Nu nducu̱ cuhva Nyoo tsi ra Abraham tatun tsinú iñi ra tsa caha̱n ra
22
Cuaha quɨvɨ yaha̱ tan nducu̱ cuhva Nyoo tsi ra Abraham tatun tsinú iñi ra tsa caha̱n ra. Tan catyí ra:--Abraham.
--Maa yu ihya --catyí ra Abraham.
2 --Qui̱hin tsi ra Isaac, sehe mañi un, cua̱ahan tsihin ra nda ñuhu Moriah, tan ja̱mañi un tsi ra nuu yu jiñi yucu tsa cua janaha yu tsi un -catyí Nyoo tsihin ra.
3 Tan yatyi xaan nduvita̱ ra tsa tuvi inga quɨvɨ can tan tyihi̱ ra tyayu urru jana ra, tan tsahnya̱ ra nducu cua cayu tsa cua jamañi ra, cana̱ ra uvi musu ra tan cana̱ ndɨhɨ ra tsi ra luhlu sehe ra. Tsaha cuahan ra naha nu cuví ñuhu Moriah. 4 Tan tsa uñi quɨvɨ tsicá ra cuahan ra ityi nu tava̱ tyiñu Nyoo tsi ra, tan nanyehe̱ ra jiñi yucu can tsa ndi cañi ca vatsí ra. 5 Tan catyí ra tsihin musu ra:
--Cu̱atu ndo ihya tyin cuahan yu tsihin ra luhlu ihya nda ndacan cua jacahnu ndi tsi Nyoo, tsaha vatsi nyico ndi. Ndoo maa urru ihya tsihin ndo --catyí ra.
6 Tacan tan tsaha̱ ra nducu can nyisó ra luhlu sehe ra, tan quihi̱n ra cutsilu tan ñuhu̱ ndahá ra, tsaha cuahan ra naha. 7 Ña naha ñi tan tsica̱ tuhun ra luhlu can tsi ra:
--Tsiñí un, tyaa.
--¿Náa cuñí un, jutu yu? --catyí ra tsihin sehe ra.
Tan catyí ra luhlu can tsihin ra:
--¿Náa mbee tsa cua jamañi yo? tyin ñuhu̱ tsihin nducu ñi nyisó yo tan nduve mbee vatsí tsihin yo --catyí ra.
8 Tan catyí jutu ra tsihin ra:
--Maa Nyoo cua cuhva mbee tsa cua jamañi yo, jutu yu --catyí ra tsihin sehe ra, cuahan ra naha icaa ñi.
9 Tan tsa tsaa̱ ra naha jiñi yucu can, javaha̱ ra iin ata tan tyiso̱ vaha ra nducu nuu ata can. Tacan tan tsahñi̱ ra ndaha ra luhlu can tsihin tsaha ra, tan tsaqui̱n ra tsi ra nuu nducu can. 10 Tan cuhva tsa quihi̱n ra cutsilu tsa cua cahñi ra tsi ra luhlu can, 11 cana̱ tsaa ángel Nyoo tsi ra:
--¡Abraham, Abraham!
--Náa, Jutu mañi yu --catyí ra nacaha̱n ra.
12 --Ña ja̱vaha un náa javaha un tsi ra luhlu can tyin tsa tsitó yu tyin tsinú iñi un tsi Nyoo, tyin ña catyi̱ un: "Ña cuhva yu sehe yu tsi Nyoo, intuhun ñi ra cuví sehe mañi yu" ―catyí ángel can tsihin ra.
13 Tacan tan nanyehe̱ tsata ra Abraham, tan nyehe̱ ra iin mbee ticatyi nyií tɨ tsicu̱n ndɨquɨ tɨ tyañu soco yutun iñu, tan tsiquihi̱n ra tsi tɨ jamañi̱ ra nuu Nyoo, tan ña jamañi̱ ca ra tsi ra luhlu sehe ra. 14 Tsa yaha can jacunañi̱ ra jiñi yucu can: "Maa ra Jehová cua cuhva." Yacan cuenda ndi catyí nyɨvɨ vityin: "Nu cuví jiñi yucu maa Nyoo, ican ñihí yo tsa tsiñi ñuhu tsi yo."
--Tyehen caahán ra Nyoo tyin ndoo̱ ra tuhun tsihin maa ra tyin tyaa̱ yahvi un tsa caha̱n ra tsihin un tan ña jaxii̱ un sehe mañi un tsi ra, 17 cua nasoco ra tsi un tsa nditsa maa. Tumaa tsa cuaha tiñuu ityi sɨquɨ tan tumaa tsa cuaha nyɨtɨ yuhu ndutya ñuhu, tacan cuaha tata un cua jaha ra. Tan tandɨhɨ maa tsaha cua jacanaa ra naha tsi ra xaan iñi tsi ra naha. 18 Tan tata un ican cua nasoco tsi tandɨhɨ maa ñuu iyó nu ñuhu ñayɨvɨ, tsihin cuhva can cua nasoco ra tsi ñi, tyin tyaa̱ yahvi un tsi ra, catyí ra --catyí ángel can tsihin ra.
19 Tan quita̱ ra naha jiñi yucu can, tan natsaa̱ nyico ra nu yucú ra cuví musu ra, tacan tan cuanuhu̱ ra naha iin caa ñi nda Beerseba nu ndoo̱ ra iyó ra.
Nyɨvɨ tata ra Nacor
20 Tan cuaha quɨvɨ yaha, tan tsito̱ ra Abraham tyin tsicoo̱ ndɨhɨ sehe ña Milca ñasɨɨhɨ ra Nacor, yañi ra. 21 Tan sehe nuu ñi cuví ra Uz, sehe tsinu uvi ñi cuví ra Buz, tan sehe tsinu uñi ñi cuví ra Kemuel, ra cuví jutu ra Aram. 22 Tan inga ca sehe ñi cuví ra Quesed, ra Hazo, ra Pildas, ra Jidlaf tan ra Betuel. 23 Tan tsa una taahan ra can naha ra cuví sehe ña Milca ñasɨɨhɨ yañi ra Abraham. Tan ra Betuel sehe ñi can cuví jutu ña Rebeca.
24 Tan inga sehe ra Nacor tsihin ña Reúma, ña cuví tumaa ñasɨɨhɨ ra, cuví ra ihya naha ra: ra Teba, ra Gaham, ra Tahas tan ra Maaca.