Nu ndoyo̱ ñuhu ña Dina ñuu Siquem
34
Ña tyuvaa Dina, tsa cuví sehe ra Jacob tsihin ña Lea, tsaha̱n ña tsinyehe̱ ña tsi ñi cuatyi ñuu nu tsaa̱ ñi. 2 Tan nyehe̱ ra Siquem, sehe ra Hamor, ra cuví nuu tsihin ñuu can, tsi ña, suhu̱ ra tsi ña tan tsihin tsa ñihi jandoyo̱ ñuhu ra tsi ña. 3 Tan nducu̱ xaan ra cuhva na cuñi ña tsi ra, tyin yaha xaan cuñí ra tsi ña. 4 Tacan tan catyí ra tsihin jutu ra:--Tyaa, cuñí yu cuhun un cua nducu vaha un tsi ña Dina, cuñí yu tindaha yu tsihin ña --catyí ra tsihin jutu ra.
5 Tsito̱ ra Jacob tyin ndoyo̱ ñuhu ña Dina jaha̱ ra Siquem, ña caha̱n naha ra tsa tacan cuvi̱, nda tsaa̱ nuhu maa ra cuatyi sehe ra tsa tsi jacuenda̱ ra naha mbee tsitsi cuhu tsaha jacoto̱ ra tyin ndoyo̱ ñuhu ñaha cuhva ra naha. 6 Tan tsaha̱n ra Hamor, jutu ra Siquem, tsicaha̱n vaha ra tsihin ra Jacob, jutu ña tyuvaa can.
7 Maa tyin ra cuhva ña Dina xaan xaan cuñí ra naha tsa tacan tsito̱ ra naha tyin ndoyo̱ ñuhu ña jaha̱ ra Siquem, tyin catyi̱ tuhun ra Jacob can tsihin ra naha tsa tsaa̱ ra naha quee̱ ra naha cuhu, ña vaha tsa tacan nacuu̱ ra Siquem tyin cahnu ticanuu cuví can tsa cuenda nyɨvɨ ra naha. 8 Maa tyin natuhu̱n ra Hamor tsihin ra cuatyi can naha ra, tan catyí ra:
--Ja̱ha ndo tumañi iñi, cu̱hva ndo tsi ña na tindaha ña tsihin ra Siquem, sehe yu, tyin yaha xaan cuñí ra tsi ña. 9 Cua cuvi ndo nyɨvɨ ndi, cu̱hva ndo sehe ndo tindaha tsihin sehe ndi tan cuví tindaha tucu maa ndo tsihin ñaha ñuu ndi. 10 Ndo̱o ndo coo ndo ñuu ihya tsihin ndi nuña xaan nu ñuhu ihya, ja̱tyiñu ndo tan ñihi ndo xuhun tan ja̱ta ndo ñuhu --catyí ra tsihin ra naha.
11 Tan caahán tucu maa ra Siquem tsihin jutu ña Dina tan tsihin cuhva ña:
--Ja̱ha ndo tumañi qui̱hin ndo tyiñu caahán ndi. Cuhva maa yu náa cua ndacan ndo tsi yu. 12 Nduve cuenda maa tatun cuaha cua ndacan ndo, cuhva maa yu, ndi maa tsa ñavin cuhva taahán tsi cuhva yu cuví can maa tyin cua cuhva yu. Tan cuhva ndo ndatu tindaha yu tsihin ñaha cuhva ndo --catyí ra.
13 Maa tyin tsa catyi tsa ndoyo̱ ñuhu ñaha cuhva ra naha jaha̱ ra Siquem, yacan cuenda caha̱n ra naha tsa ña nditsa tsihin ra tan tsihin jutu ra. 14 Tan catyí ra naha:
--Ña cuví cuhva ndi ñaha cuhva ndi tsi iin ra ñavin nyɨvɨ ñuu ndi cuví, tyin tsa cahan nuu cuví can tsi ndi. 15 Maa tyin ndoo ndi vaha tatun javaha ndo tyehen: ca̱hnya ndo ñɨɨ nu ica nandɨhɨ rayɨɨ ñuu ndo tyin tacan iyó maa ndi. 16 Tacan tan cuvi tindaha sehe sɨɨhɨ ndi tsihin sehe ndo, tan cuvi tindaha tucu maa ndi tsihin sehe sɨɨhɨ ndo; tan coo yo iin caa ñi tan iin ñi ñuu cua cuvi yo. 17 Maa tyin tatun ña quihin cuenda ndo tsa caahán ndi ihya, tan ña cua tyahnya ñɨɨ nu ica tsi ndo, cua cuhun ndi tan cuhun ndɨhɨ ñaha cuhva ndi tsihin ndi --catyí ra naha.
