Ra Judá tsihin ña Tamar
38
Tan cuvi̱ tsi tsa quita̱ tsiyo ra Judá nuu yañi ra tan cuahan ra nu iyó ra nañí Hira, ra ñuu Adulam. 2 Ican nacoto̱ ra ñaha sehe ra nañí Súa, ra ñuu Canaán tan tindaha̱ ra tsihin ña, 3 tan tsicoo̱ sehe nuu ñi tan jacunañi̱ ra lee can, Er. 4 Tsicoo̱ inga sehe ñi tan jacunañi̱ ra Onán tsi lee can. 5 Tan tsa ndi yucú ñi nda Quezib tsicoo̱ inga sehe ñi, tan Sela nañí lee can jaha̱ ñi.6 Tsa tsahnu̱ ra naha, jatindaha̱ ra Judá tsi ra Er, sehe nuu ra, tsihin ñaha nañí Tamar. 7 Maa tyin ña taha̱n iñi Nyoo cuhva iyó ra Er, yacan cuenda tsihi̱ ra tan ndoo̱ ndaahvi ñasɨɨhɨ ra. 8 Tacan tan catyí ra Judá tsihin ra Onán:
--Na̱quihin tsi ña Tamar tsa cuvi̱ ñasɨɨhɨ yañi un, co̱o sehe tsihin ña. Tacan tan cuvi coo tata ra Er jaha un --catyí jutu ra tsihin ra.
9 Tsitó ra Onán tyin tatun coo sehe ra tsihin ña Tamar, ñavin tata ra cua cuvi can, yacan cuenda tandɨhɨ maa tsaha tsa tsicoo̱ ra tsihin ña Tamar, nducú ra cuhva tsa ña coo sehe ña, tyin tacan tan ña coo tata ra Er, yañi ra. 10 Tsihi̱ ndɨhɨ ra jaha̱ Nyoo tumaa tsa tsihi̱ ra Er, tyin ña taahán iñi Nyoo cuhva nacuú ra. 11 Tacan tan catyí jutu ra naha tsihin ña Tamar:
--Cua̱nuhu yuvehe jutu un, ña nducu naha un rayɨɨ, na cuahnu jihna ra Sela sehe yu tan cuvi tindaha ra tsihin un tyin vityin ihya ndi luhlu ra --catyí ra Judá tsihin ña.
Tacan caha̱n ra tyin tsicá iñi maa ra tyin cua cúu ndɨhɨ ra Sela tumaa tsa tsihi̱ nduvi yañi ra tun tindaha ra tsihin ña Tamar.
Tacan tan cuahan ña Tamar cua coo ña yuvehe jutu ña.
12 Tsa yaha cuanuhu ña Tamar, cuaha quɨvɨ yaha tan tsihi̱ ñasɨɨhɨ ra Judá, ña cuví sehe ra Súa. Tsa yaha naa̱ tsa cuiihya cuñí ra, quee̱ ra cuahan ra nda Timnat nu iyó ra xatyá ixi mbee jana ra tan cuahan ndɨhɨ ra Hira, ra ñuu Adulam ra vaha iñi tsi ra, tsihin ra. 13 Tsa tsito̱ ña Tamar tyin cuahan ra tyiso ña yatyin ñi nu iyó ña cua xatya ra ixi mbee jana ra, 14 sama̱ ña jahma nyitsí ña, tyin ndi nyitsí maa ña jahma cuenda tsa tsihi̱ yɨɨ ña, tan tyasɨ̱ ña jahma ndɨquɨ nuu ña, tyin tacan tan yoñi nacoto tsi ña, tan tsinyaa̱ ña yuhu ñuu Enaim, yatyin ñi nu canyií ityi cuahan nda Timnat. Tacan javaha̱ ña tyin tsa tsahnu̱ ra Sela, tan ñaha ca jatindaha ra Judá tsi ña tsihin ra.
15 Tan nyehe̱ ra Judá tsi ña Tamar can nu nyaá ña, tan tsica̱ iñi ra: "Ñaha cavaree cuví ña ihya", cuñí ra tyin ndasɨ́ nuu ña. 16 Natuhva̱ ra nu nyaá ña tan ndi ña nacoto̱ ra tsa juvin ña cuví tsanu ra, tan catyí ra tsihin ña:
―¿A cuvi cusu yu tsihin un?
Tan nacaha̱n ña:
--¿Náa cua cuhva un tsi yu tatun catyi yu tyin cuvi? --catyí ña.
