Nu nasoco̱ Nyoo tsi ra Jacob nda Bet-el
35
Tan caha̱n Nyoo tsihin ra Jacob tan catyí ra: "Ndu̱vita, cua̱ahan nda Bet-el, ndo̱o ndacan coo un, tan cuñí yu javaha un iin ata ndacan tsa cuenda yu tyin juvin yu quita̱ nuu un quɨvɨ tsinú xeehe un nuu ra yañi un." 2 Tacan tan jacoto̱ ra Jacob tsi nandɨhɨ nyɨvɨ ra tan nyɨvɨ cuahan tsihin ra:--Cu̱tyi ndo tan sa̱ma ndo jahma ndo tan ja̱vita ndo tsitoho tatun iyó tsitoho tsi ndo. 3 Tyin cua cuhun yo nda Bet-el, tyin ndacan cua javaha yu iin ata tsi ra Nyoo tyin juvin ra jatyinyee̱ tsi yu quɨvɨ tsinyii̱ yu tsitsi tundoho, tan jacuenda̱ ra tsi yu ityi tsica̱ yu --catyí ra tsihin ñi.
4 Tan nacuhva̱ ñi tandɨhɨ tsitoho tsa cumí ñi tan lantsi tsa yɨhɨ́ soho ñi tsi ra, tan tyihi̱ ra can tsitsi ñuhu tsaha tunyii nyaá yatyin ñuu Siquem. 5 Tacan tan quita̱ ñi cuahan ñi, tan ña tsinyicu̱n nyɨvɨ ñuu cayucú yatyin ñi can tsi ñi tyin quɨhvɨ̱ tsa yuuhvi tsi ñi can jaha̱ Nyoo.
6 Tan tsaa̱ ra Jacob tsihin nandɨhɨ nyɨvɨ cuahan tsihin ra ñuu nañí Luz tan nañí tucu can Bet-el tsa canyií cuenda Canaán. 7 Javaha̱ ra iin ata ican tsi Nyoo, tan jacunañi̱ ra ican El-betel tan cuñí tsi catyí can: Nyoo cuenda Bet-el, tyin juvin ra cuví can quita̱ nuu ra quɨvɨ tsinú ra nuu yañi ra. 8 Tan nu cuví Bet-el can tsihi̱ ña Débora, ñaha tsa jacuenda̱ tsi ña Rebeca, sɨhɨ ra, tan quɨhvɨ̱ ñuhu ña tsaha tunyii nyaá yatyin Bet-el can, tan jacunañi̱ ra nu quɨhvɨ̱ ñuhu ña can Alón-bacut tan cuñí tsi catyí can "Tunyii cuenda tucuiihya iñi."
9 Quituvi̱ Nyoo nuu ra Bet-e̱l can quɨvɨ tsa yaha̱ ra can tsa quee̱ ra nda Padan-aram tan cuanuhu nyico ra ican nasoco̱ Nyoo tsi ra. 10 Tan catyi̱ Nyoo tsihin ra:
"Ñavin ca Jacob cua cunañí un;
Israel cua cunañi un vityin."
"Yuhu cuví Nyoo, ra iyó tandɨhɨ tunyee iñi, tan nduve tsa yɨɨ nuu yu,
coo cuaha sehe un tan tata un;
iin ñuu cahnu tan cuaha ca maa ñuu cua cuu tata un,
tan tsitsi tata un cua quita ra cua cuvi rey naha ra.
12 Tan ñuhu tsaha̱ yu tsi ra Abraham tan ra Isaac
tsahá ndɨhɨ yu can tsi un,
tan tsa yaha cúu un, cua nacuhva yu can tsi nyɨvɨ tata un", catyi̱ Nyoo tsihin ra quɨvɨ can.
13 Tan cuatsiyo̱ Nyoo nuu nyaá ra, nu natuhu̱n ra tsihin ra. 14 Tan quihi̱n ra iin yuu tyaa̱ nyityi ra ican tumaa iin tsa ndaa tan tyiso̱ ra acetye tan vinu vaha sɨquɨ yuu can. 15 Tan ican cuví nu jacunañi̱ ra Bet-el tyin natuhu̱n Nyoo tsihin ra.
Nu quɨhvɨ̱ ñuhu ña Raquel
16 Yaha can, quita̱ ñi Bet-el, ndi cumañi ca tsaa ñi nda Efrata quitsaha̱ cuuhvi tsitsi ña Raquel tan cacu̱ sehe ña sava ityi. Cuaha xaan tundoho nyehe̱ ña tan cacu̱ sehe ña. 17 Maa tyin tsa nyehe̱ ña tatan can tyin nyehé xaan ña Raquel tundoho catyí ña tsihin ña tyehen: "Ña caca iñi un tyin cua cacu vaha lee ihya", catyí ña. 18 Tan tsa tsa cuñí cúu ña tan catyí ña:
―Benoni cua cunañi sehe yu --catyí ña.
Maa tyin sama̱ ra Jacob sɨvɨ lee can tan jacunañi̱ ra Benjamín tsi lee can.
19 Tacan cuví nu tsihi̱ ña Raquel tan quɨhvɨ̱ ñuhu ña ityi cuahan nda Efrata, nu cuví Belén nda cuanda vityin. 20 Tan nu ñaña can tyaa̱ nyityi ra Jacob iin yuu tan cuví can iin tsa ndaa nda cuanda vityin, tyin ican quɨhvɨ̱ ñuhu ña Raquel.
21 Yaha can quita̱ ra cuahan ra tsihin nandɨhɨ nyɨvɨ ra cuahan tsihin ra, tan yaha̱ ñi nu nyaá torre nañí Eder, tan ityi nuu can tsicoo̱ ñi. 22 Tan tsa tsa iyó ra naha can, tsito̱ ra Jacob tsa javaha̱ ra Rubén, sehe ra, tyin tsaha̱n ra tsicusu̱ ra tsihin ña Bilha, ñaha tsa cuví tumaa cuví ñasɨɨhɨ maa ra.
Tsa utsi uvi sehe ra Jacob
Tan utsi uvi sehe ra Israel tsicoo̱. 23 Sehe ra Jacob tsihin ña Lea cuví: ra Rubén sehe nuu ñi, ra Simeón, ra Leví, ra Judá, ra Isacar tan ra Zabulón. 24 Sehe ra tsihin ña Raquel cuví: ra José tsihin ra Benjamín. 25 Sehe ra tsihin ña Bilha musu ña Raquel cuví: ra Dan tsihin ra Neftalí. 26 Sehe ra tsihin ña Zilpa musu ña Lea cuví: ra Gad tsihin ra Aser. Ra ihya naha ra cuví sehe ra Jacob tsa cacu̱ nda Padan-aram*f8.
Nu quɨhvɨ̱ ñuhu ra Isaac
27 Tan tsaha̱n ra Jacob tsinyehe̱ ra tsi ra Isaac, jutu ra, nda Mamre, nda ñuu Arba nu cuví Hebrón, nu tsicoo̱ maa tsii ra tsihin jutu ra. 28-29 Cientu cumi xico cuiya tsicoo̱ ra Isaac tsaha tsihi̱ ra. Ra tsahnu cuví ra tsaha tsihi̱ ra, ndɨhɨ̱ nɨɨ vaha maa quɨvɨ ra, tan ndu ii̱n ra tsihin nyɨvɨ ra nundaa cumisantu. Tan nduvi sehe ra tsicutsi̱ tsi ra, ra Esaú tan ra Jacob.