Sɨvɨ sehe ra Esaú, yañi ra Jacob
36
1-2 Nyɨvɨ tata ra Esaú (ra nañí tucu Edom). Tindaha̱ ra Esaú can tsihin ñi Canaán: tindaha̱ ra tsihin ña Ada sehe ra Elón, nyɨvɨ Het, tindaha̱ ra tsihin ña Aholibama, sehe ra Aná, tan jutu ra cuví ra Zibeón nyɨvɨ Hev. 3 Tan tindaha̱ ndɨhɨ ra tsihin ña Basemat ñaha cuhva ra Nebaiot, sehe ra Ismael. 4 Sehe ra tsihin ña Ada cuví ra Elifaz, tan sehe ra tsihin ña Basemat cuví ra Reuel, 5 tan sehe ra tsihin ña Aholibama cuví ra Jeús, ra Jaalam tan ra Coré. Nandɨhɨ ra can naha ra cuví sehe ra tsa cacu̱ nda Canaán tahan ndi iyó ra ñuu can.6 Quihi̱n ra nandɨhɨ nyɨvɨ ra cuahan tsihin ra inga ñuu, nduñi ñasɨɨhɨ ra, nandɨhɨ sehe ra, nandɨhɨ nyɨvɨ yucú yuvehe ra, quɨtɨ jana ra, tan tandɨhɨ tsa ñihi̱ ra Canaán can cuahan tsihin ra, quita̱ tsiyo ra nuu ra Jacob, yañi ra. 7 Tacan javaha̱ ra tyin ña cuví ca coo ra naha iin ña nu coo ra naha tyin ña tsitahán ca cuhu catsi quɨtɨ jana ra naha tyin cuca xaan ra naha. 8 Yacan cuenda cuahan ra cua coo ra nda yucu nañí Seir.
Nyɨvɨ tata ra Esaú
9 Tan ra ihya naha ra cuví tata ra Esaú, ra tsicoo̱ yucu Seir, jutu nyɨvɨ Edom naha ra, 10 tan sɨvɨ sehe ra tsihin ña Ada cuví ra Elifaz, tan sehe ra tsihin ña Basemat cuví ra Reuel. 11 Tan sehe ra Elifaz tsihin ñasɨɨhɨ vaha maa ra cuví ra Temán, ra Omar, ra Zefo, ra Gatam, ra Cenaz. 12 Tan sehe ra Elifaz can tsihin ña Timna, inga ñaha tsa cuví tumaa ñasɨɨhɨ ra, cuví ra Amalec. Nandɨhɨ maa ra can naha ra cuví tata ra Esaú tsihin ña Ada. 13 Tan sehe ra Reuel, sehe ña Basemat cuví ra Nahat, ra Zera, ra Sama tan ra Miza. Ra can naha ra cuví tata ra Esaú tsihin ña Basemat. 14 Tan sehe ra Esaú can tsihin ña Aholibama, sehe sɨɨhɨ ra Aná, ra cuví sehe ra Zibeón, cuví ra Jeús, ra Jaalam tan ra Coré.
15 Ra cuví nuu tsihin tata ra Esaú nu iyó ra naha nda Edom cuví nandɨhɨ maa sehe ra Elifaz, sehe nuu ra: ra Temán, ra Omar, ra Zefo, ra Cenaz, 16 ra Coré, ra Gatam, tan ra Amalec. Ra can naha ra cuví sehe ra Elifaz, sehe ña Ada. 17 Tan inga ra cuví nuu tsihin tata ra can cuví nandɨhɨ sehe ra Reuel, sehe ña Basemat, ra Nahat, ra Zera, ra Sama tan ra Miza. Ra can naha ra cuví ndɨhɨ nuu tsihin tata ra Esaú nu iyó ra naha Edom. 18 Tan tsihin nduñi sehe ña Aholibama inga ñasɨɨhɨ ra Esaú can cuví ndɨhɨ nuu nda Edom can: ra Jeús, ra Jaalam tan ra Coré. Tan ra can naha ra cuví sehe yañi ra Aná. 19 Nandɨhɨ maa ra can naha ra cuví nuu tsihin tata ra Esaú - Edom. Sehe ra tsihin sehe yañi ra cuví ra can naha ra.
