñi tsihin yu. 7 Ndi maa tsahnu yɨɨ yu iyó sehe ra tsihin yu. Yoñi maa tsica̱ iñi tatun tsaa quɨvɨ coo sehe ndi tan jacaxin yu itsi, tyin yuhu ñaha numa cuví yu", cuñí ña tsicá iñi ña.8 Tan tsa tsa cahnu ra luhlu sehe ñi, javaha̱ ra Abraham vico ra quɨvɨ jaña̱ ra tsa tyaxín ra.
Nu jacunu̱ ra Abraham tsi ña Agar tsihin sehe ña
9 Tan nyehe̱ ña Sara tyin ra Ismael, ra cuví sehe ra Abraham tsihin ña Agar, ña Egipto, tsacú nducu ra tsi ra Isaac, sehe ña. 10 Tacan tan catyí ña tsihin ra Abraham, yɨɨ ña: "Ja̱cunu tsi ña Agar tsihin sehe ña, tyin ña cuvi ndoo sava tsa taahán tsi ra Isaac sehe yo tsihin sehe ña can", catyí ña.
11 Tan yaha xaan cuiihya cuñi̱ ra Abraham tsihin tuhun can tyin sehe ra cuví ndɨhɨ tsi ra luhlu can. 12 Maa tyin catyí Nyoo tsihin ra: "Ña caca xaan iñi un tsa cuenda ra luhlu can tsihin sɨhɨ ra. Ja̱ndaa tandɨhɨ tsa caahán ñasɨɨhɨ un tsihin un tyin tsa cuenda ra Isaac, sehe ña, cua coo cuaha tata un. 13 Tacan tucu ñi ra luhlu, sehe ña Egipto can, cuaha tata ra cua coo tyin juvin ñi sehe un cuví tsi ra", catyí Nyoo tsihin ra Abraham.
14 Tan tsa tuvi̱ inga quɨvɨ can, yatyi xaan nduvita̱ ra, tan quihi̱n ra paan tan iin ñɨɨ nu yɨhɨ́ ndutya ticaa̱ ra xiin ña Agar, tan nacuhva̱ cuenda ndɨhɨ ra tsi ra Ismael, sehe ña tsi ña, tan jacuhu̱n ra tsi ñi. Tacan tan cuahan ña tsicá ndaahvi maa ña ityi nu tsɨquɨ nu nañí Beerseba. 15 Tan tsa ndoco̱ ndutya yɨhɨ́ tsitsi ñɨɨ nyisó ña, tsaqui̱n ña tsi ra luhlu sehe ña tsaha cuhu. 16 Tyin ña cuñí ña nyehe ña nu cúu ra, tan cañi cuahan ña cua cunyaa ña. Tan navacu̱ tsaa ra luhlu can cuhva tsa tsinyaa̱ ña ican.
17 Tan tsiñi̱ Nyoo tyin tsacú tsaa ra luhlu can, nacaha̱n ángel Nyoo sɨvɨ ña ityi andɨvɨ: "¿Náa taahán un, Agar? Ña na̱yuhvi un, tsiñi̱ Nyoo tsacú ra luhlu can. 18 Cua̱ahan cua quihin tsi ra tan coto jaña ndaha un tsi ra tyin cahnu ñuu cua cuvi tata ra cua jaha yu, catyí Nyoo", catyí ángel can tsihin ña Agar.
19 Tacan tan janaha̱ Nyoo nu nyaá iin soco nu caná ndutya tsi ña, tan tsaha̱n ña tsijacutu̱ ña ñɨɨ ndaha ña, tan tsaha̱ ña ndutya tsihi̱ ra luhlu sehe ña. 20-21 Tan ra luhlu can cuvi̱ ra iin ra tutsí tsihin nduva tsa yaha̱ tsahnu̱ ra tyin maa Nyoo jatyinyee̱ tsi ra. Tan jatindaha̱ sɨhɨ ra tsi ra tsihin iin ñaha Egipto tan tsicoo̱ ra nu tsɨquɨ nu nañí Parán.
Nu ndoo̱ ra Abimelec tuhun tsihin ra Abraham
22 Tan juvin ñi maa tyembu can, tsaha̱n ra rey Abimelec tsihin ra Ficol, ra cuví nuu tsihin jandaru ra, tsicaha̱n ra tsihin ra Abraham tan catyí ra:
--Tsitó yu tyin jatyinyee̱ Nyoo tsi un tsihin tandɨhɨ maa tsa javahá un. 23 Yacan cuenda cuñí yu catyi un tsihin yu vityin ihya ityi nuu Nyoo, tyin ña cua javaha un tsa ña vaha tsi yu, tan ndi tsihin sehe yu ndi tsihin sehe yañi yu, tyin tumaa cuhva cundaahvi̱ iñi yu tsi un, tacan cua javaha un tsihin yu tan tsihin nyɨvɨ ñuu yu, nu iyó un ihya vityin --catyí ra rey can.
24 Tan catyí ra tsihin ra rey can:
--Tacan cua javaha maa yu --catyí ra.
25 Tan catyi̱ tuhun ra tsa nacuu̱ musu maa ra rey can tyin quinyaa̱ ra naha iin soco nu tsihí ra ndutya. 26 Tan nacaha̱n ra can tsihin ra:
--Ña tsitó yu yóo javaha̱ yacan, tan ¿náa cuvi ña jacoto̱ yatyi un can tsi yu?, tyin ña tsitó yuhu can --catyí rey can.
27 Tacan tan quihi̱n ra Abraham mbee tan indɨquɨ nacuhva̱ ra tsi ra rey can, tan ndoo̱ nduvi ra naha tuhun juvin ñi maa quɨvɨ can. 28 Maa tyin jasɨɨ̱n ra utsa taahan mbee sɨɨhɨ tsitsi cora can. 29 Tan tsica̱ tuhun ra rey can tsa cuenda yacan:
--¿Náa cuenda jasɨɨ̱n un utsa taahan mbee sɨɨhɨ can naha tɨ?
30 Tan catyí ra Abraham:
--Tyin tsa utsa taahan mbee sɨɨhɨ cua naquihin un ihya, cua cuvi tɨ naha tɨ tsa ndaa tyin yuhu tsatya̱ soco can --catyí ra.
31 Tsa cuenda yacan nañí ican Beerseba tyin ican tsinuhñi̱ tuhun jaha̱ ra Abraham tsihin ra Abimelec.
32 Tan tsa yaha ndoo̱ ra naha tuhun nu nañí Beerseba can, cuanuhu̱ ra rey can nda Filistia tsihin ra Ficol, ra cuví nuu tsihin jandaru ra. 33 Tan ra Abraham tatsi̱ ra iin yutun tamarisco nda Beerseba nu iyó ra, tan ican caahán ndaahvi ra tsihin ra Jehová Nyoo nyito. 34 Tan cuaha xaan cuiya tsicoo̱ ra ñuu ra Filistia naha ra.