Nu tsihi̱ ña Sara tan quɨhvɨ̱ ñuhu ña nu jata̱ ra Abraham nu ndaa cumisantu
23
Tan cientu oco utsa cuiya tsicoo̱ ña Sara nu ñuhu ñayɨvɨ ihya. 2 Tan tsihi̱ ña nda Quiriat-arba tan inga sɨvɨ ñuu can cuví Hebrón, nu cuví ñuhu cuenda Canaán. Tan tsacu̱ xaan ra Abraham tan cuaha quɨvɨ jacahnu̱ ra cuñu ñuhu ña. 3 Yaha can tan quita̱ ra nu canyií cuñu ñuhu can tan tsicaha̱n ra tsihin nyɨvɨ tata ra Het, tan catyí ra:4 --Nyooho tsaa, xi̱co ndo juhva ñuhu nu cundaca yu cuñu ñuhu ñasɨɨhɨ yu ihya tan quɨhvɨ ñuhu ña, ndi maa tsa ñavin ra ñuu ndo ihya cuví yu --catyí ra.
5 Tan catyí ra naha tsihin ra:
6 --Nduve cuenda maa, cua̱ahan, cua cutsi cuñu ñuhu ñasɨɨhɨ un nu ndaa cumisantu ndi, ndi intuhun ndi ña cua casɨ nu cutsi un cuñu ñuhu ñasɨɨhɨ un. Tyin cuví un iin ra nacatsi̱ Nyoo tsa cuenda ndi --catyí ra naha.
7 Tacan tan nduvita̱ ra tan jaha̱ ra tsa cahnu cuví nyɨvɨ tata ra Het tsihin tsa nacaqui̱n ra jiñi ra. 8 Tan catyí ra tsihin ra naha:
--Tatun nditsa ndo tyin cuñí ndo tsa cucutsi yu cuñu ñuhu ñasɨɨhɨ yu ican, ja̱ha ndo tumañi iñi ca̱han ndo tsa cuenda yu tsihin ra Efrón sehe ra Zohar, 9 na xico ra yavi yuu cuenda Macpela, tsa canyií cuenda ra, tan cua tyahvi maa yu cuhva yahvi can. Tan cua cuvi tsii yu iin ñaña nu cuví ñuu ihya ―catyí ra.
10 Tan nyií ndɨhɨ maa ra Efrón can mahñu ra can naha ra tan nacaha̱n ra tsihin ra Abraham nuu nandɨhɨ sehe ra Het tan nuu nandɨhɨ nyɨvɨ yahá yuhu vehe ñuu can:
11 --Vaha maa yooho ra tsa vaha. Maa tyin cua cuhva ndɨhɨ yu ñuhu nu canyií yavi yuu can tsi un, tyin ña cuvi xico yu yavi yuu ican ñi. Tan ityi nuu nandɨhɨ nyɨvɨ ñuu yu ihya nacuhvá cuenda yu ñuhu can tsi un. Cua̱tyiñu yavi yuu can tsa cuenda cuñu ñuhu ñasɨɨhɨ un --catyí ra.
12 Tacan tan tsaha̱ nyico ra Abraham tsa cahnu cuví nyɨvɨ ñuu can tsihin tsa nacaqui̱n ra iñi ra nuu ñi. 13 Tan catyí ra tsihin ra Efrón ityi nuu nandɨhɨ nyɨvɨ ñuu can:
--Tya̱a soho jihna tatun taahán iñi un, cua tyahvi yu cuhva yahvi ñuhu can. Ja̱ha tumañi iñi quihin un xuhun tsa cuenda ñuhu can. Yaha can tan cua quɨhvɨ ñuhu ñasɨɨhɨ yu ican --catyí ra tsihin ra Efrón.
14 Tan nacaha̱n ra Efrón tsihin ra:
15 --Ji̱hna, yooho ra tsa vaha, tyaa soho jihna, cumi cientu xuhun cuitsin cuví yahvi ñuhu can, ña yahvi cuví can tsa cuenda yoo. Cua̱ahan cua cutsi cuñu ñuhu ñasɨɨhɨ un --catyí ra tsihin ra.
16 Tacan quihi̱n ra Abraham tyiñu tsa cua tyahvi ra yahvi ñuhu can. Tan ityi nuu nandɨhɨ nyɨvɨ can cueta tyahvi̱ ra tsa cumi cientu xuhun cuitsin tsi ra Efrón can cuhva taahán maa tsi. 17 Tacan jata̱ ra ñuhu ra Efrón can, tandɨhɨ maa yutun nyacú nu ñuhu can, tan yavi yuu tsa canyií ityi Macpela yatyin cuenda Mamre ityi caná ñicanyii. Tan nanɨɨ maa ñuhu can, 18 ndoo̱ can cuví can tsií ra Abraham ityi nuu nandɨhɨ nyɨvɨ Het nyacú can tan ñi tsa yahá yuhu vehe ñuu can, cuvi̱ ñi tsa ndaa cuenda can.