Tan catyí ra:
17 --Cua jaquitsi yu iin mbee tsi un.
--Vaha --catyí ña--, maa tyin na̱coo náa ndahá un tsi yu tan nda jaquitsi un tsi tɨ tan cua nacuhva yu can tsi un --catyí ña tsihin ra.
18 --Tan ¿náa cuñí un nacoo yu tsihin un? --catyí ra.
Tan catyí ña:
--Seyu un tsihin yuhva nuuhñí can tan tsihin tatun un --catyí ña.
Tsaha̱ ra can tsi ña, tan quixi̱ ra tsihin ña, tan ñihi̱ sehe ña. 19 Yaha can tan tsinyitsi̱ nyico ña jahma tsa nyitsí ña cuenda tsa tsihi̱ yɨɨ ña.
20 Tsa tsaa̱ nuhu ra nu iyó ra, tava̱ tyiñu ra tsi ra ñuu Adulam ra vaha iñi ra na cundaca ra mbee can tsi ña, tan na nacuhva nyico ña tsa nacoo̱ ra tsi ña tsi ra, maa tyin ña nañihi̱ ra can tsi ña. 21 Tan tsica̱ tuhun ra tsi ra iyó ñuu can naha ra, tan catyí ra:
--¿Náa ñaha cavaree tsa tsinyaá yuhu ityi, ña iyó ñuu Enaim ihya? --catyí ra.
--Nduve ñaha cavaree iyó ihya --catyí ra naha tsihin ra.
22 Tacan tan cuanuhu̱ ra tan catyí ra tsihin ra Judá tsa tsaa̱ ra:
--Ña nañihi̱ yu ñaha can, tan catyí ra ñuu can naha ra tyin nduve ñaha cavaree iyó can catyí ra naha ―catyí ra.
23 Tan nacaha̱n ra Judá:
--Na ndoo maa ña tsihin tandɨhɨ tsa nacoo̱ yu tsi ña, tacan tan yoñi vacu nducu tsi yo, tyin yuhu jacuhu̱n yu mbee can tsi ña tan nduve ña nañihi̱ un --catyí ra.
24 Yaha̱ uñi yoo, tan tsaa̱ tyiñu nuu ra Judá tyin ña Tamar, tsanu ra, tsicoo̱ inga rayɨɨ tsihin ña tan ñuhú sehe ña.
Tacan tan catyí ra tsihin ñi tsicaha̱n tsihin ra:
--¡Ta̱va ndo tsi ña ñuu ndo, ca̱hmi ndo tsi ña!
25 Maa tyin tsa tsa tavá ra naha tsi ña ñuu can, jacuhu̱n ña tyiñu nuu tyiso ña, tan catyí ña tsihin ra cuahan can naha ra: Tyehen cahan ndo tsihin tyiso yu: "Ra jatsií nduñi ndaha tyiñu ihya cuví jutu lee sehe yu. ¿A nacoto un seyu ihya tan yuhva nuuhñí can tan tatun ihya?" catyí ra tsaha̱n can naha ra jaha̱ ña. 26 Nacoto̱ ra Judá ndaha tyiñu can tan catyí ra: "Tsa cuenda tsa ña jatindaha yu tsi ña tsihin ra Sela, sehe yu, yacan cuenda vaha ica̱ ña, yuhu cuví can ña vaha nacuu̱ tyin ña jatindaha̱ yu tsi ña tsihin ra", catyí ra. Tan ña tsicoo̱ ca ra tsihin ña.
27 Tan tsa cua tahan tsi cacu sehe ña tsito̱ ñi tyin tinɨhɨ cua jacacu ña. 28 Tsa tsa nduñihi̱ cuuhví tsitsi ña tsa tsa cua cacu sehe ña tacan tan quita̱ ndaha intuhun lee can tan tsahñi̱ ña tatan tsa nyehé tsi ña yuhva cuaaha ndaha lee can, tan catyí ña: "Jihna ca lee ihya cua cacu", catyí ña. 29 Maa tyin ña jihna ca lee tsa tsahñi̱ ña ndaha cacu̱, jihna ca yañi ra cacu̱, tacan tan catyí ña: "¡Nácaa nuña̱ yooho ityi yaha̱ un!", catyí ña. Yacan cuenda jacunañi̱ ñi lee can Fares. 30 Nu ndɨhɨ ña, cacu̱ lee nuuhñí yuhva ndaha can, tan jacunañi̱ ñi Zerah lee can.