18 Ndoo̱ ra Siquem tan jutu ra vaha cuhva caha̱n ra can naha ra. 19 Ña ndatu ra tyuvaa can, javaha̱ ra cuhva caha̱n ra can naha ra tsihin ra, tyin yaha xaan cuñí ra tsi ña Dina. Tyin ra ihya cuví ra tyaá yahvi xaan ca nyɨvɨ tsa nuu nandɨhɨ maa nyɨvɨ ra. 20 Tacan tan cuahan ra tyuvaa can tsihin jutu ra yuhu vehe cahnu ñuu can cua jacoto ra naha tsi nandɨhɨ rayɨɨ tan catyí ra naha:
21 --Ji̱hna ndo, ra Jacob tsihin nyɨvɨ ra, cuví ra naha ra vaha iñi tsi yo, cua coo ra naha ñuu yo tan cua jatyiñu ra naha, vaha tyin iyó ñuhu nu cua jatyiñu ra naha; tan inga tyin cuvi tindaha sehe yo tsihin sehe sɨɨhɨ ra naha tan cuvi tindaha tucu maa sehe ra naha tsihin sehe sɨɨhɨ yo. 22 Maa tyin ndoo ra naha vaha cuvi ra naha iin ña ñuu tsihin yo tun javaha yo cuhva caahán ra naha, tan tsa cuñí ra naha, yacan cuví tsa tyahnya ñɨɨ nu ica tsi nandɨhɨ maa yoo rayɨɨ tumaa maa ra naha. 23 Tun ndoo yo vaha cuhva caahán ra naha cua coo ra naha ñuu yo, tan tandɨhɨ ndaha tyiñu ra naha tan quɨtɨ jana ra naha tsii maa yo cua cuvi can ―catyí ra naha.
24 Nandɨhɨ maa rayɨɨ ñuu can naha ra tan nda cuanda ra cuatyi tsahun uñi cuiya tyaa̱ yahvi ra naha tsa caha̱n ra Hamor tan ra Siquem, tsihin ra naha, nandɨhɨ maa ra naha tyahnya̱ ñɨɨ nu ica tsi. 25 Tan tsa tsinu uñi quɨvɨ tsa ndi iyo xaan taahán nandɨhɨ maa ra tsa tyahnya̱ ñɨɨ nu ica tsi can, tsaha̱n ra Simeón tan ra Leví cuhva ña Dina tsicahñi̱ ra naha tsi ra can naha ra tsihin mityi tyin ndi vita cuñí ra can naha ra tsihin tsa uhvi can. 26 Tsahñi̱ ra naha tsi ra Siquem tsihin ra Hamor, jutu ra, quihi̱n ra naha ñaha cuhva ra naha tsaha cuahan ra naha. 27 Yaha can, tsaa̱ ndɨhɨ inga ca yañi ra naha, tsañí ña ra can naha tsata ndɨyɨ catsahán can, tan suhu̱ ra naha tandɨhɨ maa tsa iyó ñuu can. Tacan javaha̱ ra naha tsa catyi tsatyin ndoyo̱ ñuhu ñaha cuhva ra naha jaha̱ ra Siquem. 28 Quihi̱n ra naha mbee, indɨquɨ, urru tan tandɨhɨ ca maa tsa iyó ñuu can tan tsihin tsa iyó tsitsi cuhu ra naha ra. 29 Suhu̱ ra naha tandɨhɨ maa tsa iyó tsitsi vehe nyɨvɨ can, quihi̱n ra naha nandɨhɨ maa ra nyihi tan nandɨhɨ maa ñi ñaha cuahan tsihin ra naha, tan ña cua coo nuña ca ñi. 30 Tan catyí ra Jacob tsihin ra Simeón tan ra Leví:
--Nducú vaha nyooho nu nduxaan iñi nyɨvɨ Canaán tan nyɨvɨ Ferez tsi yo, yucú yo tsitsi tsa yɨɨ jaha̱ ndo vityin. Cua ndu iin ra naha tan cua quitsi cahñi ra naha tsi nandɨhɨ yo tyin ña tuvi yo ―catyí ra.
31 Tan nacaha̱n ra naha tsihin ra:
--Maa tyin ña vaha tsa tacan jandoyo̱ ñuhu ra tsi ñaha cuhva ndi tyin ñavin ñaha tsicá nuu cuví ña ―catyí ra naha tsihin ra.