Nyɨvɨ tata ra Seir
20 Tan sehe ra Seir ra iyó maa ñuu nu tsaa̱ ra Esaú can, cuví ra ihya naha ra: ra Lotán, ra Sobal, ra Zibeón, ra Aná, 21 ra Disón, ra Ezer, ra Disán. Tan ra can naha ra cuví nuu cuenda nyɨvɨ tata ra Hor nu cuví ñuhu Edom. 22 Tan sehe ra Lotán cuví: ra Hori, ra Heman. Tan tyixi ra naha cuví tsi ña Timna. 23 Tan sehe ra Sobal cuví: ra Alván, ra Manahat, ra Ebal, ra Sefo, ra Onam. 24 Sehe ra Zibeón cuví: ra Aja, ra Aná. Tan ra Aná can cuví ra nañihi̱ nu iyó ndohyo nu tsɨquɨ quɨvɨ jacuendá ra urru jana jutu ra. 25 Tan sehe ra Aná can cuví: ra Disón tan ña Aholibama. 26 Tan sehe ra Disón can cuví tsi ra: Hemdán, ra Esbán, ra Itrán tan ra Querán. 27 Tan sehe ra Ezer cuví: ra Bilhán, ra Zaaván tan ra Acán. 28 Tan sehe ra Disán cuví: ra Uz tan ra Arán.
29 Tan ra ihya naha ra cuví nuu tsihin nyɨvɨ tata ra Hor: ra Lotán, ra Sobal, ra Zibeón, ra Aná, 30 ra Disón, ra Ezer, ra Disán. Ra can naha ra cuví nuu, cuhva nu yɨhɨ́ ndaha ra tsa intuhun intuhun ra nu cuví ñuhu Seir.
Ra cuvi̱ rey naha ra nda Edom
31 Ra ihya naha ra cuvi̱ rey yɨhɨ̱ ndaha nu cuví ñuhu Edom tahan ndi ñaha ca coo rey cuenda ra Israel naha ra: 32 Ra cuvi̱ rey yɨhɨ̱ ndaha Edom can cuví ra Bela sehe ra Beor, tan sɨvɨ ñuu ra cuvi̱ Dinaba. 33 Tsa yaha tsihi̱ ra Bela can, ra Jobab cuvi̱ rey, sehe ra Zera, ra ñuu Bosra. 34 Tsihi̱ ra Jobab can, tan ra Husam, ra ñuu Temán cuvi̱ rey cuenda ra. 35 Tan tsihi̱ ra Husam can, ra Hadad sehe ra Bedad cuvi̱ rey; ra jacanaa̱ tsi ra Madián nu cuví ñuhu Moab, tan Avit nañí ñuu ra. 36 Tsa yaha tsihi̱ ra Hadad can, ra Samla, ra ñuu Masreca cuvi̱ rey. 37 Tan tsihi̱ ra Samla can, ra Saúl, ra cuví ñuu Rehobot canyií yatyin yutya Éufrates, cuvi̱ rey. 38 Tsa yaha tsihi̱ ra Saúl can, ra Baal-hanán, sehe ra Acbor, cuvi̱ rey. 39 Tsihi̱ ra Baal-hanán can, tacan tan quɨhvɨ̱ ra Hadar cuvi̱ ra rey, tan Pau nañí ñuu ra, tan sɨvɨ ñasɨɨhɨ ra cuví Mehetabel, sehe ra Matred tan sehe yañi ra Mezaab tsi ña.
40-43 Tan ihya cuví sɨvɨ ñuu ra Edom naha ra: Timna, Alva, Jefet, Aholibama, Ela, Pinón, Cenaz, Temán, Mibzar, Magdiel tan Iram. Nyɨvɨ ñuu can cuví nyɨvɨ tsicoo̱ ican tsanaha. Tan intuhun intuhun ra naha tsicoo̱ sɨɨn sɨɨn ñuu tan cuvi̱ ra naha nuu tsihin ñuu ra naha. Tan ra Esaú cuví jutu tsaahnu nyɨvɨ Edom can.