Nu nacatyi̱ tuhun ra José tsa cuñí cahan uvi taahan ñimaahna
40
Cuaha quɨvɨ yaha̱, tan ra nyaá tyiñu tyihí copa nuu ra faraón tan ra javahá paan, nacuu̱ ra naha iin tsa ña taha̱n iñi ra faraón. 2 Xaan xaan cuñi̱ ra jaha̱ ra nyehé tyiñu can naha ra, 3 jacuhu̱n ra tsi ra naha vehe caa nyaá yuvehe ra cuví nuu tsihin jandaru jacuendá yuvehe ra, tan cuɨtɨ maa nu nyií ra José cuví can. 4 Tan ra cuví nuu can tava̱ tyiñu ra tsi ra José na jacuenda ra tsi ra naha.5 Tan cuvi̱ tsi tsa nyehe̱ nduvi taahan ra naha ñimaahna iin ñi tsacuaa, tan ñimaahna can iyó iyó ñi tsa cuñí tsi cahan can. 6 Tan tsa tuvi̱ tsinyehe̱ ra José tsi ra naha tan nyehe̱ ra tyin cuiihya xaan cuñí ra naha. 7 Tan tsica̱ tuhun ra:
--¿Náa cuenda ndaahvi xaan cuñí ndo vityin? --catyí ra.
8 --Ñimaahna nyehe̱ ndi tan ihya yoñi catyi tuhun tsihin ndi náa cuñí cahan ñimaahna can --catyí ra naha.
Tan catyí ra:
--Maa Nyoo tsahá cuhva cutuñi iñi yo tsa cuñí cahan ñimaahna. Ca̱tyi tuhun ndo ñimaahna nyehe̱ ndo --catyí ra.
Ñimaahna nyehe̱ ra cuvi̱ nuu tsihin ra tyihi̱ copa
9 Tacan tan quitsaha̱ caahán ra tyihi̱ copa can ñimaahna nyehe̱ ra tsihin ra José, tan catyí ra:
--Nyehe̱ yu nyaá iin tsaha yoho tsa tsahá uva, 10 tan uñi soco tun nyacú. Tan quitsaha̱ caná xehe tun, yaha can tan tsaá ita tun, tan quitsahá tsityí uva tan cuenda ndoco cu tsityí. 11 Quihi̱n yu uva can natɨɨ̱n yu tsitsi copa ra faraón tan tsaha̱ yu can tsihi̱ ra, nyehe̱ yu --catyí ra.
12 ―Tyehen cuñí tsi catyi ñimaahna nyehe̱ un --catyí ra José tsihin ra―. Tsa uñi soco tun can cuñí tsi catyi, uñi quɨvɨ. 13 Tsitsi tsa uñi quɨvɨ, cua nducuhun iñi ra faraón tsi un tan tsa javaha̱ un, maa tyin cua cundaahvi iñi ra tsi un tan cua cuhva cuenda nyico ra tyiñu tsa nyehe̱ un tsi un, tan cua tyihi nyico un copa ndaha ra tumaa javaha̱ maa un nda jihna. 14 Quɨvɨ cundaa can, ña naa iñi un tsi yu, ja̱ha tumañi iñi ca̱han tuhun yu tsihin ra faraón, na tava ra tsi yu vehe caa ihya. 15 Tyin nduve cuatyi yu tsicoo̱ tan quɨhvɨ̱ yu vehe caa, tsihin tsa ñiñi quihi̱n ra naha tsi yu nda ñuu yu tan tsaa̱ yu ñuu ihya ―catyí ra José.
Ñimaahna nyehe̱ ra cuvi̱ nuu tsihin ra javaha̱ paan
16 Nyehe̱ ra cuvi̱ nuu tsihin ra javahá paan naha ra tyin vaha cuhva tsaha̱ cuenda ra José tsa caahán ñimaahna can, tan caahán ra tsihin ra José:
--Tyehen nyehe̱ tucu yuhu ñimaahna, José. Uñi tyica paan yucú jiñi yu. 17 Tan tyica nyií nda sɨquɨ ca cuaha xaan nuu paan yucú tsitsi can cua cuhva yu catsi ra faraón, maa tyin quitsi̱ saa tan quitsaha̱ tsatsí tɨ naha tɨ paan can, nyehe̱ yu --catyí ra tsihin ra José.
18 ―Tsa cuñí cahan ñimaahna can cuví tsehe --catyí ra José tsihin ra--. Tsa uñi tyica paan can cuñí tsi catyi uñi quɨvɨ. 19 Tsitsi tsa uñi quɨvɨ cua nducuhun iñi ra faraón tsi un tan tsa javaha̱ un, ña cua cundaahvi iñi ra tsi un, cua quɨhɨ yoho jucu un tan cua ticaa ra naha tsi un nu yutun, tan cua catsi nditsii cuñu un --catyí ra José tsihin ra.
Nu cundaa̱ tsa caha̱n ñimaahna tsihin nduvi taahan ra cuvi̱ musu nuu ra faraón
20 Tsa quita̱ uñi quɨvɨ tsa caha̱n ra José tuhun, maa maa quɨvɨ can taha̱n tsi quɨvɨ cacu̱ ra faraón tan javaha̱ ra iin vico cahnu, nacana̱ ra nandɨhɨ ra cuví tyiñu nuu ra. Tan tava̱ tyiñu ra tsi musu ra tan catyí ra:
―Cua ta̱va ndo tsi ra cuvi̱ nuu tsihin ra tyihí copa tan ra cuvi̱ nuu tsihin ra javahá paan, ra yucú vehe caa naha ra ―catyí ra ityi nuu nandɨhɨ ra nyacú vico can.
21 Tacan tan tsiquihi̱n ra naha tsi nduvi taahan ra can naha ra, tan tsaa̱ ra naha nuu ra faraón tsihin ra naha, tan catyí ra faraón tsihin ra tyihi̱ copa can:
―Tyi̱hi nyico copa yu tumaa javaha̱ maa un nda jihna ―catyí ra.