Ra José tan ñasɨɨhɨ ra Potifar
39
Quɨvɨ tsaa̱ ra José tsihin nyɨvɨ Ismael nda Egipto, iin ra nañí Potifar, ra cuví nuu tsihin jandaru tsa jacuendá yuvehe ra faraón, jata̱ ra tsi ra. 2 Tan tsicoo̱ vaha xaan ra yuvehe ra Potifar can, nduve náa cumañí tsi ra tyin maa Nyoo nyaá tsihin ra. 3 Tan tsitó ra Potifar tyin tsa cuenda ra José nasocó ra Jehová tsi ra, tyin tandɨhɨ maa tsa javahá ra José quitá vaha. 4 Tsitó ra tyin ña cua ndoyo ñuhu tyiñu jaha ra José, yacan cuenda tyiso̱ ra tsi ra cua nyehe ra tandɨhɨ tyiñu yuvehe ra tan nacoo̱ ra tandɨhɨ tsa iyó tsi ra ndaha ra can. 5 Nda quɨvɨ quitsaha̱ jacuendá ra José yuvehe ra, tan tandɨhɨ ndaha tyiñu ra tan tsitsi cuhu, quitsaha̱ nasocó Nyoo tsi ra. 6 Nduve ca náa tsicá iñi ra tyin ra José nyehé tandɨhɨ tyiñu can, intuhun ña tsa tsicá iñi ra cuví tatun vaha tsinú tsa cua catsi ra.Tan sɨɨ xaan caá ra José. 7 Tan cuvi̱ tsi tsa yaha̱ juhva tyembu, ñasɨɨhɨ tsitoho ra, quɨhvɨ̱ xaan iñi ña tsi ra tan cuñí ña coo ña tsihin ra, tan catyí ña tsihin ra iin tsaha:
--Cu̱su tsihin yu.
8 Maa tyin ña cuñi̱ ra tan catyí ra tsihin ña:
--Ji̱hna, tumaa tsa nyií yu ihya, nduve náa tsicá iñi tsitoho yu, tyin yuhu jacuendá tandɨhɨ tsa iyó tsi ra. 9 Cahnu cuví yuhu yuvehe ihya, tandɨhɨ maa tsa iyó tsi ra nacuhva̱ cuenda ra tsi yu quɨhɨ ndaha yu, maa tyin intuhun ñi yooho ña tsaha ra quɨhɨ ndaha yu tyin ñasɨɨhɨ ra cuví un. Ña cuví coo yu tsihin un tyin cuatyi cuví can, tan coo cuatyi yu nuu Nyoo --catyí ra tsihin ña.
10 Tacan caahán ña tsihin ra tandɨhɨ maa quɨvɨ, maa tyin ña tyaá yahvi ra tsa caahán ña tsa cuñí ña coo ra tsihin ña. 11 Tan iin quɨvɨ yoñi maa yucú yuvehe ra Potifar intuhun ñi maa ñasɨɨhɨ ra can nyií tan quɨhvɨ̱ ra José cua jatyiñu ra. 12 Tsa nyehe̱ ña tsi ra tɨɨ̱n ña jahma ra tan ixta caa̱ ña tsi ra tan catyí ña:
--Ca̱va tsihin yu --catyí ña.
Tan ra ican ña cuñi̱ ra tan tsinú xaan ra quita̱ ra tan ndoo̱ jahma ra yɨhɨ́ ndaha ña. 13 Tsa nyehe̱ ña tyin quita̱ ra, tan ndoo̱ jahma ra ndahá ña, 14 cana̱ ña musu ña tan catyí ña tsihin ñi:
--Ji̱hna ndo, nducu̱ vaha yɨɨ yu tsi ra hebreo ihya vacu nducu tsi yo, quɨhvɨ̱ ra nu nyií yu tan nducu̱ ixta caa ra tsi yu, maa tyin yuhu quitsaha̱ caná tsaa yu. 15 Tan tsa nyehe̱ ra tyin caná tsaa yu quicunu̱ ra cuahan ra tan naa̱ iñi ra jahma ra ihya --catyí ña tsihin ñi.
16 Tan ndoo̱ jahma ra tsihin ña nda cuanda tsa tsaa̱ nuhu yɨɨ ña. 17 Tsa tsaa̱ ra tan catyí ña tsihin ra:
--Ji̱hna, quitsi̱ nu José tsa jata̱ un, tan nducu̱ ixta caa nu tsi yu. 18 Maa tyin tsa nyehe̱ nu caná tsaa yu tsinú xaan nu quita̱ nu cuahan nu tan naa̱ iñi nu jahma nu ihya ―catyí ña.
19 Ñuhu̱ tɨɨ̱n tsi ra cuñí ra tsa tsiñi̱ ra tsa caahán ñasɨɨhɨ ra tyin tacan nducu̱ ra José javaha̱ ra tsihin ña. 20 Iyaha ñi tava̱ tyiñu ra na cutyihi ra naha tsi ra José vehe caa. Tan vehe caa nu quɨhvɨ̱ ra can cuví nu yucú ra cuvi̱ musu ra faraón. Tan ican tsinyii̱ ra. 21 Maa tyin ña nacoo̱ Nyoo tsi ra José, cundaahví iñi Nyoo tsi ra, tan maa Nyoo jaha̱ tsa ñihi̱ ra tumañi iñi nuu ra cau yɨhɨ́ ndaha vehe caa can. 22 Yacan cuenda nacoo̱ ra can nandɨhɨ ra yucú vehe caa can naha ra ndaha ra José, tatun náa tyiñu cua coo, ra José tavá tyiñu tsi ra naha. 23 Tan ña ñiñi ca cuñí tsi jacuendá ra cau can tsi nyɨvɨ yɨhɨ́ ndaha ra José tyin tandɨhɨ maa tsa javahá ra José nasocó Nyoo can.